Devidi-Anume 144 - FỊAFỊA BAỊBỤLỤ

Amadaḅọ Owu Ọ̀ ḅara Iḅi Ye Gotẹ Ịmịẹtẹ Kẹ Tamụnọ Ḅarị

¹ Ọ̀ KỊNỊNYANAḄỌ ḅe tokinii, ị̀ gbaịn-arị ḅọ ḅe! Ori owu-aka kẹ ì tolumarị tẹ ị̀ tẹlẹma ọmụ wẹrịmarị.

² Ori anie ị̀ gbaịn tẹ ị̀ ḍụarịḅọ, ị̀ sịḅị kikima yọ pịkị ị̀ ḅọrọmaḅọ, ori mie à kẹ ḅiokpọmarị, ye ị̀ la ḅịa ḅara. Ọ̀ mịẹ tẹ sịẹ-sịẹ ma sịḅị-tuu ị̀ pịrịarị.

³ KỊNỊNYANAḄỌ, tomḅọ ḅọrọ tiye, tẹ ị́ ọ̀ kẹ ye-sịn-arị; ye ḅụ ofori tomḅọ, tẹ ị́ ọ̀ kẹ elekima sụarị?

⁴ Ọ̀ kịkarị ye gbọrụ ḅịḅị ḅụ fie ḅọrọ fẹrụ; ò ḍumo-ene ma ịrụa ḅịya tẹ tẹmẹ tọn tẹ ḅọrọ-so ḅara na kịkarị.

⁵ Yei KỊNỊNYANAḄỌ, So-tọrụ mẹ kẹ maaịn puu tẹ ideri-ḅoo; ḅara kẹ tụndụ ma lamaa, tẹ onwin arị ḅụ turee-tureema paka-ḅo ḅa.

⁶ So ḅalapụ-ḅalapụ kẹ fịrịma tẹ si kẹ ị́ tọn apụ ma gala-gala; ị́ aḍịẹịn ma tẹịn tẹ ịn mangị-mangị-so.

⁷ Ọgọnọ sime tẹ ḅara-sụn iderima tẹ pokolo minji mẹ ḅio ị̀ nụnụ pakama-ḅoo, tẹ ị̀ ḍụaa; ja sịẹ ḅẹ apụ kụrọ aḅara-ḅio ḅụ ị̀ ḅọrọmaa,

⁸ anie gbala-gbala karakara ḍuko-ḍuko-a apụ ma, tẹ ye karị tẹ sọ iruo ye ḍukoarị apụ ma.

⁹ Yei Tamụnọ, arị ịwọ nume-su ị́ pịrị ḅa àrị ọbọ mẹ farị tẹ su í boma ḅa.

¹⁰ Í owu-ḅara-iḅi kẹ amadapụ pịrịarị, tẹ ị́ fịrịmẹnjịḅọ Devidi pụkọ-pakamaḅoarị.

¹¹ Si kẹ ị̀ tọn-arị tẹ kụrọ ḅara mịẹ tẹ kịnị-ḅaapụ ma aḅara-ḅio ị̀ ḅọrọmaa; ja sịẹ ḅẹ apụ ma kụrọ ḅara-ḅio ị̀ pụkọ-pakamaḅoo, anie gbala-gbala karakara mẹ ḍuko-ḍuko-a apụ ma tẹ ye karị tẹ sọ iruo ye ḍukoarị apụ ma.

¹² Yee wamịna owiapụ-awọmẹ ma ịna asambịrịma sakị ḅụ kụrọ tẹ so-pakarị asịn na kịka, yee wamịna eremịna-awọmẹ ma ama-da opu warị ḅio kprere-kprerema sịẹ wararị ḍụḅarị ḅeriaị tẹ arị simearị ịkọlị ma ḅirimarị aị na kịka.

¹³ Yee ḍụọ ḅio paka-ḅo kịrị-kịrị afịaị wamịna fịaị koko awarị ḅio ḅinm. Yee wamịna ḍụọ-kiri ḅụ simearị anana ma asambịrịma anana ẹndẹ-ẹndẹ iyi sara.

¹⁴ Yee wamịna opu anama ma tọnwa aị iyi sara, fura so-a pịkị iri-faa ḅara sime. Yee wamịna etela ma ḅụ kịnị opu ḅụụ-fụka gotẹ owu ma-ḅọrọ ma.

¹⁵ Ḅioḅẹlẹ sime miemẹ karakaraye sọ wararị sịẹ pịrịm; ḅioḅẹlẹ sime KỊNỊNYANAḄỌ ḅe Tamụnọ sọ pịrị wararị apụ pịrịm!