Devidi-Anume 19 - FỊAFỊA BAỊBỤLỤ

Tamụnọ Ebube Ọ̀ Tẹmẹ Aị Ḅụ

¹ So-tọrụ mẹ banabanama Tamụnọ ebube ḍie-pakamarị! Anị mịẹ tẹ tomi giregirema ọ̀ kọrị tẹ aị ma ẹrịarị!

² Gbọrụ ene ḅaka ḍuko jen ḅaaene pịrịarị; gbọrụ ḍin gberie mẹ ḍuko jen ḍin pịrịarị.

³ In tomina ẹkwẹn kẹ ḍuko-a, fie sọ kịnị naa-a;

⁴ anịsọ anị kịkarị ịna pọkọ tomikiri mamgba la tẹẹ, tomikiri ḅẹ ịkọlị mamgba anị naa tẹẹ. Tamụnọ So-tọrụ mẹ kẹ ịrụa mẹ sime-yọ mịẹ tẹ;

⁵ dede-ḅio anị paka-ḅoarị, ḅioḅẹlẹarị ere-ịyaḅọ ọkụ, mangị ịrụa ḅio-sẹsẹmarị ḅọ fiin paka-ḅo ḅara.

⁶ Gbọrụ ịkọlị ḅụ anị saakịarị So-tọrụ tẹ saḅa mu osi anga tuu koroarị. Anị ḅẹ ọfịrị mẹ la-a ye ofori.

KỊNỊNYANAḄỌ Ḅe Oloko Mẹ

⁷ KỊNỊNYANAḄỌ ḅe oloko mẹ karakara famam, anị ịwọ ịnyọ pịrịarị. KỊNỊNYANAḄỌ ḅe tọn kuroma aị ma ḅioḅẹngbọ kẹ arị ḅụụ gbana na-iḅim, nimi kẹ ye-nimia-apụ pịrịarị.

⁸ KỊNỊNYANAḄỌ ḅe oloko ma kuram, tẹ arị kokoarị apụ ḅioḅẹlẹarị. KỊNỊNYANAḄỌ tọn kuroma aị ma ḅụ inoma ofori, tẹ anị ye-nimi kẹ tomina kuroma ḅụ suuarị.

⁹ Sunsin KỊNỊNYANAḄỌ ḅe pịrị mẹ iḅim; anị ọkọ mịẹ gbamaso ḅa. KỊNỊNYANAḄỌ ḅe aḅẹrẹkọn ma ḅụ inoma ofori, sakị mamgba arị aḍụa nyana-a.

¹⁰ Arị nyana ḅẹ ḍọkị iḅi iḅitẹịn golu nẹngịm; arị ḅẹlẹ iḅitẹịn ḅẹm nẹngịm.

¹¹ Arị ḍawọye ḍin kẹ yẹrị ị́ fịrịmẹnjịḅọ ḅe pịrịarị; arị koko mẹ sọye mịẹ ị̀ pịrịarị.

¹² Gbọrụḅọ-sọ inetẹ mḅọ mịẹ-irima aị ẹrị ḅịa KỊNỊNYANAḄỌ, ḅọị tẹ mịẹarị asi ḅụ ị̀ ḍụa-ḅọrọmaa!

¹³ Pịkị tọrụ-gelegele mịẹarị asi ḅụ ị̀ wẹrị ḅelemaa; ḍụkụ tẹ arị ḅẹrẹtọn ị̀ pịrị ma. Anịsakị à kara-gbasị tẹ si mịẹ ye ḅụ paka-ḅo ḅa.

¹⁴ Yei KỊNỊNYANAḄỌ, ị̀ ḅụụ-ḅọị-yọ pịkị ị̀ pakịrịḅọ, yee ị̀ ẹkwẹn ma na à kuromarị aị ma na ị́ tọrọkọ ọkị na-iḅi aị sọ!