Devidi-Anume 41 - FỊAFỊA BAỊBỤLỤ

Obiarị ḅọ Tẹkẹ Mẹ

¹ Igoin-apụ ma balarị apụ ma ḅioḅẹlẹ sime ịn pịrịm; KỊNỊNYANAḄỌ ḅe ḅarasụa ịn pịrị ḅa, ḅụụ-fụka ịn la sakị.

² KỊNỊNYANAḄỌ ḅe ịn gbaịn tẹ ịna ḍumo koko kpaịnma ḅa; ọ̀ mịẹ tẹ in ḅioḅẹlẹ ḅa amakiri mẹ ḅụ, ori ịn kẹ gbin kuroma si kẹ ịn tọn apụ ma kụrọ pịrị ḅịa.

³ Ini obi sakị KỊNỊNYANAḄỌ ḅe ḅarasụa ịn pịrị ḅa: tẹ ori ịn saakịma tẹ ịna oju kụrọ ḅa.

⁴ À ḅẹẹm, “KỊNỊNYANAḄỌ, à si kẹ ị́ mịẹ tẹ: ọkụrụkụrụ nyana ị̀ pịrị tẹ ị̀ gwọ.”

⁵ Si kẹ ị̀ tọn apụ ma si-aị, si-aị ḍukoarị ì gbolomaye ḅụ. In ḅiiarị à fịị tẹ tomi ị̀ kẹ ḅioḅọrọma.

⁶ Ì obi kiri mẹ ḅụ ị̀ ẹrị ḅẹ ḅoarị apụ ma ịn karakara tẹmẹ kẹ ḅo-a; ini ì gboloma si-aị ḍọkị mu ḍuko-ḍuko ama-kanarị.

⁷ Ì ḍiki-ḅioḅuarị apụ mamgba ị̀ kẹ jụmọ-jụmọ na fiearị: si tẹịn ye mie ịn kẹ ị̀ tọmarị.

⁸ Ini mẹẹ, “Ọ̀ fịị ḅẹ obi kọn-arị; ori obi iḅila mẹ ọgọnọ gbala-gbala ò jen kẹ saakị ḅịa.”

⁹ Ị̀ iḅi tẹịn ikiaḅọ ḅe, tẹ à kẹ ḅiokpọma tẹịn ḅọ ḅe, ị̀ na ị̀ fịye fị-fị ḅọ ḅe sọ, pịkị tẹ ị̀ na tụḅụrụ tẹẹ.

¹⁰ KỊNỊNYANAḄỌ, ọkụrụkụrụ nyana ị̀ pịrị, tẹ ị̀ saakịma tẹ ì oju kụrọ anịsakị à si kẹ ị̀ tọn apụ ma kẹ ị̀ mịẹ ye mẹ ḅẹ gbẹẹfị ḅii ḅa.

¹¹ Ini ị̀ nẹngịma ḅịa: anịsakị à nimi ḅa mịnẹ ị̀ mịẹ ye ị́ ḅụụ-ḅẹlẹ arị.

¹² Ị́ ḅarasụa ị̀ pịrị ḅa, à kuraye mịẹarị ẹrẹsị: ị́ ị̀ kẹ ị́ tọrọkọ wẹrị mu ḅẹẹ-sakị ḅẹẹ-sakị la ḅa.

¹³ KỊNỊNYANAḄỌ ḅe tokinii, Izirẹlịapụ tẹkẹarị Tamụnọ ḅe! Ò tokinii, mịọkụ na pịkị ḅẹẹ-sakị ḅẹẹ-sakị na ḅụ! Amẹnị! Amẹnị!