Devidi-Anume 27 - FỊAFỊA BAỊBỤLỤ

Tamụnọ Tokini Tẹkẹ

¹ KỊNỊNYANAḄỌ ḅe anie ì belee, pịkị ị̀ ḅọrọma; à gotẹ ḅalafa ḅẹ ḅọ ofori. KỊNỊNYANAḄỌ ḅe ye kẹ kịnị lama ḅẹ aị mamgba ḅụ ị̀ gbaịn-arị; gbala-gbala ị̀ ḅalafa ḅịa.

² Si atomi ì gbori tẹ ị̀ ḅaa ḅẹ ḍọkị sakị, ini rẹ pụmbụ tẹ ḅịkịm.

³ Bebe ọmụ ogbo nwẹnị ḅo ì ikelema-koro sọ, à ḅalafa ḅịa; si kẹ ị̀ tọn apụ ma ḅo ị̀ la tẹ owu kẹ ị̀ paka sọ, à paa Tamụnọ kẹ ḅiokpọma ḅa.

⁴ À KỊNỊNYANAḄỌ ḅe ḅara ḅụ gberie ḅii tẹ; anị kpọkpọ gberie mẹ mie arị ịgbanịarị: anie, ì ḍumo-ene mamgba kẹ KỊNỊNYANAḄỌ ḅe warị mẹ ḅio anga, anị yọ ḅụ ori iḅi ḍikiḍiki ḅụ ḅụụ-bua, tẹ ọ̀ ḅara datụkụma ḅii.

⁵ Ḅụụ-fụka sakị ḅụ ori ị̀ sịḅị kikima ḅa; ori ị̀ kẹ ọ̀ warị ḅio koko kpaịnma ḅa tẹ ị̀ kẹ geletẹ, ye ḅo ị̀ la ḅịa ịkụ ọgọnọ-jụ ḅio gbana ḅa.

⁶ Mie ḅụ à si kẹ ị̀ tọn-arị tẹ ì ikelema-koro wararị apụ ma nẹngịma ḅa. À ḅioḅẹlẹma oloku kọn agba mịẹ KỊNỊNYANAḄỌ ḅe pịrị ḅa ọ̀ Warị ḅio, à nume-su ḅa, à KỊNỊNYANAḄỌ ḅe tokini ḅa.

⁷ KỊNỊNYANAḄỌ, àrị ị́ sịn sakị ị̀ naa! Ì ḍiki tọrụ-kụrụkụrụ tẹ ị̀ ḅịḅị ọkị!

⁸ Ị́ “Ḅo sunsin ị̀ pịrịị” ḅẹẹ sakị: à pakịrịm, “KỊNỊNYANAḄỌ, à ḅo ḅa.”

⁹ Ị́ ḅụụ ḅọị ị̀ pịrị ma! Ịganị nyana ị̀ pịrị ma; ị́ fịrịmẹnjịḅọ ḅe dee ma. Anie anịngẹ-kụraḅio ị́ ḅarasụa pịrịarị ḅọ ḅe; ị̀ wẹrịso ma, ị̀ kẹ gbin-koroma so ma, Yei Tamụnọ, ị̀ ḅọrọma ḅọ.

¹⁰ Ị̀ ḍa na ì iyingi na ị̀ kẹ gbin-koroma so ḅa ịna ḅụụ ḅẹlẹ-ḅẹlẹ, kụma KỊNỊNYANAḄỌ ḅe ì ḍikiḍiki ḅa.

¹¹ KỊNỊNYANAḄỌ, í ḅiiarị à mịẹ nwẹn ḅẹẹ ye kẹ ì toluma, tẹ ye ị̀ la ḅịa etela ḅụ ị̀ tọrọkọ-sụn mu, si kẹ ị̀ tọn-arị apụ ḅakam ẹrẹsị.

¹² Ị̀ kẹ gbin-koroma so si kẹ ị̀ tọn-arị apụ ma pịrị ma: anie iruo-aị na ẹrẹma aị na kẹ owu kẹ ị̀ pakarị apụ ma.

¹³ À nimi wararị à ḍumo sime tẹ KỊNỊNYANAḄỌ ḅe iḅi mẹ ẹrị ḅa: mịẹ ḍumo sakị mẹ ḅụ.

¹⁴ KỊNỊNYANAḄỌ ḅe kẹ ḅiokpọmaa. Ò mininii, ḅioḅẹngbọ ḅịkị ma. KỊNỊNYANAḄỌ ḅe kẹ ḅiokpọmaa.