Devidi-Anume 34 - FỊAFỊA BAỊBỤLỤ

Kẹ Tamụnọ Iḅi Tokiniarị Nume

¹ Sakị mamgba àrị ịmịẹtẹ kẹ KỊNỊNYANAḄỌ ḅe ḅẹẹ ḅa: ò tokini ḅụ gbala-gbala à kunoma ḅịa.

² Àrị ọ̀ kọrị tẹ ye gotẹ ò tokini ḅa: yee tomi ponomarị apụ mamgba poki tẹ ḅioḅẹlẹ!

³ Ị̀ na sọ tẹ KỊNỊNYANAḄỌ ḅe opu ḍuko wasamaa: ò yee wa ori ẹrẹ tokini gboloma!

⁴ À KỊNỊNYANAḄỌ ḅe tẹkẹm, tẹ ori ị̀ pakịrịm: ị̀ ḅalafamarị aị mamgba ḅio ori ị̀ pakama-ḅom.

⁵ Tomi ponomarị apụ ma ori mie ịn tọrụ pịkị da tẹ ḅioḅẹlẹarị; gbala-gbala ịn papaa ḅara ọlọ ḅịa.

⁶ Ḅarasụa pịrị ḅọ nyana-a apụ ma Ọ̀ sịn tẹ ori ịn pakịrịarị: ịna ḅụụ-fụka mamgba ḅio ori ịn ḅọrọmarị.

⁷ KỊNỊNYANAḄỌ ḅe ḅịḅị pokiarị apụ ma ori enjẹlị in ḍikiḍikiarị: tẹ ye kẹ ịn lama ḅẹ ye ḅio ịn pụkọ-pakamaḅoarị.

⁸ Ḅarana KỊNỊNYANAḄỌ ḅe iḅi la ḅara ḍọkị-nimi; ye ḅofa ịn la gotẹ ḅụụ kẹ ọ̀ ḅarasụa apụ ma ḅioḅẹlẹ sime ịn pịrịm.

⁹ Ọmịnị ori atomi mamgba, ọ́ KỊNỊNYANAḄỌ ḅe ḅịḅị pokii! Ọ̀ ḅịḅị pokiarị apụ ma ịna ḅụụ-fụkamarị aị mamgba nyanarị.

¹⁰ Ọkụkụ ma sọ fị ḅẹ ye nyana-a tẹ ḅuru ịn tarịarị: kụma KỊNỊNYANAḄỌ ḅe ḅịḅị pokiarị apụ ma iḅiye tẹ ịn nyana ḅịa ye ofori.

¹¹ Ì ikiapụ, asambịrịma apụ, ó ḅoo, tẹ ì pokii: à KỊNỊNYANAḄỌ ḅe kụn-kụn ḅara kẹ ó toluma ḅa.

¹² Í ḅiiarị í ḍumo ḅụ tọrụ-ḅẹlẹ nyana? Í ḅiiarị ị́ nangwọ ḍumo na ḅioḅẹlẹ na nyana?

¹³ Ọkọ ḅẹḅẹ si ẹkwẹn kọnma: pịkị iruo aị ḍuko ma.

¹⁴ Ọḅụ pịkị siye gbin tẹ iḅiye mị: ḅụụkụrọma tẹ í ḅioḅẹngbọ mamgba kẹ dein ḍọkịị.

¹⁵ KỊNỊNYANAḄỌ ḅe tọrụ kẹ karakaraye-mịẹapụ ma ọgọnọ gbanarị, tẹ ịn kọn-arị owu ma ọ̀ naarị;

¹⁶ kụma ò siye-mịẹapụ ma na tụḅụrụarị: mịẹ tẹ ịn fịị sakị kịnị sarasarama ịn kẹ ḅioḅọrọma ḅarị ḅara.

¹⁷ Karakaraye-mịẹapụ ma KỊNỊNYANAḄỌ ḅe tẹkẹ tẹ ori ịna tẹkẹ naarị; ịna ḅụụ-fụka mamgba ḅio ori ịn pụkọ-pakamaḅoarị.

¹⁸ KỊNỊNYANAḄỌ ḅe ḅioḅẹngbọ lọkọ tẹ apụ ma na kpeki wararị: ḅarị gbọrụ ḅiokpọ sọ nyana-a apụ ma ori ịn ḅọrọmarị.

¹⁹ Iḅi tomḅọ ḅe tọnwa atọrụsiẹrị na ḅụụ-fụka na daarị: kụma KỊNỊNYANAḄỌ ḅe arịmgba ḅụ ọ̀ ḅọrọmarị;

²⁰ KỊNỊNYANAḄỌ ḅe gbọrsịḅị ọ̀ koko kpaịnmarị: ori mgbe ma ḅụ gberie-sọ anyịma-a.

²¹ Siye mie si-sịḅịḅio-sụaḅọ ḅe ḅaa ḅarịye: karakaraye-mịẹapụ ma ḍiki-ḅioḅuarị apụ ma, fomu-ḅara ịn la ḅa.

²² KỊNỊNYANAḄỌ ḅe ori atomi ḅọrọma ḅa: ori ịn gbaịn gotẹ ọ̀ ḍọkụma-muarị apụ ma, ọ̀ ḍụkụ tẹ ye ịn la ḅịa.