Devidi-Anume 31 - FỊAFỊA BAỊBỤLỤ

Tamụnọ Kẹ Ḅiokpọma Tẹkẹ

¹ KỊNỊNYANAḄỌ, àrị ị́ ḍọkụma-ḅo tẹ, ị́ ị̀ gbaịntẹ ye ị̀ la ḅịa ḅara, gbala-gbala ḍụkụ tẹ owu ị̀ ḅara si ma; Ị́yẹrị anie karakara mịẹarị Tamụnọ; àrị ị́ tẹkẹm, ị̀ ḅọrọma-a.

² Ị̀ naa; mịọkụ, mịọkụ ị̀ ḅọrọma-a, ị̀ kụrọnị-anga sọ, tẹ ị̀ gbaịn, ị̀ ḍụa, tẹ ị̀ ḅọrọma-a.

³ Ị́yẹrị anie ị̀ kụrọnị-anga na ị̀ ḍụa anga na; í minini tẹ ḅara ḅụ, ị̀ datụkụma tẹ ị̀ tọrọkọ-sụn.

⁴ Ḍụkụ tẹ àrị in tuu ị̀ pịrị ḍiein mẹ ḅio koro ma; ye kẹ ị̀ lama ḅẹ ye ḅụ ì kikimaa.

⁵ Àrị ị̀ ḅụụ kẹ ị́ ḅara-ḅio sụarị; KỊNỊNYANAḄỌ, ị́ ị̀ ḅọrọma ḅa, anie ḅioḅẹngbọ-kẹ-sịrẹrẹ-niḅi Tamụnọ.

⁶ Í sunsin oru pịrịarị apụ ḍiki ḅioḅuarị, kụma yẹrị àrị ị́ kẹ ḅiokpọmarị.

⁷ Í kuno-a ḅẹlẹma mẹ gotẹ, à ḅioḅẹlẹ tẹ ḍereku ḅa. Ị́ ị̀ tọrụsiẹrị mẹ ẹrịarị; ị́ ị̀ ḅụụ-fụka mẹ nimi wararị.

⁸ Amụ ị́ ḍụkụ tẹ si kẹ ị̀ tọn apụ ma ì kun ọkị-a: í kiri foofoma ị̀ pịrị tẹ àrị ì ḅiotọn anga, tọn anga mẹnjịarị.

⁹ À ḅụụ-fụka ḅio emi ẹrẹsị, KỊNỊNYANAḄỌ, ì ḍiki tọrụ-kụrụkụrụ; arị owu nwenii ịnyọ ị̀ atọrụngbọ ḅẹ meni mẹ ta tẹ; gbọrụ ịnyọ sọ ḅarị ị̀ ḅụụ ḅio ofori.

¹⁰ Kururu ị̀ ḅaa tẹẹ, tẹ owu ì ḍumo kpụlụma tẹẹ. Ị̀ ḅụụ-fụka mamgba ḅụ ị̀ ḅụụ lọkọ tẹẹ; ị̀ mgbe ma sọ ḅarị ḍumo wararị ḅara sime-a.

¹¹ Si kẹ ị̀ tọn apụ mamgba, karakaramatẹ ị̀ na kpeki tẹ anga apụ ma, ì ḍiki iderimarị: ì nimi wararị apụ ị̀ ẹrị tẹ ḅalafaarị; etela ḅụ ini ị̀ ẹrị kụma, ini ị̀ ḅụ mangị sikimarị.

¹² Ḅẹḅọ-ḅẹḅọ ị̀ kẹ ḅioḅọrọma tẹ, gbala à fịị tẹ ye ọkụ; à kịkarị ye tomi kẹ sara ọgọnọ wakị nguma tẹ ye.

¹³ À naarị, si kẹ ị̀ tọn tọn apụ ma kẹlẹkẹlẹ ẹkwẹn-arị; opuma ḅalafamarị apụ ì gbori ikelema-koro wararị: ini ì gotẹ ḅẹrẹ-ḅiyarị, in ḅịyarị ị̀ ḅaa ḅẹ ḅara.

¹⁴ Kụma, Yei KỊNỊNYANAḄỌ, mie à kẹ ḅiokpọmarị; anie ị̀ Tamụnọ.

¹⁵ Sakị mamgba í ḍikiḍiki ḅara-ḅio àrị emi; si kẹ ị̀ tọn apụ ma ḅara-ḅio ị̀ ḅọrọma-a, ị̀ ḅaa ḅẹ ḍọkịarị apụ ma ḅara-ḅio.

¹⁶ Iḅi tọrụ kẹ ị́ fịrịmẹnjịḅọ ḍikii: í kuno-a ḅẹlẹma mẹ ḅụ ị̀ ḅọrọma-a.

¹⁷ KỊNỊNYANAḄỌ, àrị ị́ sịn-arị; ḍụkụ tẹ ị̀ tọrụ tuuma. Yee si-sịḅịḅio-sụapụ ma rẹ tọrụ-tuu; yee in ḅịḅị kpopu tẹ ideri ḍuḅu ḅio mu.

¹⁸ Arị iruo-apụ ma aḅịḅị gbaịịn! — ini ḅụụ-gelemarị apụ ma na opu ẹkwẹn kọn-arị apụ ma na, tẹ ḍiki-sima ḅara kẹ karakaraye-mịẹapụ ma ḅụ ẹkwẹn-arị apụ ma.

¹⁹ Ị́ kụn-arị apụ ma ị́ tẹlẹma ịn wẹrịma ḅụụ-gbiripuma iḅi aị ḅakam! Ḅẹḅọ-ḅẹḅọ í iḅi ḅara nimi wararị, ị́ wẹrịtẹ gberie-sọ ḅụụ la-a ḅara kẹ ị́ kẹ ḅiokpọmapụ ma gbaịn-arị ḅara mẹ.

²⁰ Ị́ tọrọkọ ye ịn la ḅịa anga mẹ ḅụ ị́ ịn ḅọịarị, tomi ḅiya ịn pịrịarị aị ma ḅụ; ye ịn la ḅịa sịḅị-kikima-yọ ḅụ ị́ ịn ḅọịarị, si kẹ ịn tọn arị apụ kẹ in wori gulugulumarị aị ḅụ.

²¹ Ọ̀ KỊNỊNYANAḄỌ ḅe tokini! Ọ̀ ḅụụ-buama ḅara kẹ ori ị̀ ḅẹlẹma ḅara kẹ ì ḍiem, si kẹ ị̀ tọn apụ ma ḅo ì gbori tẹ owu kẹ ị̀ paka sakị!

²² Ị̀ ḅalafa tẹ à kuromam mịnẹ ori ì dee pakama tẹ ọ̀ tọrọkọ ḅụ. Kụma ori ì owu naam, àrị oloku tẹ ọ̀ ḅara ḅarasụa ḅii sakị.

²³ Ọmịnị minini nyana apụ mamgba, ọ̀ KỊNỊNYANAḄỌ ḅe ḅẹlẹmaa. KỊNỊNYANAḄỌ ḅe minini nyana apụ ma gbaịn-arị, kụma ọ̀ ḅụụ-gelema apụ ma gbẹẹ fomu-ḅara kẹ ịn pịrịarị.

²⁴ Ọ́ kụrọ sịẹsimee, tẹ ḅiokpọ nyana-a, ọmịnị-mgba tẹ KỊNỊNYANAḄỌ kẹ ḅiokpọmarị apụ.