Devidi-Anume 28 - FỊAFỊA BAỊBỤLỤ

Ḅarasụa Ḅii Tẹkẹ

¹ Yei KỊNỊNYANAḄỌ, ị̀ ḍụaḅọ, àrị ị́ sịn-arị. Ị̀ owu naa! Ị́ ị̀ pakịrị-a kụma, àrị ideri Ḍuḅu ḅio muarị apụ ḅụ sọ ḅa.

² Ị̀ naa, à ḅarasụa gotẹ owu ị́ pịrị sakị, àrị ị̀ aḅara saakị ị́ fịafịa Warị mẹ daarị sakị.

³ Ị̀ kẹ si-sịḅịḅio-sụapụ ma ḅụ sụa ḅẹrẹ-ḅarasii-apụ ḅẹ ma, ini ma tẹ siye mịẹarị apụ ma: ini ma tẹ ikia ḅara kẹ ẹkwẹn-arị, kụma ḍiki-ḅioḅu ịna aḅioḅẹngbọ emi apụ ma.

⁴ Ịn mịẹ tẹ ye gotẹ fomu-ḅara kẹ ịn pịrị, ịn mịẹ tẹ siye mẹ sịḅị ẹrẹsị. Ịn mịẹ tẹ aị mamgba gotẹ in fomuu, in daa gbẹẹ fomu-ḅara kẹ ịn pịrịị!

⁵ KỊNỊNYANAḄỌ ḅe mịẹ tẹ ịn kẹ ye-sịn-arị gberie-sọ ofori, anịanịa ori tẹmẹ tẹ aị ma: ọkọẹrẹsị ori in fomu, tẹ ịn ḅaa guluguluma gbamaso ḅa.

⁶ KỊNỊNYANAḄỌ ḅe tokinii: à ḅarasụa gotẹ kọn-arị owu mẹ ọ̀ naa tẹ.

⁷ KỊNỊNYANAḄỌ ḅe ị̀ gbaịn tẹ ị̀ ḍụarị; Ori mie à kẹ ḅiokpọmarị. Ọ̀ ḅarasụa ị̀ pịrị tẹ ì ḅioḅẹlẹmarị; à ḅioḅẹlẹ anume kẹ ò tokiniarị.

⁸ KỊNỊNYANAḄỌ ḅe ori atomi kikimarị; Ori ọ̀ sẹlẹ ọkị tẹ amadaḅọ ḅe ḍụa tẹ ọ̀ ḅọrọmarị.

⁹ KỊNỊNYANAḄỌ, ị́ atomi ḅọrọma, tẹ sime ị́ pịrị apụ ma bomaa. Anana ḍikiḍiki ḅara kẹ in ḍikiḍiki, tẹ in koko mu ḅẹẹ-sakị ḅẹẹ-sakị la.