Devidi-Anume 139 - FỊAFỊA BAỊBỤLỤ

Tamụnọ Nimi Kọnmaye Ofori; Ọ̀ Pịkị Ọ̀ Tẹmẹ Aị Ma Balarị

¹ KỊNỊNYANAḄỌ, í ì pekele-ḍiki tẹ ì nimi wararị.

² À mịẹarị ye goyegoye í nimi wararị; iḅere-iḅerea anga ḅụ í sime tẹ à kuromarị aị mamgba fiearị ye nimiarị.

³ Ị́ ị̀ ẹrịarị, à nama kọrịarị-o, arị ịnyọsararị-o; à mịẹarị aị mamgba í nimi wararị.

⁴ Tẹrẹmẹ àrị ẹkwẹn sọ, ị́yẹrị tarị à ḍuko ḅarịye nimi ḅọrọma tẹẹ.

⁵ Í ì ikelema-koro wararị pakịrị, pakịrị mamgba ḅẹ; ị́ ị́ kụrọ kẹ ị̀ gbaịn-arị.

⁶ Ị́ kẹ ị̀ nimi ḅara mẹ pokolo ḅaka; àrị anị fiearị ye naa ḅẹ ḅara nẹngị ḅụram.

⁷ Àrị inetẹ tọ-anga mu tẹ ị́ ḅara gbarị ḅẹ? Àrị inetẹ mu tọ-anga la tẹ ị́ paka ḅịa?

⁸ Àrị iwo So mu-muu, anịanga í emii; à ḍuḅu ḅio ḅụ ḅọlọlọ sime sọ, anịanga í emii.

⁹ À fiin so mu ịrụa mẹ saakị paka-ḅoarị anga mẹ ḅọrọ sọ, anịanịa anị tuuideriarị anga mẹ ḅụ ala tẹịn anga mẹ ḅụ anga sọ,

¹⁰ ị́ anịanga sime tẹ ị̀ tọrọkọ tarị ḅẹ; ị́ anịanga sime tẹ ḅarasụa ị̀ pịrị ḅa.

¹¹ Àrị inetẹ kanakana ḅẹ tẹ anị ị̀ ḅọị ḅẹm anịanịa ì ikelema-koro wararị bele mẹ ḅẹ tẹ anị ḍin sọ ḅẹm,

¹² kụma ị́ ḅụụ kanakana mẹ kanakana-a, ị́ ḅụ ḍin mẹ eneḅaka mẹ ḅịya ḅara ḅịyarị. Ị́ ḅụụ kanakana na bele na gbọrụ ḅara.

¹³ Ị̀ ḅụụ simearị pakịrị, pakịrị ma tẹmẹ; arị kẹ ḅo gbolomam ì iyingi furo ḅio.

¹⁴ Àrị ị́ tokiniarị, í mangịma na-iḅim ẹrẹsị; ị́ mịẹarị aị mamgba kịrịm, pịkị ḅụụ-buamam. Àrị ì ḅioḅẹngbọ mamgba kẹ nimi wararị.

¹⁵ Ì mgbe ma ḅo ọrụ tọn-arị sakị, bala ḅara ḅụ àrị ì iyingi furo ḅio gbolomarị sakị, à ḅọị ḅara kẹ ḍụḅarị sakị, ị́yẹrị mie àrị anịanga simem mẹ nimi yee;

¹⁶ ị́ ị̀ ẹrị tẹrẹmẹ àrị iyi paka-ḅom. Sime ị̀ pịrị aḍin ma arịmgba í ḍiri ḅio kẹ korom, tẹrẹmẹ arịḅẹ gberie kịngẹ sọ saakị sakị lam.

¹⁷ Yei Tamụnọ, à mịẹ tẹ í ḅioḅẹngbọ simearị aị ma nimi ḅẹ ọkụ ofori; arị ḅaka ḅara ḅakam!

¹⁸ Àrị arị kịẹnm ḅẹ kụma, arị onwin mgbọlị, mgbọlị kịẹn-ḅịḅị nẹngị ḅa. À mono ḅụ saakị, sakị à paa ị́ na emi.

¹⁹ Yei Tamụnọ, à ḅii lamam mịnẹ í si-sịḅịḅio-sụapụ ma ḅaa! À kpọma ḅii lamam mịnẹ ị́ kụrọ-ḅara kẹ kịnị na mịẹ tẹ ọmbie ọsụmarị atomi mịẹ tẹ ini ị̀ ḅụụ wẹrị sikima!

²⁰ In si-sịḅịḅio-sụapụ ẹkwẹn kọn-arị í gboloma ye ḅụ, in si-aị ḍuko ị́ ẹrẹ ọgọnọ gbanarị.

²¹ Yei KỊNỊNYANAḄỌ, àrị í ḍiki-ḅioḅuarị apụ ma ḍiki-ḅioḅu la ḅara ḍikii! À kọngọ kụrọma ị́ pịrịarị apụ ma ḍiki-sima la ḅara ḍikii!

²² Àrị in ḍiki-ḅioḅu kọnma-a; àrị ịn kẹ si kẹ ị̀ tọn-arị apụ ḅara ọkịarị.

²³ Yei Tamụnọ, ì pekele-ḍiki tẹ ì kuroma nimii; ị̀ daaḍiki tẹ ì ḅioḅẹngbọ sime aị ḍọkị-ẹrị.

²⁴ Ị̀ ḅụụ ḅio sime si, si ḍọkị-nimi tẹ ị̀ datụkụma mu sime gbamaso etela mẹ ḅio suu.