Devidi-Anume 22 - FỊAFỊA BAỊBỤLỤ

Akụye Da Lamarị ḅọ Kọn Owu Na Ọ̀ Kẹ Tamụnọ Tokini Nume Na

¹ Ị̀ Tamụnọ, Ị̀ Tamụnọ, tiye ẹrẹsị ị́ ị̀ kẹ gbin kuroma tẹ so? À ḅarasụa gotẹ owu sịnịsịnịm, anịsọ ḅarasụa ḅo-a.

² Ị̀ Tamụnọ, eneḅaka ḅụ àrị ị́ sịn-arị, kụma ị́ ḅịḅị fie-a; ḍin ḅụ àrị ị́ sịn-arị, tẹ mono ị̀ tọrụ sọ-a.

³ Kụma ị́ í emine ọgọnọ yaụ-sime wararị, Fịafịa Ḅọ ḅara ḅụ, Izirẹlị tokiniarị ḅọ.

⁴ Wamịna elemu aḍapụ ma ị́ kẹ ḅiokpọmam: ini ị́ kẹ ḅiokpọma ye ḅụ ị́ ịn ḅọrọmam.

⁵ Ini ị́ sịn tẹ ye kẹ ịn lama ḅẹ ye ḅara-ḅio pụkọ-pakaḅom. Ini ị́ kẹ ḅiokpọmam, tẹ ị́ in pikirima-a.

⁶ Kụma yẹrị ḅarị tomḅọ-a; atangbalịgbalịḅa mie à kịkarị ye, ḅẹḅọ-ḅẹḅọ ḍiki-sima tẹ kẹ ye-sịn-a ḅọ!

⁷ Ị̀ ẹrị apụ mamgba ị̀ kẹ tii-tiiye sọmarị; ini ịna aḅẹlẹ sukuruma pakama ị̀ da tẹ sịḅị jikearị.

⁸ Ini mẹẹ, “Ị́ kọkọ KỊNỊNYANAḄỌ ḅe ḅụ sịrẹrẹ sime, tiye ẹrẹsị ori ị́ ḅọrọma-a? Ị́ mịẹ ye KỊNỊNYANAḄỌ ḅe ḅụụ-ḅẹlẹ arị kụma, tiye ẹrẹsị ọ̀ ḅarasụa ị́ pịrị-a?”

⁹ Ị́yẹrị mịẹ tẹ ì iyingi deinma ì iyi pakama-ḅom: tẹ ị̀ kala-sakị ị́ ì koko kpaịnmam.

¹⁰ Àrị iyi paka-ḅo ene kụra-ḅio àrị ị́ ḅụụ sịrẹrẹm, sakị mamgba pịkị ị̀ Tamụnọ.

¹¹ Ị̀ ḅụụ ḅelema! Ḅụụ-fụka ị̀ na emi, tẹ ḅarasụa ị̀ pịrị ḅẹ jụmọ ofori.

¹² Si kẹ ị̀ tọn-arị apụ ḅakam, ịn nambulo kịka tẹ ì gbori-ikelema wararị; Basani ama ḅụ ḅo ḅalafamarị anambulo ma mie ịn kịkarị.

¹³ Ini ọkụkụ ḅịḅị finji ḅara kẹ ịna aḅịḅị finji tẹ: oloku-oloku ị̀ daarị, ị̀ kanị pẹị ḅẹ ọkụ.

¹⁴ Ịnyọ ị̀ ḅụụ fa fama tẹ, kiri ḅio ọsụ sara minji ọkụ: Ị̀ anda-na-iko-na ḅẹ mgbe mamgba kpọkọrọ-kpọkọrọ tẹ, ì ḅioḅẹngbọ lọkọ tẹ kpootẹ agba sanị ḅara sanịarị.

¹⁵ Ị̀ pọkọ ḅẹ ololo fọọn samụnọ ḅara samụnọ-kpakịkị tẹẹ, tẹ ị̀ ḅẹlẹ ị̀ ḅịḅị-ḅio ḅẹ ọgọnọ mẹ oḅoloarị: ị́ ị̀ kẹ fịị tẹ ḅọ ḅara kẹ fọọn ḅio gbin kuroma tẹẹ.

