Devidi-Anume 18 - FỊAFỊA BAỊBỤLỤ

Owu Devidi Ḅara Iḅi Tẹ Ò Su Nume

¹ KỊNỊNYANAḄỌ, arị ị́ ḅẹlẹma lamarị! Ị́yẹrị anie ị̀ ḍụarịḅọ.

² KỊNỊNYANAḄỌ ḅe anie ì kikimarị ḅọ; ori owu inetẹ ḅo ị̀ la ḅịa anga sọ ị̀ pịrị tẹ. Ị̀ Tamụnọ anie ị̀ gbaịn-arị ḅọ, ọ̀ ḅara-ḅio ị̀ la-la ye ofori. Ori ekpeke sọ ị̀ pịrị wararị; ori ị̀ ḍụa tẹ ì koko kpaịnmarị.

³ À KỊNỊNYANAḄỌ ḅe tẹkẹarị, tẹ ò si kẹ ị̀ tọn apụ ma aḅara ḅio ị̀ ḅọrọmarị. KỊNỊNYANAḄỌ ḅe tokinii!

⁴ Ị̀ ḅaa ḅẹ ye ḅo ì ikelema-korom; ḅaa guluguluma ọnụngọ ḅo ị̀ gbaịnm.

⁵ Ị̀ ḅaa ḅẹ ye ḅo ì ikelema-korom, tẹ ḍuḅu mẹ amịna ḍiein tuu ị̀ pịrịm.

⁶ Ị̀ ḅụụ-fụka ḅụ à KỊNỊNYANAḄỌ ḅe sịnm; àrị ị̀ Tamụnọ sịnm ọ̀ ḅarasụa ị̀ pịrị ḅẹ ḅara. Ori ọ̀ warị ḅio sime tẹ ị̀ pọkọ naam; à ḅarasụa gotẹ kọn oloku mẹ ò pokim.

⁷ Anịtẹso kiri mẹ gwẹ-gwẹ tẹ jikem; tụndụ ma suku-ḅio ma gwẹ-gwẹ tẹ jikem, Tamụnọ ịganịm ẹrẹsị.

⁸ Ò nini aḅọkọ ḅụ onwin turee-tureema pakam, orumo kọrị-fịnị na kọrịarị anyịmgbọ na ọ̀ ḅịḅị-ḅio.

⁹ Ò So-tọrụ mẹ kẹ maaịn puu tẹ ideri-ḅom, kpiti tẹ oḅuto ori aḅụọ-suku ḅio.

¹⁰ Ọ̀ pamba-sụa ye kpọlịtẹ vuunma fiinm; fẹrụ mẹ apamba ọgọnọ mie ọ̀ ḅọrọ ò mu anga mu ye.

¹¹ Ọ̀ kanakana kẹ amịna ḅụụ gbaịnm; kpiti lamatẹ oḅuto, eene kuroma ḅẹ-yearị ye, ori ikelema-korom.

¹² Eene mgbọlị, mgbọlị na so ḅalapụ tẹ kọrị ḅọrọarị fịnị na ideri-ḅom ọ̀ tọrọkọ tẹ nwẹnị kpiti oḅuto ma kan tolu.

¹³ Anịtẹso KỊNỊNYANAḄỌ ḅe so-alagba tẹịnm; tẹ tomi nwẹnị Gele Tẹịnḅọ ḅe pọkọ naa.

¹⁴ Ori ori aḍịẹịn tẹịn tẹ si kẹ ọ̀ tọn apụ ma gala-galam; So-tọrụ ḅalapụ tẹ kọrị tẹ ịn mangịm.

¹⁵ KỊNỊNYANAḄỌ, ị́ ịganị si kẹ ị́ tọn apụ ma pịrị tẹ oloku sakị, ị́ mịẹ tẹ abajị mẹ kpongbo-kiri sọm, tẹ kiri suku-ḅio mẹ soku paka-ḅom.

¹⁶ KỊNỊNYANAḄỌ ḅe So-ḅio ḅara-sụnma iderima-ḅo ị̀ ọlọm; ori owolo mẹ ḅio ị̀ nụnụ pakama-ḅom.

