Devidi-Anume 42 - FỊAFỊA BAỊBỤLỤ

MAAỊN KARAMA ḌIRI (Nume 42—72) Kun Jen Sịẹ Mu Ḅọ Kọn Tẹkẹ Mẹ

¹ Minji tụḅara pọkọ-tarịarị tẹ ọ̀ lẹlẹma dein minji simearị ḍaḅa ḍọkị ḅara: anie ị́ kẹ ị̀ pọkọ-tarịarị ḅara, Yei Tamụnọ.

² Ḍumo wararị Tamụnọ, ị̀ ị́ pọkọ-tarịarị; tọ-sakị à mu ị́ tọrọkọ sunsin ị́ pịrị ḅẹ?

³ Eneḅaka na ḍin na ḅụ àrị owuarị, tẹ owu-minji ngẹrị ị̀ fịye sọ tẹ: sakị mamgba si kẹ ị̀ tọn apụ ma ị̀ gbelarị, “Ị́ Tamụnọ ḅe ọ̀ tọ-anga emi?”

⁴ Ì ḅioḅẹngbọ kan sararị, à ḅọrọ tẹ sakị mẹ kẹ ḅiokoromarị sakị, àrị inweni-ogbo-ogbo ma na Tamụnọ warị mẹ sọ-mu sakị àrị ịna tọrọkọ-sụn mẹnjịma mum, ḅioḅẹlẹarị tomina-ogbo, nume-suarị, olokuarị, tẹ Tamụnọ tokiniarị.

⁵ Tiye ẹrẹsị à mị-ḅara kẹ kururuarị? Tiye ẹrẹsị à mị-ḅara kẹ ḅụụ-fụka daarị? À Tamụnọ kẹ ḅiokpọma ḅa tẹ à siin jen kẹ ò tokini ḅa, ị̀ ḅọrọmaḅọ pịkị ị̀ Tamụnọ.

⁶ Ị̀ Tamụnọ, Ì ḅioḅẹngbọ kaan-sara tẹẹ, ị̀ ḅụụ ḅio; ọkọẹrẹsị àrị ị́ kẹ ḅiokoroma ḅa Amọnị gele yọ, Miza Tụndụ ma ọgọnọ pẹlẹ, pẹlẹ Jodanị tọrụ mẹ ḅụ sararị aminji ma

⁷ mu owolo mẹ suku-ḅio la tẹ tọrụ mẹ wọlọgịarị, pẹlẹ-pẹlẹ sararị minji ma ḍụrụkụarị ḅara mẹ ḅụ ị́ ọnụngọ ma ḍarị-ḍarị ḅo ị̀ gbaịn-arị.

⁸ Yee KỊNỊNYANAḄỌ ḅe ò kuno-a ḅẹlẹma mẹ ḍie-pakama eneḅaka ḅụ: mịẹ tẹ ḍin ḅụ à nume-su ḅẹ ḅara, tẹ ì ḍumo mẹ ḅẹ Tamụnọ ḅe tẹkẹ.

⁹ Àrị ị̀ ḅọrọmarị Tamụnọ ḅe ḅẹẹarị, “Tiye ẹrẹsị ị́ ị̀ kẹ ḅioḅọrọma? Tiye ẹrẹsị à paa, tọrụsiẹrịma tọrọkọ mu ḅẹ, si kẹ ị̀ tọn-arị apụ ma kẹ ị̀ mbasịarị aị ma ḅụ?”

¹⁰ Ịn kẹ ị̀ mịẹ simarị aị ị̀ kọsịma tẹ: anie ịn paa ì gbela, gbela, gbelarị mẹ, “Ị́ Tamụnọ ḅe ọ̀ tọ-anga emi?”

¹¹ Tiye ẹrẹsị à mị-ḅara kẹ kururuarị? Tiye ẹrẹsị à mị-ḅara kẹ ḅụụ-fụka daarị? À Tamụnọ kẹ ḅiokpọma ḅa, tẹ siin jen kẹ ò tokini ḅa, ị̀ ḅọrọmaḅọ pịkị ị̀ Tamụnọ.