Devidi-Anume 135 - FỊAFỊA BAỊBỤLỤ

Tamụnọ Tokini Nume

¹ Ọ́ KỊNỊNYANAḄỌ ḅe tokinii! Ọmịnị KỊNỊNYANAḄỌ ḅe afịrịmẹnjịapụ, ọmịnị ori ẹrẹ tokinii,

² anie KỊNỊNYANAḄỌ Warị mẹ ḅio sịẹsimearị apụ ma, wamịna Tamụnọ-warị mẹ ḅio.

³ Ọ́ KỊNỊNYANAḄỌ ḅe tokinii, ori iḅim ẹrẹsị; ó nume su-su ori ẹrẹ tokinii, ori iḅi ḅara kẹ kịnị na mịẹarị ẹrẹsị.

⁴ Ori Jekọbụ sẹlẹ ọ̀ ḅụụ pịrịm, Izirẹlịapụ ma ori ịn kẹ ori atomi sọmam.

⁵ À nimim mịnẹ wa Nyanaḅọ ḅe ọ̀ ḍụḅam, ọ̀ ḍụḅa oru-atamụnọ mamgba nẹngịm.

⁶ Ọ̀ ḅụụ ḅẹlẹ ye ḅẹlẹ ye mie ọ̀ mịẹarị So-ḅio na kiri ḅio na, opu atọrụ ma ḅụ na pokolo ayọ ma ḅio na.

⁷ Tomikiri ḅe akunoma ma ḅụ mie ori erise oḅuto ma ọkị-ḅoarị; ọ̀ mịẹ tẹ so-ḅalapụ tẹ erise fiearị, tẹ nwẹnị ọ̀ fẹrụ mẹ pakama ḅoarị ori anị koko wẹrị yọ ḅụ.

⁸ Ijiputi ḅụ ọ̀ tarị iyi owiapụ mamgba ḅaam, tomi na nama amẹẹ na gbọrụ ḅara,

⁹ anịanga ọ̀ ḅụụ-buama-aị na ḅụụ-gbiripuma aị na mịẹm, kẹ amadaḅọ ḅe na ori opu atomi na fomu ḅẹm.

¹⁰ Ọ̀ tọnwa asịẹ fama tẹ kụrọ tẹ amadapụ ḅaam.

¹¹ Siyọnị, Amọrayịtị ḅẹ apụ amadaḅọ; Ọgụ, Basani ḅẹ amadaḅọ, na Kenanị ḅẹ amadapụ mamgba na.

¹² Ori ịna akiri kẹ ori atomi pịrịm, ori arị kẹ Izirẹlị pịrịm.

¹³ KỊNỊNYANAḄỌ, sakị mamgba tomi ḍuko wasama ḅa mịnẹ Tamụnọ; ḅụọ, ḅụọ mamgba ị́ kẹ ḅiokoroma ḅa.

¹⁴ KỊNỊNYANAḄỌ ḅe ori atomi ḍụa ḅẹ; ori ori afịrịmẹnjịapụ ḍiki sịḅị-jịrị ḅa.

¹⁵ Tomikiri ḅẹ asịẹ ma kẹ Tamụnọ ọkịarị aị ma seleḅa na golu na mie ịn kẹ arị mịẹ ye; tomina aḅara arị mịẹm.

¹⁶ Arị ḅịḅị nyana wararị, kụma arị inetẹ ẹkwẹn-a, tọrụngbọ so, kụma arị inetẹ ye ẹrị-a.

¹⁷ Arị ḅeri nyana wararị, kụma arị inetẹ ye naa-a, ịnyọ kịngẹ sọ arị inetẹ sara-a.

¹⁸ Yee ịn mịẹ apụ mamgba, tẹ ịn kẹ ḅiokpọmarị apụ ma ḅo ịn tẹmẹ wararị mḅudu ma na kịka!

¹⁹ Izirẹlị ḅẹ atomi, ọ́ KỊNỊNYANAḄỌ ḅe tokinii; ọmịnị Tamụnọ agbamịẹapụ, ọmịnị ò tokinii!

²⁰ Ọmịnị Livayị furo-ḅẹ-apụ, ọ́ KỊNỊNYANAḄỌ ḅe tokinii ọmịnị sunsin ọ̀ pịrịarị apụ mamgba ọmịnị ò tokinii!

²¹ Ọ́ KỊNỊNYANAḄỌ ḅe tokini Zayọnị ḅụ, Jeruselemu ò sime-yọ mẹ ḅụ. Ọ́ KỊNỊNYANAḄỌ ḅe tokinii!