Devidi-Anume 15 - FỊAFỊA BAỊBỤLỤ

Tamụnọ Ḅiiarị Ye

¹ KỊNỊNYANAḄỌ, tụḅọ ị́ Warị sọ ḅo ḅẹ? Zayọnị, ị́ fịafịa tụndụ mẹ ọgọnọ tẹkẹ ḅẹ ḅọ tụḅọ?

² Ye goyegoye ḅụ Tamụnọ ḅịḅị pokiarị ḅọ tẹ sakị mamgba kuraye mịẹarị ḅọ, karakara ẹkwẹn kọn-arị tẹ aka na epele na ḅụụ ḅụ ofori ḅọ;

³ ja atomi kẹ ọḅụjụ wori-sima-a ḅọ. Ò kura-aye kẹ amịna ikiapụ mịẹ-mịẹ-a tẹ ọ̀ pịkị ori na kpekitẹ angarị apụ kẹ ịba-fị ma-ḅọrọ ḅọrọ-a.

⁴ Ọ̀ Tamụnọ sịkịarị apụ ḍiki-simarị, kụma ọ̀ KỊNỊNYANAḄỌ ḅe ḅịḅị pokiarị apụ kụn-arị. Sakị mamgba ori ò minini ye mịẹarị, anị ọ̀ ḅụụ sima ye sima ye sọ.

⁵ Ò ye gbana-a ḅara kẹ igbigi kẹ kịnị ḅọlọarị tẹ kịnị inetẹ ọḅụ kẹ ọ̀ pịrị fị tẹ ò tomḅọ nimi-a ye ḍuko mḅọ sịḅị gbana ḅịa. Mịna aị mịẹarị ḅọ, mịẹarị ḅọ sakị mamgba mḅọ la-la ye ofori.