Devidi-Anume 113 - FỊAFỊA BAỊBỤLỤ

Kẹ KỊNỊNYANAḄỌ Ḅẹ Iḅi Mẹ Ḅẹ Tokini Nume

¹ Ọ́ KỊNỊNYANAḄỌ ḅe tokini! Ọmịnị KỊNỊNYANAḄỌ ḅe afịrịmẹnjịapụ, ọmịnị ori ẹrẹ tokinii!

² Kịnị ori ẹrẹ mẹ tokini ḅa, mịọkụ na ḅẹẹ-sakị ḅẹẹ-sakị na ḅụ.

³ Ịrụa mẹ puu-paka-ḅoarị anga ḅụ ọkị mu anị tuuideriarị anga la, ọ̀ KỊNỊNYANAḄỌ ḅe ẹrẹ mẹ tokinii.

⁴ KỊNỊNYANAḄỌ ḅe ḅẹrẹtọn sịẹ-sịẹ mamgba pịrịarị; ori ebube So-ḅio emi.

⁵ KỊNỊNYANAḄỌ wamịna Tamụnọ ḅe kịka ḅọ ofori, So-ḅio mie ori angarị;

⁶ kụma ò tuu tẹ So ma na Kiri mẹ na ẹrịarị.

⁷ Ọ̀ fọọn ḅio igoinḅọ ḅe saakị pakama ḅoarị; mịẹ ọkụ ofori tẹ sịḅị-jịrịma kiri ḅụ emi apụ ma ori ịn saakị-gelemarị

⁸ tẹ ịn mịẹ tẹ ini amadapụ awọmẹ na mẹnjịarị, ori atomi ma amadapụ awọmẹ ma.

⁹ Ọ̀ mịẹ tẹ tụḅọ iyi-a taḅọ ma kụn nyanarị á warị ḅio; ọ̀ mịẹ tẹ á ḅioḅẹlẹarị awọ kẹ á pịrị ḅụ. Ọ́ KỊNỊNYANAḄỌ ḅe tokini!