Devidi-Anume 138 - FỊAFỊA BAỊBỤLỤ

Ịmịẹtẹ Ḅẹ Tẹkẹ

¹ KỊNỊNYANAḄỌ, àrị ì ḅioḅẹngbọ mamgba kẹ ịmịẹtẹ kẹ ị́ ḅara; papaa atamụnọ ma tọrọkọ à nume-su í tokiniarị.

² À tọrụ-pịkị ị́ fịafịa Warị mẹ da wararị, àrị iḅo tẹ ị́ ẹrẹ mẹ tokiniarị í kuno-a ḅẹlẹma mẹ na ḅioḅẹngbọ kẹ ị́ ḅụụ ḅụ gbana na-iḅim mẹ na ẹrẹsị, í ḍie pakama tẹ mịnẹ ị́ ẹrẹ na ị́ tọn kuroma aị ma na ḍụḅa tẹịnm mẹ na ẹrẹsị.

³ Àrị ị́ sịn sakị ị́ ị̀ ḅịḅị ọkị; ị́ ị́ ịnyọ kẹ ị̀ mịẹ kuromam.

⁴ KỊNỊNYANAḄỌ, tomikiri ḅẹ amadapụ mamgba í tokini ḅa, ini í minini ị́ atomi pịrị-aị ma naa tẹ ẹrẹsị.

⁵ Ini ị́ mịẹ tẹ ye mẹ gboloma nume-su í boma ḅa pịkị í opu ebube mẹ gbolomaye na.

⁶ Tụkụmaye ị́ kpọma gele fa à wararị sọ, í iderima kiri sime apụ kẹ ye-sịn-arị, tẹ ḅụụ-gelema apụ ma inetẹ ị́ ḅụụ ịna aḅụụ ḅọị ḅịa.

⁷ Ḅụụ-fụka ḅo, ḅo ì ikelema-koro sakị, koro sakị í ì koko kpaịnmarị. Si kẹ ị̀ tọn apụ ma ịganịarị saakị ị́ ini na tụḅụrụarị tẹ ị́ kụrọ ḅụ ị̀ ḅọrọmarị.

⁸ Í minini tẹ ye goyegoye ị́ mịẹ ḅẹ; KỊNỊNYANAḄỌ, ị́ ḅẹlẹma sime gbamasom. Ị́ saakị tẹ kọrịnama mẹ kọrị busunumaa.