Devidi-Anume 143 - FỊAFỊA BAỊBỤLỤ

Ḅarasụa Ḅii Tẹkẹ

¹ KỊNỊNYANAḄỌ, ị̀ tẹkẹ naa! Ị́ karakara mịẹ ḅụ à kẹ ị́ tọrọkọ kuromarị ye mẹ pokii; ḅioḅẹngbọ kẹ ị́ ḅụụ ḅụ gbana na-iḅim ẹrẹsị ị̀ ḅịḅị ọkị!

² Yẹrị ị́ fịrịmẹnjịḅọ ḅe kẹ ḅẹrẹkọn ḅo ma, ị́ tọrọkọ si mịẹ-a ḅọ ofori.

³ Si kẹ ị̀ tọn-arị ḅọ ḅe ì ḍuka nwenii ḅo ì kun sịẹma tẹ pịkị gbọrsịḅị ị̀ nẹngịma tẹ. Ori ị̀ kẹ kanakana yọ ḅụ ikoli suu tẹ, anịsakị à kịkarị apụ anie fịị tẹ ala lamatẹ apụ.

⁴ Mie ḅụ à tẹlẹma fịị pịrị tẹ; ì ḅioḅẹngbọ gbọrsịḅị ḅịkị fama tẹ.

⁵ À ḅọrọ-so tẹ ene ma kẹ ḅiokoromarị; arị ị́ kọrị tẹ aị mamgba kẹ kuroma ḅụ suuarị; ị́ amịẹaị mamgba ì ḅioḅẹngbọ emi.

⁶ Àrị ị̀ aḅara saakị ị́ da tẹ tẹkẹarị; samụnọ kiri minji ḍọkị ḅara, ị̀ tẹmẹ í gotẹ lẹlẹarị.

⁷ KỊNỊNYANAḄỌ, mịọkụ-mịọkụ ị̀ ḅịḅị ọkị! À ḅarị gbọrụ ḅiokpọ sọ nyana-a. Ị́ ḅụụ kikima ị̀ pịrị ma, ọkọ-a kụma à koro ideri-mu fịị tẹ apụ tomikiri mẹ ḅẹ apụ ma ḅụ sọ ḅa.

⁸ Dede goyegoye í kuno-a ḅẹlẹma mẹ kẹ ì ḅiokoroma, àrị ị́ kẹ ḅiokpọmarị ẹrẹsị. À kọn-arị atẹkẹ ma iwo ḅo ị́ laarị; à mẹnjị ḅẹ etela kẹ ị̀ ḍie.

⁹ KỊNỊNYANAḄỌ, àrị ị́ ị̀ gbaịn ḅọrọma ḅẹ ẹrẹsị ị́ ḍọkụma-ḅoarị; si kẹ ị̀ tọn apụ ma ḅara-ḅio ị̀ pụkọ-pakamaḅo.

¹⁰ Ị́yẹrị ị̀ Tamụnọ; ì toluma àrị ị́ tọn ye mị. Iḅi kẹ ị̀ mịẹ, tẹ ị̀ datụkụma-a, ye ị̀ la ḅịa etela ḅụ.

¹¹ KỊNỊNYANAḄỌ, ị́ wẹrịtẹ minini ị̀ pịrị tẹ ḅara ḅụ, ị̀ pụkọ-pakamaḅo; í iḅi ḅụ ị̀ ḅụụ-fụka ma ḅio ị̀ ḅọrọmaa!

¹² Ị́ kẹ ị̀ ḅẹlẹma ḅara ẹrẹsị, si kẹ ị̀ tọn apụ ma ḅaa tẹ ì ponomarị apụ mamgba ḅaa gulugulumaa, yẹrị ị́ fịrịmẹnjịḅọ gotẹ.