Devidi-Anume 44 - FỊAFỊA BAỊBỤLỤ

Tamụnọ Izirẹlị Gbaịn Tẹ Ye Ịn La Ḅịa Ḅara Gotẹ Kọn Tẹkẹ

¹ Yei Tamụnọ, wa ḅarana wamịna aḅeri kẹ anị naa tẹẹ; wamịna elemu aḍapụ ma anị gbolomaye ḍuko wa pịrị tẹẹ, in ḍumo sime wararị sakị ị́ kọrị opu akọrịnama ma, iḅere-iḅerea ene ma ḅụ.

² Ị́ wẹrịtẹ ḅarana oru nimi apụ ma dee-pakama tẹ ị́ atomi ma kẹ ịna kiri ḅụ kuroma ḅara mẹ; ị́ wẹrịtẹ fomu-ḅara kẹ osi asịẹ ma pịrị tẹ mịẹ tẹ sime ị́ pịrị apụ ma lolo ḅara mẹ.

³ Ị́ atomi ma ịna okologie kẹ ọmụ gbin tẹ owu-ḅara-iḅi ḅụ kiri mẹ ọkị-a; ini ịna kụrọ kẹ anị nyana ḅo-a, ị́ kụrọ na ị́ ịnyọ na ḅụ, í ini na sime ye ḅẹ ḅiokpọ ḅụ, anie nwẹnị ḍie-pakama mịnẹ ị́ ịn ḅẹlẹmam.

⁴ Ị́yẹrị anie ị̀ amadaḅọ, pịkị ị̀ Tamụnọ: í owu-ḅara-iḅi kẹ ị́ atomi pịrịarị,

⁵ tẹ ị́ kụrọ ḅụ mie wa ḅọrọ tẹ si kẹ wa tọn apụ ma nẹngịmarị ye.

⁶ Àrị ì iboli kẹ ḅiokpọma-a, anịanịa ì okologie mie ị̀ ḅọrọma ḅarịye nwẹn ḅẹẹ ye;

⁷ kụma wa ḅọrọma tẹ si kẹ wa tọn apụ ma ḅara-ḅio ḅụ, pịkị wa ḍiki-ḅioḅuarị apụ nẹngịma tẹ.

⁸ Sakị mamgba wa í tokini ḅa, tẹ ịmịẹtẹ kẹ ị́ ḅẹ mu ḅẹẹ-sakị ḅẹẹ-sakị la ḅa.

⁹ Kụma mịọkụ ị́ wa sịkị tẹ mịẹ tẹ jen-apụ wa nẹngịma tẹ owu kiri ḅụ; ị́ ḅarị jen kẹ wamịna ọmụ-ogbo-ogbo ma na mẹnjị paka-a.

¹⁰ Ị́ wa mịẹ tẹ wa mangịarị si kẹ wa tọn apụ ma tọrọkọ ḅụ, tẹ ịn nwẹnị wamịna aị ma ọkị ịna aị sọma.

¹¹ Ị́ ḍụkụ ịn pịrị tẹ ịn wa kẹ anana ḅaa ḅara ḅaam; Ị́ wa gala-galama ja sịẹ ḅio suum.

¹² Ị́ ị́ atomi ma kẹ kala ḅịḅị dẹrịm, gbala í kuromam ini ị́ ịn kẹ mịẹ ḅẹ ye ofori ḅara sime tẹẹ.

¹³ Wamịnị na kpeki tẹ anga apụ ma ị́ kẹ wa mịẹ ye mẹ ẹrịm, tẹ ịn wa komboarị pịkị wa ḍẹrịarị.

¹⁴ Tomikiri ḅẹ asịẹ ma ogboku ḅụ ị́ wa kẹ kịnị-ḍẹrịmaye sọma tẹ; ịn wa ḍikiḍiki tẹ ịna asịḅị jike-jike wa daarị, ḍiki iderima ḅụ.

¹⁵ Sakị mamgba ḅụụ-jịrịma kiri ḅụ àrị emi; ḅụụ-jịrị ị̀ gbaịn tẹ,

¹⁶ à si kẹ ị̀ tọn apụ ma nini-suku sụa-sụa ị̀ pịrị tẹ ị̀ mịẹ-mịẹ simarị aị ma naarị ye ḅụ.

¹⁷ Ma mamgba wamịna ḅụ paka tẹẹ, karakaraye wa paa ị́ kẹ ḅioḅọrọma-a sọ, anịanịa ị́ wamịnị na fị wararị ọḅọkụ mẹ kan tẹẹ.

¹⁸ Amụ wa kọngọ kụrọma ị́ pịrị-a; amụ wa ị́ ḅịḅịpoki-a tẹ ị́ tọn kuroma aị ma sịkị-a.

¹⁹ Anịsọ ị́ ḅarasụa wa pịrị-a tẹ wa kẹ kịnị-ḅaaḅa piri-ḅio-ḅẹ anama ogboku ḅụ koroma-som; kpiti tẹịn kanakana ḅio mie ị́ wa kẹ gbin kuroma tẹ so ye.

²⁰ Wa nwẹnị ḅarị sunsin wamịna Tamụnọ ḅe pịrị-a; tẹ ja sịẹ ḅẹ oru-tamụnọ tẹkẹarị ḅẹ kụma,

²¹ piki-pikiye-ofori ḅara ḅụ ị́ kọkọ nimi ḅa, ị́ wamịna ḅọị tẹ akuroma ma nimi fama wararị ẹrẹsị.

²² Kụma ị́ sịḅị mie in gotẹ sakị mamgba wa ḅaarị ye, mie in gotẹ ḅaa ḅẹ anana mịẹ ḅara kẹ wa mịẹarị ye.

²³ KỊNỊNYANAḄỌ, saakịị! Tiye ẹrẹsị ị́ monoarị? Ị́ ḅụụ jike saakịma-a! Wa sịkị gbamaso ma!

²⁴ Tiye ẹrẹsị ị́ ị́ ḅụụ ḅọị wa pịrịarị? Wamịna tọrụsiẹrị mẹ na ḅụụ-fụka na kẹ ḅioḅọrọma ma!

²⁵ Wa ḅịkị kiri koro tẹ kọsị tẹẹ; ịn wa nẹngịma tẹ wa fọọn ḅio gbin koro sime wararị.

²⁶ Ḅo ḅarasụa wa pịrịị! Í kuno-a ḅẹlẹma mẹ ẹrẹsị wa ḅọrọma-a!