Devidi-Anume 48 - FỊAFỊA BAỊBỤLỤ

Zayọnị, Tamụnọ Opu Ama Mẹ

¹ KỊNỊNYANAḄỌ ḅe anie opuḅọ, tẹ tomi pịkị opu ḅara kẹ ò tokini ḅa wamịna Tamụnọ ḅe opu ama mẹ ḅio, ọ̀ fịafịa tụndụ mẹ ọgọnọ.

² Zayọnị, Tamụnọ tụndụ mẹ, gelem, pịkị iḅim; opu amadaḅọ ḅe opu ama mẹ ḍereku dogi-ḅo tomikiri ḅẹ atomi mamgba pịrịarị.

³ Tamụnọ kẹ wa ḍie tẹ mịnẹ ọ̀ ḅụụ emi ḅọ, ye mḅọ la ḅịa, opu ama mẹ ḅio ḅẹ kụrọnị-anga mẹ ḅụ.

⁴ Amadapụ ma kobiri gboloma tẹ owu kẹ Zayọnị Tụndụ mẹ paka ḅẹ ḅom.

⁵ Kụma ini anị ẹrị sakị, ịna ḅụụ-gbiripum; ịn ḅalafa tẹ mangị-som.

⁶ Anịanga ḅalafa in kun sịẹma tẹ ịna oju fụkam, iyi ḅẹ sakị la tẹ ẹrẹḅọ fụka-ye da ḅara,

⁷ opu erise fẹrụ arụ ḅakụ ḅara.

⁸ Tamụnọ kọrị tẹ ye mẹ wa naa tẹ, mịọkụ wa pịkị anị ẹrị tẹ, wamịna Tamụnọ, Kụrọ mamgba nyana KỊNỊNYANAḄỌ ḅe opu ama mẹ ḅio; ori opu ama mẹ koko kpaịnma gbamaso ḅa.

⁹ Yei Tamụnọ, ị́ Warị ḅio ḅụ wa í kuno-a ḅẹlẹma mẹ kẹ ḅiokoromarị.

¹⁰ Kịnị í tokiniarị anga-anga ḅụ, ị́ ereso tomikiri mẹ kana-koroarị, Aḍụa ofori ḅara mie ị́ kẹ ḅẹrẹtọn-arị;

¹¹ yee Zayọnị ḅẹ apụ ma ḅioḅẹlẹ! Ị́ karakara aḅẹrẹ kọn-arị; yee Juda ḅio ḅẹ opu ama ma ḍereku!

¹² Tamụnọ atomi, ọ́ mẹnjị Zayọnị ikelema, tẹ anị ḅẹ awageleri ma kịẹn nimii;

¹³ ọmịnị onu ma kẹ elekima sụa, tẹ kụrọnị-anga ma pekele-ḍikii, mịẹ tẹ ọmịnị arị sime-ḅara ḍuko ḅo ḅarị ḅụọ mẹ pịrị ḅẹ ḅara:

¹⁴ “Ḅị Tamụnọ ḅe anie wamịna Tamụnọ, mu ḅẹẹ-sakị ḅẹẹ-sakị la; ori wamịna tọrọkọ-sụn ḅa ḅo ḅarị sakị mamgba ḅụ.”