Devidi-Anume 13 - FỊAFỊA BAỊBỤLỤ

Ḅarasụa Ḅii Tẹkẹ

¹ KỊNỊNYANAḄỌ, ị́ paa ị̀ kẹ ḅioḅọrọma mu tọ-sakị la ḅẹ? Gbamaso mụnọọ? Ị́ paa ị́ ḅụụ kikima ị̀ pịrị mu tọ-sakị la ḅẹ?

² À paa ḅụụ-fụka inema mu tọ-sakị la ḅẹ? Ḍin na, eneḅaka na ḅụ kururu paa ì ḅioḅẹngbọ ḅin mu tọ-sakị la ḅẹ? Si kẹ ị̀ tọn apụ ma paa ị̀ nẹngịma, nẹngịma, nẹngịma nwenii mu tọ-sakị la ḅẹ?

³ Yei KỊNỊNYANAḄỌ, ị̀ Tamụnọ, tọrụ pịkị ị̀ da tẹ ị̀ pakịrị ya! Mịẹ à siin ịnyọ nyana; ḍụkụ tẹ à fịị ma.

⁴ Ḍụkụ tẹ si kẹ ị̀ tọn apụ ma ḅẹẹ ma, “Wa ọ̀ nẹngịma tẹẹ.” Ḍụkụ tẹ ini ì ḍikiḍiki tẹ ḅioḅẹlẹ ma, à ḅịkị ye gotẹ.

⁵ Àrị í kuno-a ḅẹlẹma mẹ ḅụ sịrẹrẹ wararị, à ḅioḅẹlẹ ḅa ị́ pụkọ-pakamaḅo ḅarị mẹ ẹrẹsị.

⁶ Yei KỊNỊNYANAḄỌ, à nume-su í boma ḅa, í iḅi kẹ ị̀ mịẹ tẹ ẹrẹsị.