Devidi-Anume 140 - FỊAFỊA BAỊBỤLỤ

Tomḅọ Tamụnọ Ọ̀ Gbaịn Ḅẹ Gotẹ Kọn Tẹkẹ

¹ KỊNỊNYANAḄỌ, si-mịẹapụ ḅara-ḅio ị̀ ḅọrọmaa; ì koko kpaịnma kụrọ-ḅara mịẹ tẹ kịnị-ḅaapụ aḅara-ḅio ḅụ.

² Sakị mamgba in si ḅẹrẹ ḅịyarị, sakị mamgba kamụ-kamụ mie in dogi-ḅoarị.

³ Ịna ḅịḅị-ḅio ḅẹ aḅẹlẹ ma kịnị-ḅaaḅa ododo na kịka wararị; ịn kọn pakama-ḅoarị ẹkwẹn ma ọkụkụ lakwọ na kịkam.

⁴ KỊNỊNYANAḄỌ, si-sịḅịḅio-sụapụ ma kụrọ ḅụ ị̀ gbaịn ḅọrọmaa; kụrọ-ḅara mịẹ tẹ kịnị-ḅaapụ aḅara-ḅio ḅụ ì koko kpaịnmaa, ye ị̀ na sii koro ḅẹ ḅẹrẹ-ḅiyarị apụ ma.

⁵ Ḅụụ-gelemarị atomi ḍiein tuu ị̀ pịrịarị; ini ịna ḍiein ma tuu tẹ etela akaka mẹ ḅụ mie in tuu, tuu wẹrị wararị kẹ ì kuun-sịẹma ḅẹ ḅara.

⁶ À KỊNỊNYANAḄỌ ḅe ḅẹẹarị, “Ị́yẹrị ị̀ Tamụnọọ.” KỊNỊNYANAḄỌ, à ḅarasụa gotẹ kọn-arị owu mẹ naa!

⁷ KỊNỊNYANAḄỌ, ị̀ Tamụnọ, ị̀ kụrọtẹ ḍụaḅọ, ị́ ị̀ gbaịn ḅọrọma tẹ ọmụ ḅio ḅụ.

⁸ KỊNỊNYANAḄỌ, ḍụkụ tẹ si-sịḅịḅio-sụapụ ma in ḅiiarị ye nyana ma; ḍụkụ tẹ in ḅiyarị aḅẹrẹ ma sịḅị-nyana ịn pịrị ma.

⁹ Ḍụkụ tẹ owu si kẹ ị̀ tọn apụ ma ḅara iḅim; mịẹ tẹ ịn kẹ ị̀ ẹrẹmarị aị ma ịna aḅụụ ẹrẹ paka.

¹⁰ Yee kọrịarị anyịmgbọ ịna ọgọnọ ọsụ sara; yee ini ịn kẹ gbala-gbala ịn paka-ḅo ḅịa olulu ḅio gbin suu.

¹¹ Yee iruo aị kẹ jen-apụ sịḅị sịn-arị apụ ma ḍuko ye sọ ịn pịrịm; yee siye, kụrọ-ḅara mịẹ tẹ kịnị-ḅaapụ ma kuun-sịẹma tẹ ịn ḅaa guluguluma.

¹² KỊNỊNYANAḄỌ, à nimi wararị mịnẹ í igoin-apụ ma jụ sọ tẹ ịn ḍụarị, pịkị sime mịẹ ḅẹ ọkụ ofori apụ ma pịrị akiri ma ḅụ sọ.

¹³ Karakara-ḅara-ḅụ, karakaraye-mịẹapụ ma í tokini ḅa; ini í sime anga ḅụ anga ḅa.