Devidi-Anume 141 - FỊAFỊA BAỊBỤLỤ

Ḅoḅiri Tẹkẹ

¹ KỊNỊNYANAḄỌ, àrị ị́ sịn-arị; mịọkụ ḅarasụa ị̀ pịrịị! Ì poki àrị ị́ sịn-arị sakị.

² Kụnụaị daa-ọkị ḅara kẹ ị̀ tẹkẹ daa-ọkị, à saakị so da wararị aḅara ma kẹ ḅoḅiri agba ḅara ọkị.

³ KỊNỊNYANAḄỌ, ị̀ ḅịḅị ẹbị, Ama-koruḅọ ḅara kẹ ị̀ ḅịḅị ḅọkọ ḅẹ maa apakịrị ma koru.

⁴ Ḍụkụ tẹ à kura-aye mịẹ ḅẹ ḅii ma pịkị si-mịẹapụ ḅụ sọ tẹ si-sịḅịḅio amịẹaị mịẹ ma. Yee gbala-gbala àrị ini na ịna alalị fị ma.

⁵ Ẹbịsịya iḅi tomḅọ ori iḅi-yemịẹ-ḅara ḅụ ì fomu tẹ ì ḍiki ịganị ḅa, kụma gbala-gbala à si-mịẹapụ ḅara ḅo kụn ọkị ḅịa, sakị mamgba àrị ịna si amịẹaị ma kẹ Tamụnọ tẹkẹarị ẹrẹsị.

⁶ Ịn geletẹ tụndụ ọgọnọ-jụ ḅio ịna ḅẹrẹtọn apụ ma sukuruma-gbin sakị, tomi ma ḅo minini ḅa mịnẹ ị̀ ẹkwẹn ma karakaram.

⁷ Sịn ikiḅa kẹ pakịrị, pakịrị puu kọsịma sara ḅara, anie ịna mgbe ma ḍuḅu akaka ḅụ gala-gala sara wararị ḅara.

⁸ Kụma, Yei KỊNỊNYANAḄỌ, ị̀ Tamụnọ, à paa ị́ kẹ ḅiokpọmarị. À ḍọkịarị ị́ ị̀ gbaịn; ḍụkụ tẹ à fịị ma!

⁹ In tuu ị̀ pịrị tẹ ḍiein mẹ ḅio ị̀ gbaịn ḅọrọma, arị si amịẹaị mịẹarị apụ ma ḍiein ma ḅio ḅụ.

¹⁰ Yee si-sịḅịḅio-sụapụ ma ḅịkị ini ḅarana tuu aḍịẹịn ma ḅio sọ, yẹrị ye ḅụụ laa ḅara kẹ mẹnjị-ḅọrọarị ogbo ḅụ.