¹⁶ Si atomi ogbo ì gbori wararị, gbala nọmụ obiri amẹẹ ọkụ, tẹ in ḅo ị̀ bịan-sịẹ tẹẹ: ini ị̀ aḅara na ị̀ aḅụọ na kanịarị.

¹⁷ Ini ị̀ paụma sịẹma tẹ, ì oju ḅẹ mgbe na apara na ngẹrị kọn ḅara ḅụ: Si kẹ ị̀ tọn apụ ma nwẹnị bio-bioma ì ḍikiḍiki tẹ ḅioḅẹlẹarị.

¹⁸ Ini ị̀ akapa gotẹ okoḅa sararị: tẹ arị ḍie ọkịarị ịna ogboku.

¹⁹ Yei KỊNỊNYANAḄỌ, ị̀ ḅụụ ḅelema! Sarasarama ḅo ị̀ pụkọ-pakamaa ịna aḅara-ḅio!

²⁰ Ogie fịị ḅụ ị̀ ḅọrọma-a; mịna obiri amẹẹ ma ḅara-ḅio ì ḍumo ḅọrọma-a.

²¹ Mịna ọkụkụ ma ḅara-ḅio ị̀ pụkọ-pakamaḅoo; mịna piri-ḅio-ḅẹ pootẹ-anambulo ma tọrọkọ à mịẹ-mịẹ ọkụ ofori.

²² Arị ị́ kọrị tẹ aị ma ḍuko ị̀ amịnapụ ma pịrị ḅa: In kobiritẹ sunsin ị́ pịrị ḅarị sakị ḅụ àrị í tokini ḅa.

²³ “KỊNỊNYANAḄỌ ḅe fịrịmẹnjịapụ, ọmịnị ò tokinii; Jekọbụ furo-ḅẹ-apụ, ọmịnị ọ̀ kụn! Izirẹlịapụ, ó sunsin ọ̀ pịrịị!

²⁴ Ori igoin-apụ ma kọkọrọ ḅọrọ-a, pịkị ịna tọrụsiẹrị mẹ kẹ ye-sịn-a ḅara mịẹ-a; ori in ḍiki-tọrụsin-a, kụma ịn ḅarasụa gotẹ ọ̀ sịn sakị ori ịn naarị.”

²⁵ Ị́ atomi ma ḅintẹ ḅara kẹ kobiri wararị ogbo, arị ị́ kọrị tẹ aị ma kẹ í tokini ḅa; ḅo sunsin ị́ pịrịarị apụ ma tọrọkọ ḅụ arị à minini ị́ pịrị tẹ agba ma mịẹ ḅa.

²⁶ Tẹ igoin-apụ ma in ḅii ḅara, ḅii ḅara kẹ ye fị ḅa; KỊNỊNYANAḄỌ ḅe ḍọkụma-ḅoarị apụ ma ò tokini ḅa. Yee ịn lọkọlọkọ mu ḅẹẹ-sakị ḅẹẹ-sakị la!

²⁷ Tomikiri ḅẹ asịẹ mamgba KỊNỊNYANAḄỌ ḅe kẹ ḅiokoroma ḅa. Tomikiri ḅẹ ịkọlị mamgba pịkị ọ̀ da ḅa; furo-furo mamgba sunsin ọ̀ pịrị ḅa.

²⁸ KỊNỊNYANAḄỌ ḅe anie amadaḅọ; tẹ ori tomikiri ḅẹ asịẹ mamgba daarị.

²⁹ Ḅụụ-gelema atomi mamgba ọ̀ tọrọkọ iḅo ḅa: Fịị-fịị oju sụa atomi mamgba ọ̀ tọrọkọ iḅo ḅa;

³⁰ tọrọkọ-jụ ḅo ḅarị aḅụọ ḅẹ apụ fịrịmẹnjị ọ̀ pịrị ḅa; tomi KỊNỊNYANAḄỌ ḅe gbolomaye ḍuko ḅoarị aḅụọ ma ḅẹ apụ ma pịrị ḅa.

³¹ Amụ iyi-a apụ ma in ḍuko ịn pịrị ḅa: “KỊNỊNYANAḄỌ ḅe ori atomi ḅọrọmam.”