Devidi-Anume 116 - FỊAFỊA BAỊBỤLỤFịị Ḅio Paka-ḅo Ḅọ Tamụnọ Tokiniarị 1 À KỊNỊNYANAḄỌ ḅe ḅẹlẹmarị, ori ị̀ naarị ẹrẹsị; ori ị̀ atẹkẹ pokiarị. 2 Ori ì pokiarị arị ọ̀ sịn-arị sakị goyegoye. 3 Fị kụrọ ḅo ì ikelema-korom; ḍuḅu ḅalafa ḅo ị̀ bịan-sịẹm; tẹ ḅalafa na ḅụụ-ḅalaḅala na ị̀ ḅụụ ḅio ḅinm. 4 Anịtẹso à nwẹnị KỊNỊNYANAḄỌ ḅe sịn, “KỊNỊNYANAḄỌ, sisi àrị ị́ tẹkẹm, ị̀ ḅọrọmaa!” 5 KỊNỊNYANAḄỌ ḅe ori ọkụrụkụrụ nyanam, ọ̀ pịkị iḅim; wamịna Tamụnọ ḅe ọ̀ lọkọma kịnị na mịẹarị. 6 KỊNỊNYANAḄỌ ḅe ọ̀ ḅarasụa-pịrịḅọ nyana-a ḅọ mẹ gbaịn-arị; à siye kẹ ị̀ mịẹ ḅẹ ye ḅio sọ sakị ori ị̀ ḅọrọmam. 7 Ì ḅioḅẹngbọ, ḅiokpọ nyana-a, KỊNỊNYANAḄỌ ḅe iḅi ḅara kẹ ị̀ na mịẹ tẹ ẹrẹsị. 8 KỊNỊNYANAḄỌ ḅe fịị ḅụ ị̀ ḅọrọmam; ori ị̀ tọrụ owu minji siinm, tẹ ḍụkụ tẹ owu ị̀ ḅara si-a. 9 Anie ḅụ à KỊNỊNYANAḄỌ ḅe tọrọkọ ḅụ mẹnjịarị ḍumo wararị apụ tomikiri mẹ ḅụ. 10 “Ịn gbọrsịḅị ị̀ gbẹẹ kọsịma tẹ,” nwẹn ḅẹẹ sakị mẹ sọ, à paa minini kụrọma wararị, 11 à ḅalafa tẹ ḅẹ sakị mẹ sọ, mịnẹ, “Tomḅọ tẹ inetẹ ḅioḅẹngbọ-kẹ-sịrẹrẹ-niḅi gbọrụḅọ-sọ ofori.” 12 Arị inetẹ tiye kẹ KỊNỊNYANAḄỌ ḅe pịrị ḅẹ ọ̀ kẹ ị̀ na anga iḅi ḅara mamgba ḅụ? 13 À ḅo iru kẹ agba mịẹ ọ̀ pịrị ḅa, tẹ ọ̀ kẹ ị̀ ḅọrọma ye mẹ ḅẹ ịmịẹtẹ kẹ ọ̀ ḅẹ ḅa. 14 Ori atomi mamgba kobiri wararị anga mẹ ḅụ àrị à minini ye kẹ ọ̀ pịrị ḅa. 15 Ori atomi ma ḅẹ gbọrụḅọ fịị kụma anị kpọma KỊNỊNYANAḄỌ ḅe ḅụụ ịnọarị ḅara ḍiki! 16 KỊNỊNYANAḄỌ, yẹrị ị́ fịrịmẹnjịḅọọ; àrị ị́ fịrịmẹnjịarị, ì iyingi mịẹ gbọrụ ḅara mẹ. Ị́ fịị ḅụ ị̀ ḅọrọma tẹ. 17 Àrị ịmịẹtẹ agba mịẹ ị́ pịrị tẹ ị́ tẹkẹ ḅa. 18 Arị à minini KỊNỊNYANAḄỌ ḅe pịrị ịlọ suma ḅa ori atomi mamgba tọrọkọ ḅụ. 19 KỊNỊNYANAḄỌ ḅe Warị ḅio Fịafịa yọ mẹ ḅụ, í ogboku ḅụ, yei Jeruselemu. Ọ́ KỊNỊNYANAḄỌ ḅe tokinii. |
(C) The Bible Society of Nigeria
Bible Society of Nigeria