Devidi-Anume 112 - FỊAFỊA BAỊBỤLỤ

Iḅi Tomḅọ Nyana Ḅioḅẹlẹ

¹ Ọ́ KỊNỊNYANAḄỌ ḅe tokinii! Ḅioḅẹlẹ sime KỊNỊNYANAḄỌ ḅe kụn-arị ḅọ mẹ pịrịm, anie ọ̀ tọn aị poki tẹ mịẹ mẹ ḅụụ-ḅẹlẹ arị ḅọ mẹ.

² Iḅi tomḅọ ḅe awọmẹ amakiri mẹ ḅụ kụrọ nyana ḅa, ò furo-ḅẹ-apụ ma bomatẹ apụ sọ ḅa.

³ Ọ̀ warị-suku mẹ pịrị tẹ kọn ḅa, tẹ ọ̀ lọkọlọkọ mu ḅẹẹ-sakị ḅẹẹ-sakị la ḅa.

⁴ Iḅi atomi ma bele ḅịya ịn saramarị kanakana ḅio, ini tẹ ọkụrụkụrụ na iḅi-yemịẹ-ḅara nyana kịnị pịrị tẹ kịnị-inoma-a apụ anie anị ọkọ sime pịrịarị.

⁵ Ḅioḅẹlẹ sime-ḅara-sarasarama iḅi ḅara kẹ igbigi kẹ kịnị ḅọlọarị ḅọ mẹ pịrịm, anie jen tomḅọ mingirima-a ḅara kẹ amịna tuḅokọn ḅọ mẹ.

⁶ Iḅi ḅọ mẹ gbala-gbala mḅọ ḅịkị ḅịa; kịnị sakị mamgba mḅọ kẹ ḅiokoroma ḅa.

⁷ Ò si ọkị-ḅo ò ḅeri la ḅẹ ḅalafa kọn kọn-a; ò minini kụrọ wararị, tẹ ọ̀ KỊNỊNYANAḄỌ ḅe kẹ ḅiokpọmarị.

⁸ Ọ̀ ḅụụ-ḅalaḅala nyana nyana-a, anịanịa ḅalafaa; ò ḅio-maaịn-tọn-tọn-a mịnẹ, mịẹ ḅara mịẹ ḅara sọ, owu si kẹ ọ̀ tọn apụ ma ḅara sii ḅa.

⁹ Mịẹḅẹ-ọkụ-ofori apụ ma ḅara sarasara ḅara mie ọ̀ kẹ ye kẹ ịn pịrịarị, tẹ ori iḅi-yemịẹ-ḅara mẹ gbarị-gbarị-a; ọ̀ kụrọ nyana ḅa, tomi pịkị ọ̀ mangịma ḅa.

¹⁰ Si-sịḅịḅio-sụa apụ ma miemẹ ẹrị tẹ ịganịarị, in ḍiki-ḅioḅu kẹ bio-bioma ḍiki tẹ so tẹ kịnị ḅarị ini ẹrị-a, ịn kẹ ḅiokpọma sime aị ma fa gbamaso tẹ.