Devidi-Anume 45 - FỊAFỊA BAỊBỤLỤ

Amadaḅọ Ere-Ịyarị Sakị In Su Nume

¹ Iḅi ẹkwẹn ì kuroma sọ ḅin-arị, à mịẹ nume mẹ su amadaḅọ ḅe bomarị sakị. Ḍiri kẹ ḍịn-ḅọ kẹ, kẹ sara ḅara anie ị̀ ḅẹlẹ ọgọnọ arị tẹịn-tẹịn pakarị ḅara.

² Ḍiki-tọrụ ḅụ, tomi mamgba ị́yẹrị iḅi tẹịnm; ẹkwẹn kọn ḍịn-ḅọ. Tamụnọ sakị mamgba í bomarị.

³ Opu amadaḅọ, í okologie sụkaa; í ebube nyanam, ị́ ḅakam!

⁴ Ḅakaḅọ, mẹnjị mu owu-ḅara-iḅi nyana-a, ị́ karakara na jụmọ-jụmọ inoma-a na ḍụarị ye ḅụ! Ị́ ịnyọ opu owu-ḅara-iḅi, iḅi, iḅi kẹ ị̀ pịrị ḅa!

⁵ Ị́ aḍịẹịn ma oḅuarị, arị si kẹ ị́ tọn apụ ma aḅioḅẹngbọ kan sọ muarị; sịẹ-sịẹ ma nwẹnị ị́ aḅụọ-suku ḅịkị koroarị.

⁶ Tamụnọ kẹ ị́ pịrị daarị ama mẹ, ị́ anị da-mu ḅẹẹ-sakị ḅẹẹ-sakị la ḅa. Ị́yẹrị anie aḍụa ofori ḅara kẹ ḅẹrẹtọn ị́ atomi pịrịarị;

⁷ í kuraye ḅẹlẹma tẹ siye ḍiki-ḅioḅuarị. Anie ẹrẹsị Tamụnọ, ị́ Tamụnọ ḅe, ị́ sẹlẹ ọkị tẹẹ, tẹ ḅioḅẹlẹ kẹ ị́ ọgọnọ ọsụma-ọsụma sararị, ọ̀ kẹ jen gbọrụ amadaḅọ sọ na mịẹ-a ḅara.

⁸ Maha na alo na nwẹn-sịn kụnụ aị kẹ mịẹ sẹntị ị́ kapa ḅụ kụnụarị; ị́ ama-da opu awarị ma tẹ ọdụ kẹ ḅirima aị ma ḅio nume ḍịn apụ su-su í ḅioḅẹlẹmarị.

⁹ Ị́ ama-da warị mẹ ḅẹ ogigo mẹ ḅio ḅẹ iriawọ ma ogboku amadapụ awọmẹ sọ emi, í emine mẹ ama-ḅara anga ḅụ ama-da ẹrẹḅọ ma iḅi tẹịn golu ḅiriaị ḅiri tẹ sịẹ wararị.

¹⁰ Amadaḅọ ḅe ịya ḅẹ ẹrẹḅọ, à ḍukoarị ye mẹ poki; ị́ ama ḅẹ apụ na ị́ amịnapụ na kẹ ḅioḅọrọma-a.

¹¹ Í iḅi mịẹ tẹ amadaḅọ ḅe tẹmẹ ị́ ịgbanị ḅa; ori ị́ sịḅịdaḅọ sọ tẹ, ọkọẹrẹsị sịḅị-tuu ọ̀ pịrịị.

¹² Taya ḅẹ apụ ḍiepịrị-aị kẹ ḅo ị́ pịrị ḅa, ngọ-kọn apụ ḅo ị́ tọrụ iḅi ọkị ḅẹ anga ḍọkị ḅa.

¹³ Amadaḅọ ada ma ama-da opu warị mẹ ḅio emi — árị iḅi ye ḅakam. Á sụa wararị vọrọrọ-kapa mẹ golu-golu iri mie ịn kẹ anị ḍori yee.

¹⁴ Á ḅiri gẹnị-gẹnị vọrọrọ-kapa mẹ na mie ini á ḅọrọma amadaḅọ ḅe dama-mu ye: árị iriawọ ma á pono mum, ini sọ ini ịn kẹ ḅo ọ̀ lam.

¹⁵ In ḍereku na ḅioḅẹlẹ na kẹ ḅoarị, tẹ amadaḅọ ḅe opu warị mẹ sọ-muarị.

¹⁶ Ị́yẹrị ị̀ amadaḅọ, ị́ tọnwa awọ iyi tẹ ini í kiri ọkị tẹ ama-da ḅa, ị́ ḅarị ofori sakị, ị́ ị́ elemu aḍapụ kiri ọkị ḅara, tẹ ị́ ịn mịẹ tẹ ịn ḅẹrẹtọn bebe tomikiri mẹ pịrị apụ sọ ḅa.

¹⁷ À kẹ í bomarị nume mẹ mịẹ tẹ ị́ ereso mẹ sime mu ḅẹẹ-sakị ḅẹẹ-sakị la ḅa, tẹ tọrọkọ-jụ ḅo ḅarị sakị mamgba ḅụ ḅẹḅọ-ḅẹḅọ í tokini ḅa.