Devidi-Anume 46 - FỊAFỊA BAỊBỤLỤ

Tamụnọ Wamịnị Na Emi

¹ Tamụnọ wa kikimarị, pịkị ịnyọ kẹ wa pịrịarị. Sakị mamgba ori emi tẹ ḅarasụa wa pịrịarị ḅụụ-fụka asakị ḅụ.

² Mie ḅụ kiri mẹ jikearị sọ wa ḅalafa ḅịa, tẹ tụndụ ma soku mu abajị owolo ḅio koro sọ;

³ opu atọrụ ma daarị tẹ ọnụngọ ḍụrụkụarị sọ; tẹ tụndụ ma dasịẹma-a ḅara kẹ opuma jikearị sọ.

⁴ Gbọrụ tọrụ emi tẹ sọ ḅo ḅioḅẹlẹ kẹ Tamụnọ opu ama mẹ pịrịarị; tẹ ḅo Gele Tẹịnḅọ ḅe fịafịa warị mẹ laarị.

⁵ Tamụnọ anị opu ama mẹ ḅio emi, gbala-gbala anị fama-fama ye paka ḅịa; dede-funfun ḅụ ò ḅo ḅarasụa anị pịrị ḅa.

⁶ Ama sịẹ-sịẹ ma tẹmẹ-naịn-naịn tẹẹ, amadapụ ma daarị anga ma jike tẹẹ; Tamụnọ so-alagba tẹịn-arị, tẹ kiri mẹ mẹnịma-faarị.

⁷ Kụrọ mamgba nyana KỊNỊNYANAḄỌ ḅe wamịnị na emi; Jekọbụ Tamụnọ ḅe anie wamịna ḅụụ-ḅọị-yọ.

⁸ Ọ̀ paa ḅo KỊNỊNYANAḄỌ ḅe kọrị tẹ ye mẹ ẹrị. Ọmịnị ọ̀ mịẹ tẹ ḅalafama ḅụụ-buama-aị ma ẹrị tomikiri mẹ ḅụ.

⁹ Bebe tomikiri mẹ kana-koro ḅụ ori ọmụ pẹlẹ-pẹlẹ-pẹlẹarị; Ori iboli ma anyịmarị, ḅẹkẹrẹ ma gulugulumarị, pịkị ekpeke ma kẹ fịnị ḅio dọkịmarị.

¹⁰ Ọ̀ ḅẹẹarị, “Ọ́ ḅarị ọmụ gbin ma, tẹ nimi mịnẹ yẹrị Tamụnọ; sịẹ-sịẹ ma ogboku yẹrị tẹịnḅọ, tomikiri mẹ kana-koro ḅụ yẹrị tẹịnḅọ.”

¹¹ Kụrọmamgba nyana KỊNỊNYANAḄỌ ḅe wamịnị na emi; Jekọbụ Tamụnọ ḅe anie wamịna ḅụụ-ḅọị-yọ.