Devidi-Anume 40 - FỊAFỊA BAỊBỤLỤ

Tamụnọ Tokini Nume

¹ Àrị inema tẹ KỊNỊNYANAḄỌ ḅe korum, ọ̀ ḅarasụa ị̀ pịrị ḅẹ ḅara: Anịtẹso ori ì poki tẹ ì owu naam.

² Ori ị̀ nụnụ pakama-ḅom si opou mẹ ḅio, ḅụọ sọ-mu kụrọ kiri la-laa onwin mẹ ḅio: ọ̀ nwẹnị ye ḅụụ la-a ḅara kẹ ị̀ kẹ ịkụ ọgọnọ sịẹma, tẹ nwẹnị ye ḅarị ị̀ la ḅịa ḅara kẹ ị̀ wẹrị.

³ Ọ̀ nwẹnị ịwọ nume kẹ ì toluma, kẹ wamịna Tamụnọ ḅe tokini ḅe nume: Anị ẹrịapụ-ẹrịapụ kẹ elekima sụa ḅa, tẹ KỊNỊNYANAḄỌ ḅe kẹ ḅiokpọma ḅa.

⁴ Ḅioḅẹlẹ sime KỊNỊNYANAḄỌ ḅe kẹ ḅiokpọmarị apụ ma pịrịm, anie pịkị oru-afụḅara dama-mua apụ ma anịanịa papaa aị kẹ Tamụnọ sọma tẹ sunsin pịrịarị apụ ma ḅụ sọ-a apụ ma.

⁵ Yei KỊNỊNYANAḄỌ, wamịna Tamụnọ, ị̀ mịẹ wa pịrị tẹ aị ḅakam, ị́ kịka gbọrụḅọ-sọ ofori: ḅụụ-buama tọnwa aị ị́ nwẹn mịẹ wa pịrị ḅẹ tẹ tọn wẹrị wararị. Gbala-gbala àrị inetẹ arịmgba gotẹ fama ḅịa, arịḅẹ kịẹn-ḅịḅị ḅakam!

⁶ Ị́ agba mịẹ-mịẹ ị́ pịrị na, ḍiepịrị-aị na ḅii-a; bebe ḅara kẹ agba mịẹ anga ḅụ dọkịma ị̀ pịrị ḅẹ anama sọ í ḅii-a; anịanịa si siin ḅẹ agba mịẹ-mịẹ ị́ pịrị; anie nakara í ḅeri kẹ ị̀ pịrị tẹ à kẹ ị́ naa,

⁷ anie ḅụ à pakịrịm, “Mie yẹrịị; í ì tolumarị à mịẹ ḅẹ aị ma Oloko ḍiri mẹ ḅio emi.

⁸ Ị̀ Tamụnọ, àrị ị́ ḅụụ-ḅẹlẹ ye mịẹ mẹ ḅẹlẹmarị! Í tolumaye mẹ à kẹ ì ḅioḅẹngbọ koko wararị.”

⁹ KỊNỊNYANAḄỌ, ị́ atomi mamgba kobiri wararị anga ḅụ, àrị ị́ wa ḅọrọmarị mẹ ḅẹ iḅi-oku mẹ ḍukom: Í nimi wararị mịnẹ anị ḍuko mẹ ḅụ gbala-gbala à sịkọpẹlẹ ḅịa.

¹⁰ Amụ à ḅọrọma oku mẹ kẹ koko ị̀ ḅụụ wẹrịma-a; sakị mamgba ḅioḅẹngbọ kẹ ị́ ḅụụ gbana na-iḅim mẹ na ị́ ḅarasụa mẹ na à ḍuko tẹ. Ị́ atomi mamgba kobiri wararị anga ḅụ amụ à gbọsime-a, í sime iḅi ḅara mẹ na í kuno-a ḅẹlẹma na gbolomaye ḅụ.

¹¹ KỊNỊNYANAḄỌ, à nimi wararị mịnẹ ọkụrụkụrụ nyana ị̀ pịrịm gbala-gbala Ị́ dasịẹma ḅịa. Ị́ ḅẹlẹma na ị́ kẹ ị́ atomi ma na sime iḅi ḅara mẹ na sakị mamgba ì koko kpaịnma ḅa.

Tamụnọ ḅarasụa ḅii Tẹkẹ

¹² Tọnwa ḅụụ-fụka ì gbori-ikelema wararị kịẹnkịẹn-ọkụ-ofori. Ị̀ asi ma ì kun sịẹma tẹ, tẹ à ḅarị inetẹ ye ẹrị-a; arịḅẹ kịẹn-ḅịḅị ị̀ sịḅị-ḅẹ-inume kịẹn ḅịḅị nẹngịm, tẹ tẹmẹ ḅarị ị̀ ḅụ ofori.

¹³ KỊNỊNYANAḄỌ, sisi ị̀ ḅọrọma-a! Mịọkụ, mịọkụ ḅarasụa ị̀ pịrị!

¹⁴ Yee owu gbọrsịḅị ị̀ ḅaa ḅẹ ḍọkịarị apụ ma ḅara si fama, tẹ in pikiri-pikiri. Yee à ḅụụ-fụka daarị mẹ gotẹ ḅioḅẹlẹarị apụ ma pịkị ọḅụ da tẹ ḅụụ-jịrị.

¹⁵ Yee ì sulearị apụ ma owu ịna ḅara siye ḅẹ ḅụụ-ḅalaḅala nyana.

¹⁶ Yee ị́ ḍọkụma-ḅoarị apụ mamgba ḅioḅẹlẹ tẹ ḍereku. Yee inweni-mgba ị́ kẹ kịnị ḅọrọmarị ye mẹ gotẹ ịmịẹtẹ kẹ ị́ ḅẹ tẹ sakị mamgba ḅẹ, “KỊNỊNYANAḄỌ ḅe ḍụḅa la ḅara ḍikii!”

¹⁷ Yei KỊNỊNYANAḄỌ, à kụrọ-a, yẹrị pịkị igoinḅọ, kụma amụ ị́ ị̀ kẹ ḅioḅọrọma-a. Ị́yẹrị anie ị̀ ḅọrọmarị ḅọ, pịkị ị̀ Tamụnọ; sarasarama ḅo ḅarasụa ị̀ pịrịị!