Devidi-Anume 20 - FỊAFỊA BAỊBỤLỤ

Owu-ḅara-iḅi Gotẹ Kọn Tẹkẹ

¹ Yee KỊNỊNYANAḄỌ ḅe ị́ naa ḅụụ-fụka ḅio ḅụ: Yee Jekọbụ Tamụnọ ḅe ị́ gbaịn.

² Yee ori ọ̀ Warị ḅụ sime tẹ ḅarasụa kẹ ị́ fịrịma: tẹ ọ̀ Zayọnị Tụndụ mẹ ḅụ sime tẹ ḅarasụaye mẹ kẹ ị́ pịrị.

³ Yee ori ị́ kẹ ọ̀ pịrịarị aị mamgba daa-ọkị; tẹ ị́ mịẹarị agba mamgba ò ḅioḅẹlẹma.

⁴ Yee ori ị́ tẹmẹ ịgbanịarị ye mẹ kẹ ị́ pịrị; tẹ ị́ tọn aị mamgba lolo.

⁵ Anị tẹso, wa owu ị́ ḅara iḅi ye gotẹ oloku tẹ ḍereku ḅa, tẹ anị ḅẹ tii kọn tẹ wamịna Tamụnọ tokini ḅa: Yee KỊNỊNYANAḄỌ ḅe ị́ ḅiiarị aị mamgba kẹ ị́ pịrị.

⁶ Mịọkụ à nimi tẹ mịnẹ KỊNỊNYANAḄỌ ḅe owu-ḅara-iḅi kẹ ọ̀ sẹlẹ ọkị tẹ amadaḅọ ḅe pịrịarị; ọ̀ fịafịa so mẹ ḅio ò sime tẹ ọ̀ naarị tẹ ọ̀ kụrọ ḅụ opu owu-ḅara-iḅi-ḅi-ḅi kẹ ọ̀ pịrịarị.

⁷ Japụ ḅioḅẹngbọ kẹ ịna akirimẹnjị-ọmụarụ ọgọnọ gbanarị, tẹ jen-apụ ịna asụ ma ọgọnọ, kụma wamịnị KỊNỊNYANAḄỌ, wamịna Tamụnọ ḅe kụrọ mie wamịna ḅiokpọ.

⁸ Ọkọ sime apụ ma ịn pụmbụ tẹ ḅịkị ḅa, kụma wamịnị wa saakị tẹ sịẹ-kụrọ ḅa.

⁹ Yei KỊNỊNYANAḄỌ, owu-ḅara-iḅi kẹ amadaḅọ ḅe pịrịị: wa naa wa ị́ sịn sakị.