Devidi-Anume 21 - FỊAFỊA BAỊBỤLỤ

Kẹ Owu-ḅara-iḅi Gotẹ Tamụnọ Tokiniarị Nume

¹ Yei KỊNỊNYANAḄỌ, amadaḅọ ḅe ḅioḅẹlẹarị, ị́ ịnyọ kẹ ọ̀ pịrịm gotẹ: ò ḍerekuarị ị́ mịẹ tẹ owu ọ̀ ḅara iḅim gotẹ.

² Ọ̀ tẹmẹ ịgbanịarị ye mẹ ị́ kẹ ọ̀ pịrị tẹ; ò ḅiiarị ye mẹ ị́ naa tẹ.

³ Í opu aboma kẹ ḅo ọ̀ pịrịm tẹ golu amada-sun kẹ ò surem.

⁴ Ori ị́ ḅara ḍumo ḅiim, tẹ ị́ anị kẹ ọ̀ pịrịm: nangwọtẹ kuno-a ḍumo ị́ nwẹn kẹ ọ̀ pịrịm.

⁵ Ị́ ḅarasụa gotẹ ori opu ebube nyanam: ereso na tọrụ-ḅaa opu na ị́ nwẹn kẹ ọ̀ pịrị tẹ.

⁶ Ị́ aboma ma ori na sime mu ḅẹẹ-sakị ḅẹẹ-sakị laarị: tẹ í ori na emi mẹ nwẹnị ḅioḅẹlẹ kẹ ọ̀ ḅụụ ḅio suu ḅinmarị.

⁷ Amadaḅọ ḅe Kụrọ mamgba nyana KỊNỊNYANAḄỌ ḅe kẹ ḅiokpọmarị: tẹ KỊNỊNYANAḄỌ ḅẹ sakị mamgba nyana ọ̀ pịrị wararị ḅẹlẹma mẹ gotẹ, sakị mamgba ọ̀ la-la ye ofori.

⁸ Amadaḅọ ḅe si kẹ ọ̀ tọn-arị apụ mamgba kun ḅa: Ò ḍiki-ḅioḅuarị ḅọ goḅọ-goḅọ ori mḅọ kun ḅa.

⁹ Ò tolu-sịẹ sakị ori orumo kịka fịnị kẹ ịn ḅaa guluguluma ḅa. KỊNỊNYANAḄỌ ḅe ịn mẹnị ọkị ḅa ori ịganị ḅụ, tẹ fịnị ịn dọkịma fama ḅa.

¹⁰ Ịna furo-ḅẹ-apụ ḅụ kirikọn ḅẹ ḅọ ofori; amadaḅọ ḅe inimgba ḅaa fama ḅa.

¹¹ Ini ịn mịẹ ḅẹ aị tọn-tọn sararị, kẹ ọ̀ mịẹ ḅẹ tẹ tọn-arị, kụma ye ịn tọn ḅara sime ịn pịrị ḅịa.

¹² Ori ori aḍịẹịn ma kẹ ịn tẹịn ḅa tẹ ịn mịẹ tẹ ịn pịkị tẹ mangị ḅa.

¹³ KỊNỊNYANAḄỌ, wa í tokiniarị, í opu ịnyọ mẹ gotẹ! Wa nume-su tẹ kẹ ị́ kụrọ tokini ḅa.