Devidi-Anume 38 - FỊAFỊA BAỊBỤLỤ

Tọrụsiẹrịarị Tomḅọ Kọn Tẹkẹ

¹ Yei KỊNỊNYANAḄỌ, ị́ ịganị ḅụ fomu-ḅara kẹ ị̀ pịrị ma.

² Ị́ kẹ ị̀ tẹịn aḍịẹịn ma ye kẹ ị̀ lama tẹ; ị́ ì fomu kiri gbin tẹ.

³ Ị́ ịganị mịẹ tẹ arị opuma akụye daarị; obi ì bebe oju mẹ gbaịn tẹ ị̀ asi ma gotẹ.

⁴ Ị̀ asi dogi-ḅo opu minji mẹ ì sonbiarị: arị àrị inetẹ dogi ḅịa ikuye sọ ị̀ pịrị tẹ.

⁵ À sọ oḅori ẹrẹsị, ì oju ḅẹ ịnọ ma ḅụrụ tẹ fụrụarị.

⁶ Àrị iḅoma tẹẹ, à kọsị tẹẹ; bebe ene mamgba ḅụ à ḍụẹịn-ḍuuḅọ kururu ḅara kururuarị.

⁷ Akọm mịẹ tẹ gbala à fịnị ḅio dọkịarị: tẹ ịnyọ biin kịngẹ ị̀ ḅara kọnm.

⁸ Ị̀ ḅụụ ḅio ịnyọ gbọrụmgbọ-sọ ḅarị ofori, à kọsị fa tẹ: ì ḅioḅẹngbọ si tẹ, tẹ àrị akụye ḅẹ iningi kọn-arị.

⁹ Yei KỊNỊNYANAḄỌ, ị̀ tẹmẹ ịgbanịarị ye í nimi wararị; à kọn-arị iningi mẹ ị́ naa wararị.

¹⁰ Ì ḅioḅẹngbọ kpim-kpim-kpim-arị, ị̀ ḅụụ ḅio ịnyọ fa tẹ; tẹ ị̀ atọrụngbọ ḅarị banabanama ye ẹrị-a.

¹¹ Ì ikiapụ na ị̀ na kpekitẹ anga apụ na ḅarị ḅo ì kpeki ḅịa, ị̀ ḅụụ ḅẹ ịnọ ma ẹrẹsị; ị̀ warị ḅẹ apụ kịngẹ sọ à sime anga ḅụ wẹrị ḅelemarị.

¹² Ị̀ ḅaa ḅẹ-ḅiiarị apụ ḍiein tuu, tuu ị̀ pịrịarị, tẹ ye kẹ ị̀ lama ḅẹ-ḅiiarị apụ ẹrẹmarị ini ị̀ fama ḅẹ ḅara; ḅẹrẹ-ḅiya ị̀ pịrị ḅụ gbala-gbala in kunoma nyana-a.

¹³ Ḅeri-iningiḅọ mie à kịkarị, oḅu tẹ inetẹ ẹkwẹn-a ḅọ mie à kịkarị.

¹⁴ Ye pakịrị-pakrị-a ḅọ mie à kịkarị: ori inetẹ ye naa-a ẹrẹsị.

¹⁵ Kụma mie à kẹ ḅiokpọmarị, Yei KỊNỊNYANAḄỌ; tẹ, Yei KỊNỊNYANAḄỌ, ị̀ Tamụnọ, ị̀ pakịrị ḅa.

¹⁶ Ḍụkụ tẹ si kẹ ị̀ tọn apụ ma ị̀ ḅụụ-fụka mẹ gotẹ ì ḍikiḍiki tẹ ḅioḅẹlẹ ma; ḍụkụ tẹ à ḅịkị koro tẹ ini anị kẹ ḅụụ boma ma.

¹⁷ À ḅịkị ḅẹ-yearị; tẹ kuno-a ḅara kẹ akụye daarị.

¹⁸ Àrị ị̀ asi ḍuko-pakamarị; arị ḅụụ-ḅalaḅala kẹ ị̀ pịrịarị.

¹⁹ Si kẹ ị̀ tọn-arị apụ ma ịna oju iḅi wararị, ịn pịkị kụrọ wararị; à mịẹ ye ofori tẹ ì ḍiki-ḅioḅuarị apụ ḅakam.

²⁰ Si kẹ iḅi gbarị apụ ma ị̀ na tụḅụrụarị à ḅụụkụrọma tẹ kuraye mịẹarị ẹrẹsị.

²¹ Yei KỊNỊNYANAḄỌ, ị̀ kẹ gbin kuroma so ma; ị̀ Tamụnọ, ị̀ ḅụ ḅelema.

²² Ḅarasụa ị̀ pịrịị mịọkụ, Yei KỊNỊNYANAḄỌ, ị̀ ḅọrọmaḅọ!