Devidi-Anume 36 - FỊAFỊA BAỊBỤLỤ

¹ Si-sịḅịḅio-sụa tomḅọ ḅe ḅioḅẹngbọ suku-ḅio ḅụ si ẹkwẹn ọ̀ pịrịarị: ọ̀ Tamụnọ sịkị tẹ gbọrụ kụn sọ kẹ ọ̀ pịrị-a.

² Ọ̀ kpọma ḅụụ-gelema ḅara kẹ ḅẹrẹ kuromarị ẹrẹsị: ori ọkịarị mịnẹ Tamụnọ ò si ḍọkị pakama-ḅo tẹ anị si ḅara ḍuko ḅịa.

³ Si sịḅịḅio ẹkwẹn mie ori ẹkwẹn-arị, anị ḅio pịkị iruo aị, iruo-aị iruo-aị famam; gbọrụ sakị sọ ọ̀ ḅarị iḅiye na nimi nyana ye na mịẹ-a.

⁴ Ori iḅila ọgọnọ ḅọlọlọ wararị sakị ọ̀ mịẹ ḅẹ siye mie ò kuromarị; ori mịẹarị ye tẹ iḅi gberie-sọ ofori, tẹ gbala-gbala siye nwẹn-sịn ye tẹ ọ̀ sịkịarị ye ofori.

Tamụnọ Iḅi Mẹ

⁵ KỊNỊNYANAḄỌ, í kuno-a ḅẹlẹma mẹ mu So-ḅio ma laarị; ḅioḅẹngbọ kẹ ị́ ḅụụ gbana na-iḅim mẹ So-tọrụ ma laarị.

⁶ Ị́ karakara mịẹ mẹ gele tụndụ ma iwo fa ḅara gele wararị: ị́ kịnị mingirima-a mịẹ ye mẹ opu tọrụ ḅụ owolo pokolo ḅara pokolo wararị, tẹ tomi na nama na in kokoarị.

⁷ Yei Tamụnọ, í kuno-a ḅẹlẹma mẹ kpọma yelam! Ị́ ị́ apamba kẹ wa gbaịn-arị.

⁸ Í opu ḅara kẹ tan, tan wa pịrịarị afịaị ma mie wa kẹ alalị fị apụ ye fị ḅara fịarị: í minini wa pịrị tẹ wa í iḅi mẹ kẹ tọrụ-minji ḅẹ minji sọma tẹ ḅuuarị.

⁹ Ị́ ḅụ mie ḍumo mẹmgba saakị paka-ḅoarị: tẹ í bele ḅụ mie wa ḅọrọ tẹ bele ẹrịarị.

¹⁰ Paa í nimi apụ ma ḅẹlẹma tọrọkọ, tọrọkọ muu: tẹ iḅi kẹ karakaraye-mịẹapụ mị.

¹¹ Ḍụkụ tẹ ḅụụ-gelema atomi ma owu kẹ ị̀ pakama: anịanịa si-sịḅịḅio-sụapụ ma mịẹ tẹ à mangị-so.

¹² Si atomi ma ḅịkị wararị anga ḍiki. Ini anịanga gbin koro-simearị, tẹ inetẹ saakị-a.