Devidi-Anume 24 - FỊAFỊA BAỊBỤLỤ

Ama-da Opuḅọ ḅe

¹ Tomikiri mẹ na anị ḅio sime aị mamgba na sime KỊNỊNYANAḄỌ ḅe pịrịm; kiri mẹ na anị ọgọnọ angarị aị mamgba na ò nye.

² Ori anị nama pakama-ḅom kiri suku-ḅio simearị owolo mẹ ḅio tẹ abajị-wolowolo mẹ ḅio anị ḅẹ suku-saakịm.

³ Iwo KỊNỊNYANAḄỌ ḅe tụndụ mẹ mu kụrọ nyanaḅọ tụḅọ? Tụḅọ ọ̀ fịafịa Warị mẹ sọ-mu ḍọkị ḅẹ?

⁴ Ini ma tẹ ye-mịẹ-ḅara na kuroma na ḅụ kpaịn wararị apụ ma; sunsin oru pịrị-a, anịanịa iruo ḅara kẹ ye minini kịnị pịrị-a apụ ma.

⁵ KỊNỊNYANAḄỌ ḅe in boma tẹ ịn ḅọrọma ḅa; Tamụnọ ḍuko pakama ḅa mịnẹ ịn mịẹ ye ofori.

⁶ Ọkọ sime apụ mie Tamụnọ ḍọkụma-ḅoarị, ọkọ sime apụ mie Jekọbụ Tamụnọ ḅe tọrọkọ laarị.

⁷ Ogigo-aḅọkọ ma finji sara-a, elemu sakị kụra-ḅio ḅẹ aḅọkọ ma finji, tẹ Ama-da Opuḅọ ḅe sọ ḅo.

⁸ Nwẹn ḅẹ Ama-da Opuḅọ ḅe ḅọrọ tụḅọ? KỊNỊNYANAḄỌ ḅe ori, kụrọ na opu na KỊNỊNYANAḄỌ, ọmụ ḅara si-si-a ḅọ.

⁹ Ogigo-aḅọkọ ma finji sara-a, elemu sakị kụra-ḅio ḅẹ aḅọkọ ma, tẹ Ama-da Opuḅọ ḅe sọ ḅo.

¹⁰ Nwẹn ḅẹ Ama-da Opuḅọ ḅe ḅọrọ tụḅọ? KỊNỊNYANAḄỌ, owu-ḅara-iḅi tẹ ọmụ-alaḅọ ḅe; ori anie Ama-da Opuḅọ ḅe.