¹⁷ Ò si kẹ ị̀ tọn koro apụ ma aḅara-ḅio ị̀ pụkọ-pakamaḅom pịkị ì ḍiki-ḅioḅuarị apụ ma aḅara-ḅio ịn kụrọ ị̀ nẹngị ḅakam.

¹⁸ À ḅụụ-fụka ḅio simearị sakị, ini owu kẹ ị̀ pakam, kụma KỊNỊNYANAḄỌ ḅe ị̀ gbaịnm.

¹⁹ Ọ̀ ḅarasụa tẹ siye kẹ ị̀ mịẹ ḅẹ ye ḅio à paka-ḅom; ori ị̀ ḅọrọmam ị̀ mịẹ ye ọ̀ ḅụụ-ḅẹlẹ arị ẹrẹsị.

²⁰ À kuraye mịẹarị ẹrẹsị KỊNỊNYANAḄỌ ḅe gbẹẹ aị kẹ ị̀ pịrịarị; ori ì bomarị ị̀ ḅara fịafịa wararị ẹrẹsị.

²¹ À KỊNỊNYANAḄỌ ḅe oloko mẹ ḅẹ ḅara mịẹ tẹ; amụ àrị ọḅụ pịkị ị̀ Tamụnọ gbin-a.

²² Ori oloko mamgba à koko fama tẹ; amụ àrị ọ̀ tọn kuroma aị ma kan-a.

²³ Ò nimi wararị ị̀ ḅụụ ḅẹẹ-ḅẹẹye ofori, mịnẹ àrị ị̀ ḅụụ ọlọ tẹ kura-aye mịẹ ḅụ.

²⁴ Ọkọẹrẹsị ọ̀ gbẹẹ-ye kẹ ị̀ pịrịarị à kuraye mịẹarị ẹrẹsị, ò nimi wararị ị̀ ḅara fịafịa wararị ẹrẹsị.

²⁵ Yei KỊNỊNYANAḄỌ, ḅioḅẹngbọ-kẹ-sịrẹrẹ-niḅi ḅara sime ị́ pịrị apụ ma, í ḅioḅẹngbọ-kẹ-sịrẹrẹ-niḅi ḅara sime ịn pịrị wararị; iḅi famatẹ apụ ma ḅụ í iḅi kọnma-a.

²⁶ Kpaịn apụ ma ḅụ ị́ kpaịn wararị, kụma si-sịḅịḅio-sụapụ ma ḅụ kịnị-na-fịya-a ịganịḅọ.

²⁷ Ị́ ḅụụ iderima apụ ma ḅọrọmarị, kụma ị́ ḅụụ-gelema apụ ma iderimarị.

²⁸ Yei KỊNỊNYANAḄỌ, í bele kẹ ị̀ pịrịarị; ị́ ị̀ kanakana dee sin-arị.

²⁹ Ị́ ịnyọ kẹ ị̀ pịrị tẹ àrị owu kẹ si kẹ ị̀ tọn apụ ma pakarị pịkị kụrọ kẹ ị̀ pịrị tẹ à kẹ ịna ḅụụ ḍụa aị ma nẹngịmarị.

³⁰ Ḅị Tamụnọ ḅe — ori amịẹaị ma busunu lamam! Ori ẹkwẹn ma ḅụ sịrẹrẹ na-iḅi lamam! Ori in kikimaa nwẹn ḅiiarị apụ ma, ori ekpeke sọ ịn pịrị wararị.

³¹ KỊNỊNYANAḄỌ ḅe ngẹrị anie Tamụnọọ! Tamụnọ ngẹrị anie wa ḍụarịḅọ.

³² Ori anie ị̀ kụrọmarị Tamụnọ, anie ị̀ mẹnjị-ḅọrọ-anga ḅụ ḍụkụ tẹ ye ị̀ la-a ḅọ ḅe.

³³ Ọ̀ mịẹ tẹ ị̀ ḅụọ kụrọ kiri sịẹarị, tụḅara ọkụ; tụndụ ma ọgọnọ ḅụ ọ̀ ḍụkụ tẹ ye ị̀ la-a.

³⁴ Ori ọmụ aka kẹ ì tolumarị, mịẹ tẹ àrị inetẹ kụrọ tẹịn iboli sọ tẹịn ḅẹ ḅara.

