Devidi-Anume 145 - FỊAFỊA BAỊBỤLỤ

Tamụnọ Ọ̀ Ḅakam Ọ̀ Pịkị Iḅiye Mịẹarị

¹ Àrị í opu sakị gelema ḅa, ị̀ Tamụnọ pịkị ị̀ amadaḅọ; àrị í tokini mu ḅẹẹ-sakị ḅẹẹ-sakị la ḅa.

² Ene-ḅaaene-ḅaaene àrị í ḅụụ iḅiye ḍuko ḅa; àrị í tokini mu ḅẹẹ-sakị ḅẹẹ-sakị la ḅa.

³ KỊNỊNYANAḄỌ ḅe ọ̀ ḅakam, tẹ opu ḅara kẹ ò tokini na-iḅim; Ọ̀ ḍụḅa mẹ sime-ḅara, nimi-nimi ḅara ofori.

⁴ Tomi í kọrị tẹ aị ma kẹ í tokini mu ḅụọ-fa-ḅụọ-paka la ḅa; ini ị́ kụrọtẹ opu akọrịnama ma oloku pakama ḅa.

⁵ Tomi í ebube na ḅaka na ḅụ ẹkwẹn ḅa tẹ yẹrị ị́ ḅụụ-buama amịẹaị ma kẹ ḅioḅẹngbọ ḅụ pekele-ḍiki ḅa.

⁶ Kịnị ị́ kụrọtẹ opu akọrịnama ma ḅụ ẹkwẹn ḅa, tẹ àrị í opu mẹ oloku pakama ḅa.

⁷ Ini í iḅi mamgba gbolomaye ḍuko ḅa tẹ í iḅi-yemịẹ-ḅara ḅẹ nume-su ḅa.

⁸ KỊNỊNYANAḄỌ ḅe ọ̀ ḅaka ḅara kẹ kịnị ḅẹlẹmarị pịkị ọkụrụkụrụ nyana kịnị pịrịarị, ọ̀ wana-wanama ịganị-ịganị-a, tẹ kuno-a ḅẹlẹma pịkị ọ̀ ḅụụ ḅin wararị.

⁹ Ḅẹḅọ-ḅẹḅọ ḅụ ori iḅim tẹ ọ̀ pịkị ọkụrụkụrụ nyana ọ̀ tẹmẹ aị mamgba pịrịarị.

¹⁰ KỊNỊNYANAḄỌ, tẹmẹ-aị mamgba í tokini ḅa, tẹ ị́ atomi mamgba ịmịẹtẹ kẹ ị́ ḅẹ ḅa.

¹¹ Ini ị́ ama nyana kụrọ mẹ ḅẹ ebube mẹ ḅụ ẹkwẹn ḅa tẹ í opu kụrọ mẹ gotẹ ḅa,

¹² mịẹ tẹ ḅẹḅọ-ḅẹḅọ í opu kụrọtẹ amịẹaị ma nimi pịkị ị́ ama-da kiri mẹ ḅẹ ebube na ḅaka na sọ.

¹³ Ị́ ḅẹrẹtọn mẹ sime gbamasom, anịsakị ị́ ama-da mu ḅẹẹ-sakị ḅẹẹ-sakị laarị. KỊNỊNYANAḄỌ ḅe minini ori atomi pịrị tẹ aị ḅụ ọ̀ ḅịḅị ḍima ḍima-a, tẹ ori ḅe mịẹarị ye goyegoye iḅim.

¹⁴ Ọ̀ ḅarasụa ḅụụ-fụka ḅio simearị apụ pịrịarị; tẹ ḅịkị tẹ apụ nụnụ saakịarị.

¹⁵ Ḍumo wararị aị mamgba ḅiokpọ ḅụ ị́ tọrụ ḍikiarị, tẹ ị́ fịye kẹ ịn pịrịarị in ye fị na-iḅi sakị ḅụ.

¹⁶ Í ini na iḅi ḅẹ ḅara kẹ ịn pịrịarị tẹ kịnị mamgba ḅụụ-fụka mịẹ pẹlẹarị.

¹⁷ KỊNỊNYANAḄỌ ḅe mịẹarị aị mamgba ḅụ ọ̀ karakaram, ọkụrụkụrụ ḅụ ori arịmgba mịẹarị.

¹⁸ Ori ọ̀ sịn-arị apụ ma na kpeki wararị, karakara tẹmẹ kẹ ọ̀ sịn-arị apụ ma.

¹⁹ Ọ̀ kụn-arị apụ ma ḅụụ-fụkamarị aị mamgba ọ̀ mịẹ tẹ ịn nyanarị, ori ịna owu naa tẹ ịn ḅọrọmarị.

²⁰ Ọ̀ ḅẹlẹmarị tomḅọ goḅọ-goḅọ, ori mḅọ gbaịn-arị; kụma ò si-sịḅịḅio-sụapụ ma ḅaa guluguluma ḅa.

²¹ Sakị mamgba à KỊNỊNYANAḄỌ ḅe tokini ḅẹ; yee ori tẹmẹ-aị mamgba ọ̀ fịafịa ẹrẹ tokini gbamaso.