Devidi-Anume 109 - FỊAFỊA BAỊBỤLỤ

Ḅụụ-fụka Ḅio Emi Tomḅọ Ḍuko-sụa Mẹ

¹ Tamụnọ, arị í tokinim; sisi gbọsime ma!

² Si-sịḅịḅio-sụa atomi na iruo apụ na owu kẹ ị̀ paka tẹẹ. Ini ị̀ kẹ iruo kọn ma ḅọrọarị

³ tẹ ị̀ ḅụụ si-aị, si-aị ḍukoarị, tẹ kura-a ḅara kẹ owu kẹ ị̀ pakarị.

⁴ Ini ị̀ na tụḅụrụarị, yẹrị ịn ḅẹlẹmarị tẹ tẹkẹ ịn pịrịtẹ sọ.

⁵ À kẹ ịn mịẹarị iḅi ḅụ in si kẹ ị̀ gbẹẹarị, tẹ ḍiki-ḅioḅu kẹ ḅẹlẹma kiri ḍimarị.

⁶ Si ḅẹrẹkọnḅọ sẹlẹ pakama-ḅo tẹ kẹ si kẹ ị̀ tọn-arị ḅọ ḅe ḅẹrẹ kọn, yee si kẹ ọ̀ tọn-arị apụ ḅẹ gbọrụḅọ paka-ḅo tẹ ḅẹrẹ ḍuko ori ọgọnọ gbana.

⁷ Yee ini ọ̀ mịẹ siye ḍọkị nimi tẹ ḅẹrẹ-ḅarasii pẹlẹ ọ̀ pịrị; yee ini ọ̀ tẹkẹ-ḅịḅị sọ kẹ siye kịẹn ọ̀ pịrị!

⁸ Yee ò ḍumo ala-a kunoma; yee jen tomḅọ ọ̀ kọrịnama ọkị!

⁹ Yee ori awọmