Devidi-Anume 17 - FỊAFỊA BAỊBỤLỤ

Mịẹ ye ofori Tomḅọ kọn Tẹkẹ mẹ

¹ Yei KỊNỊNYANAḄỌ, arị ịgbanịarị karakara mẹ poki; à ḅarasụa gotẹ kọn-arị owu mẹ kẹ ye-sịn! À karakara tẹmẹ kẹ kọn-arị tẹkẹ mẹ poki.

² Ị́ ḅẹrẹ-pẹlẹ ị̀ ḅara iḅima ḅa, í kuraye nimi wararị ẹrẹsị.

³ Ị́ ì ḅioḅẹngbọ nimi wararị. Ị́ ị̀ dama-ḅo tẹ ḍin ḅụ: í ì pekele-ḍiki fama tẹ tẹ à mịẹ ḅẹ-ḅiiarị siye tẹ ị́ ḍọkị-ẹrị ye ofori ị̀ ḅụụ ḅio.

⁴ À jen-apụ ḍikima tẹ si ẹkwẹn kọn-a: àrị ị́ tọn ye poki tẹ mịẹ tẹẹ: amụ à pịkị kụrọ-kụrọ aị mịẹ etela mẹnjị-a.

⁵ Sakị mamgba àrị í etela ḅụ mẹnjị tẹ tẹ amụ à pịkị anị ḅụ iri-a.

⁶ Yei Tamụnọ, àrị ị́ tẹkẹarị, ị́ ị̀ pakịrịarị ẹrẹsị: ọkọẹrẹsị tọrụ pịkị ị̀ da tẹ ị̀ ẹkwẹn ma pokii.

⁷ Ị́ ḅụụ-buama ḅẹlẹma mẹ mịẹfinji tẹ wa ḅọrọma-a: ị́ akaka ḅụ si kẹ wa tọn-arị apụ kẹ wa mịẹ-mịẹ ye ofori.

⁸ Ị̀ gbaịn, ị́ kẹ ị́ atọrụngbọ mịẹ ḅẹ ḅara pembe ḅara: ị́ apamba suku-ḅio ị̀ ḅọị

⁹ si-sịḅịḅio-sụapụ ma ḅarị owu kẹ ị̀ paka, paka, paka ḅịa ḅara. Si kẹ ị̀ tọn tẹ ị̀ ḅaa ḅẹ apụ ị̀ ikelema wararị;

¹⁰ ini ọkụrụkụrụ nyana-a, ịn pịkị opu ẹkwẹn kọn-arị.

¹¹ Mịọkụ ini ikelema wararị, à pịkị da anga da anga ini emi, ẹbịarị kiri foofo tẹ ini ị̀ nụnụ kiri gbin ḅẹ ḅara.

¹² Ini ị̀ ẹbịarị ḅara ọkụkụ amẹẹ ọkụ, in ḅiiarị ini ị̀ kanị-kọsịma.

¹³ KỊNỊNYANAḄỌ, ḅoo! Si kẹ ị̀ tọn apụ ma na kuḅu dama tẹ ịn nẹngịma-a! Í okologie kẹ si-sịḅịḅio-sụapụ ma ḅara-ḅio ị̀ ḅọrọma-a;

¹⁴ mị ḍumo ḅụ in ḅiiarị aị mamgba nyana tẹ apụ ma ḅara-ḅio ị̀ ḅọrọma-a. Ị́ kẹ koko ịn wẹrịma atọrụsiẹrị ma kẹ in fomuu; yee kirikọn-aị ma sime ịna awọmẹ pịrị, ini na iḅi ḅẹ ḅara jaị pịkị sime ịna afuro ḅẹ apụ pịrị!

¹⁵ Kụma yẹrị àrị ị́ ẹrị ḅa, amụ à kura-aye mịẹ-a ẹrẹsị: tẹ à saakị sakị, ị́ ị̀ na emi mẹ ḅioḅẹlẹ kẹ ị̀ ḅụụ ḅio ḅinma ḅa.