³⁵ Yei KỊNỊNYANAḄỌ, ị́ ị̀ gbaịn tẹ ị̀ ḅọrọmarị; ị́ ị̀ balarị ye mẹ ị̀ ḍụḅama tẹ, tẹ ị́ kụrọ mẹ ì koko kpaịnma tẹ.

³⁶ Ị́ ḍụkụ tẹ tomi ma ì kun ọkị-a, tẹ jene-jene amụ à pịkị owu kiri ḅịkị-a.

³⁷ À si kẹ ị̀ tọn apụ ma ḍuka, ḍuka tẹ in kun-arị, à daasịẹ-sịẹ-a nwenii arị ịn ḅaa guluguluma famarị.

³⁸ Àrị in fomu gbin-arị tẹ ịn ḅarị inetẹ saakị-a; ịn nwẹnị owu ḅara si mẹ kẹ ị̀ tọrọkọ koro-simearị.

³⁹ Ị́yẹrị kụrọ kẹ ị̀ pịrị tẹ à kẹ ọmụ gbin-arị tẹ si kẹ ị̀ tọn apụ ma nẹngịmarị.

⁴⁰ Ị́ mịẹ tẹ si kẹ ị̀ tọn apụ ma ị̀ ḅụụ mangịarị; àrị ì ḍiki-ḅioḅuarị apụ ma ḅaa gulugulumarị.

⁴¹ Ịn ḅarasụa gotẹ owuarị kụma gbọrụḅọ-sọ ḅo ịn ḅọrọma-a; ịn KỊNỊNYANAḄỌ ḅe tẹkẹarị, kụma ori ịna tẹkẹ pakịrị-a.

⁴² Àrị ịn gbẹẹ kọsịma tẹ ịn fọọn kịkarị, anie fẹrụ kẹ fiin soarị ye mẹ. Àrị ịn nanga ḅọrọarị, etela ma ḅụ ḅẹ lịka nanga ḅọrọ ḅara.

⁴³ Kọngọ kụrọmarị apụ ma ḅara-ḅio ị́ ị̀ ḅọrọmam tẹ mịẹ tẹ à ḅẹrẹtọn ama sịẹ-sịẹ pịrịarị ḅọ sọm; jene-jene amụ à nimi wẹrị-a apụ ḅo mịọkụ ì suku-ḅio simearị apụ sọ tẹ.

⁴⁴ Ja sịẹ ḅẹ apụ sịḅị-tuu ị̀ pịrịarị; ini à ḍuko ye naa sakị, ịn mịẹarị.

⁴⁵ Ịn ḅarị tẹmẹ nyana-a tẹ oju sẹkịma, ịna kụrọnị-anga ma ḅụ paka-ḅoarị.

⁴⁶ KỊNỊNYANAḄỌ ḅe ḍumo wararị! Ị̀ ḍụarịḅọ ḅe tokinii! Ị̀ ḅọrọmarị Tamụnọ ḅe opu mẹ ḍuko wasamaa.

⁴⁷ Ori owu-ḅara-iḅi kẹ ị̀ pịrịarị si kẹ ị̀ tọn apụ ma ḅụ; Ori ama sịẹ-sịẹ ma kẹ ì suku-ḅio suuarị

⁴⁸ tẹ owu kẹ ị̀ pakarị apụ ma ḅara-ḅio ị̀ ḅọrọmarị. Yei KỊNỊNYANAḄỌ, owu-ḅara-iḅi kẹ ị̀ pịrịarị si kẹ ị̀ tọn apụ ma ḅụ, tẹ ị̀ gbaịn-arị kụrọ-kụrọ-aị mịẹarị atomi ma ḅụ.

⁴⁹ Ọkọẹrẹsị àrị í tokiniarị ama sịẹ-sịẹ ogboku ḅụ; à nume su-su í bomarị.

⁵⁰ Tamụnọ opu owu-ḅara-iḅi-ḅi-ḅi kẹ ori ama mẹ daarịḅọ ḅe pịrịarị; ò kuno-a ḅẹlẹma nyana ori ḅarana sẹlẹ pakama-ḅo ḅọ ḅe pịrị wararị, Devidi na ò furo-ḅẹ-apụ na mu ḅẹẹ-sakị ḅẹẹ-sakị la.