Devidi-Anume 29 - FỊAFỊA BAỊBỤLỤ

KỊNỊNYANAḄỌ Ḅe Pọkọ Mẹ Erise Ḅio

¹ Ọmịnị So-ḅio ḅẹ apụ, ọ̀ KỊNỊNYANAḄỌ ḅe tokinii; ọmịnị ori ebube na kụrọ na tokinii.

² Ọ̀ KỊNỊNYANAḄỌ ḅe ebube nyana ẹrẹ mẹ tokinii; Fịafịa Ḅọ ḅe tolu-sịẹ sakị ọmịnị iḅoo, ọ̀ tọrọkọ.

³ Tomi KỊNỊNYANAḄỌ ḅe pọkọ mẹ naarị tọrụ minji ḅụ; ebube Tamụnọ ḅe so-alagba tẹịn-arị, tẹ ọ̀ pọkọ mẹ fie mu abajị mẹ kana-koroarị.

⁴ Kịnị KỊNỊNYANAḄỌ ḅe pọkọ mẹ naa tẹ anị ḅẹ kụrọ na ḅaka na ḅụ.

⁵ KỊNỊNYANAḄỌ ḅe pọkọ mẹ sida asịn ma anyịmarị, Lẹbanọnị ḅẹ tụndụ ḅẹ sida asịn ma sọ.

⁶ Ọ̀ mịẹ tẹ Lẹbanọnị ḅẹ tụndụ ma asambịrịma anambulo ḍosi ḅara ḍosiarị ọ̀ pịkị mịẹ tẹ Hamọnị ḅẹ tụndụ mẹ sọ asambịrịma piri-ḅio-ḅẹ pootẹ-nambulo ḍosi ḅara ḍosiarị.

⁷ KỊNỊNYANAḄỌ ḅe pọkọ mẹ mịẹ tẹ So-tọrụ mẹ ḅalapụ-ḅalapụarị.

⁸ Ọ̀ pọkọ mẹ ịkpa mẹ jikearị; ori mie Kadẹsị ḅẹ ịkpa mẹ jikearị.

⁹ KỊNỊNYANAḄỌ ḅe pọkọ mẹ oku nwẹn-sịn opu asịn ma jike tẹ arịḅẹ ịnyịnya ma siin sararị anịsakị ọ̀ Warị mẹ ḅio sime-ḅọ, sime-ḅọ olokuarị, “Ebube sime Tamụnọ pịrịm!”

¹⁰ KỊNỊNYANAḄỌ ḅe ḅẹrẹtọn opu owolo aminji ma pịrịarị, Ori ama-da mu ḅẹẹ-sakị ḅẹẹ-sakị laarị.

¹¹ KỊNỊNYANAḄỌ ḅe ịnyọ kẹ ori atomi pịrịarị tẹ dein kẹ in bomarị.