Devidi-Anume 111 - FỊAFỊA BAỊBỤLỤ

Kẹ KỊNỊNYANAḄỌ Ḅe Tokini Nume

¹ Ọ́ KỊNỊNYANAḄỌ ḅe tokinii! Àrị ì ḅioḅẹngbọ mamgba kẹ ịmịẹtẹ kẹ KỊNỊNYANAḄỌ ḅe ḅẹ ḅa ori atomi kobiri wararị anga ḅụ.

² KỊNỊNYANAḄỌ ḅe mịẹarị aị ma ḅụụ-buama la ḅara ḍikii! Arị ḅụụ-ḅẹlẹ arị apụ mamgba arị fiearị ye nimi ḅẹ ḍọkịarị.

³ Ọ̀ mịẹarị aị mamgba kụn na ḅaka na arị ḅụ ḅin wararị; ọ̀ karakara mịẹ mẹ sime gbamasom.

⁴ KỊNỊNYANAḄỌ ḅe ḍụkụ tẹ wa ọ̀ ḅụụ-buama amịẹaị ma kẹ ḅioḅọrọma-a; ori iḅi ḅara kẹ kịnị na mịẹarị, ọ̀ pịkị ọkụrụkụrụ nyana wararị.

⁵ Ọ̀ kụn-arị apụ ma ọ̀ mịẹ tẹ ịn fị ḅẹ ye ḅo ịna ḅara laarị; gbala-gbala ori ori ọḅọkụ mẹ kẹ ḅioḅọrọma-ḅụrama-a.

⁶ Ori ọ̀ kụrọ kẹ ori atomi ma ḍie tẹ, ja sịẹ ḅẹ apụ ma akiri saakị ịn pịrị ḅụ.

⁷ Ḅioḅẹngbọ kẹ ḅụụ ḅụ gbana na-iḅi ḅara na inoma ofori ḅara na mie ọ̀ kẹ ye mamgba mịẹarị; ọ̀ tọn kuroma aị mamgba arị ḅụ sịrẹrẹ na-iḅim.

⁸ Arị sime mu ḅẹẹ-sakị ḅẹẹ-sakị laarị; karakara na karakara mịẹ na ḅụ mie ori arị kẹ tomi pịrịye.

⁹ Ori ori atomi ma mịẹ tẹ ini ịna asịḅị atomi sọm, pịkị sime gbamaso ọḅọkụ kẹ ini na fịm. Ori Fịafịa na opu kụrọ na Ḅọ!

¹⁰ Tomḅọ ḅọrọ tẹ nimi nyana ḅẹ etela anie kụn kẹ KỊNỊNYANAḄỌ ḅe pịrị; ori anie karakara ḅẹrẹkọn kẹ ọ̀ tọn kuroma aị ma poki tẹ mịẹarị apụ ma pịrịarị. Ini ò tokini gbamaso ḅa.