Devidi-Anume 26 - FỊAFỊA BAỊBỤLỤ

Iḅi Tomḅọ Kọn-arị Tẹkẹ

¹ Yei KỊNỊNYANAḄỌ, à mie si ofori mẹ mịẹ tẹ kịnị nimi, à kụra ye mịẹarị ẹrẹsị, tẹ à pịkị ị́ kẹ ḅiokpọma fama wararị.

² KỊNỊNYANAḄỌ, ì pekele-ḍikii, pịkị ị̀ tọn ḍikii, ị̀ tẹmẹ ịgbanịarị aị na ị̀ akuroma na kọn.

³ Í kuno-a ḅẹlẹma ị̀ datụkụmarị, ḅioḅẹngbọ kẹ ị́ ḅụụ ḅụ gbana na-iḅim mẹ nwẹnị sakị mamgba ị̀ tọrọkọ-sụn-arị.

⁴ À papaa atomi na mẹnjị-a, à mịẹ kịnị ḍie atomi na mịẹ ye nyana-a.

⁵ À si-atomi ma ogbo mẹ ḍiki-ḅioḅuarị, tẹ si-sịḅịḅio-sụapụ ma kọkọrọarị.

⁶ KỊNỊNYANAḄỌ, ma ị̀ maa ḅara, à mịẹ ye ofori; tẹ sunsin ị́ pịrị ḅụ mẹnjị-mẹnjị ị́ agba mịẹ anga mẹ ikelemarị.

⁷ Àrị ịmịẹtẹ ḅẹ nume-suarị tẹ ị́ ḅụụ-buama amịẹaị mamgba ḍuko pakamarị.

⁸ Yei KỊNỊNYANAḄỌ, àrị ị́ angarị warị mẹ ḅẹlẹmarị, í ebube simearị yọ mẹ.

⁹ Ị̀ kẹ si-mịẹapụ ma na sụa ḅaa guluguluma ma; ḅo kịnị ḅaa apụ ma la ḅẹ si-so mẹ ḅụ ị̀ wẹrị ḅelemaa;

¹⁰ si mịẹarị atomi ma sakị mamgba ịn tẹlẹma sime wararị ini ọḅụ-fị.

¹¹ Yẹrị kịngẹ kụma, kuraye mie à mịẹarị; ì ḍiki tọrụ-kụrụkụrụ tẹ ị̀ ḅọrọma!

¹² Ye kẹ ị̀ lama ḅẹ gberie-sọ ḅarị ofori; KỊNỊNYANAḄỌ ḅe atomi ma kobiri wararị anga mẹ ḅụ àrị ò tokini ḅa.