Devidi-Anume 14 - FỊAFỊA BAỊBỤLỤTomina Si-sịḅịḅio ( Dev 53 ) 1 Oḅori atomi ma amịna aḅụụ ḅẹẹarị, “Tamụnọ ofori.” Inimgba ḅụrụ-kọsị fama wararị, tẹ ịn ḅalafama aị mịẹ tẹẹ; kuraye mịẹarị gbọrụḅọ-sọ ofori. 2 KỊNỊNYANAḄỌ ḅe So-ḅio sime tẹ tomikiri ḅẹ atomi ma ḍikiarị ịna ḅụ ò ye-nimi gbọrụḅọ ẹrị ḅẹ ḅoto, kpọkpọ gbọrụḅọ tẹ sunsin ọ̀ pịrịarị ḅọ emi ḅoto. 3 Kụma inimgba iri-aị mịẹ tẹẹ; inimgba gbọrụ ḅara kẹ si wararị. Ịna ḅụ kuraye mịẹarị gbọrụḅọ-sọ ofori, kpọkpọ gbọrụḅọ-sọ ofori. 4 KỊNỊNYANAḄỌ gbelarị, “In nimi-a aro? Mịna si amịẹaị ma mịẹarị apụ mamgba ye nimi-a apụ aro? Ini ị̀ atomi ma fọịn, fọịn tẹ kẹ angarị, tẹ gbala-gbala ini ị̀ tẹkẹ, tẹkẹ-a.” 5 Kụma ọkọẹrẹsị kịnị ịna tẹmẹ-naịn-naịnma ḅa, Tamụnọ ọ̀ ḅịḅị pokiarị apụ ma na emi. 6 Si-amịẹaị mịẹarị apụ ḅụụ iderima tomḅọ ḅe tọn-arị aị ma simarị, kụma KỊNỊNYANAḄỌ ḅe anie ọ̀ ḅụụ-ḅọị-yọ. 7 À tẹkẹ lamarị mịnẹ owu-ḅara-iḅi ḅo Izirẹlị pịrị ḅa Zayọnị ḅụ. Izirẹlị kpọma ḅioḅẹlẹ ḅa KỊNỊNYANAḄỌ ḅe mịẹ tẹ in siin lolo sakị. |
(C) The Bible Society of Nigeria
Bible Society of Nigeria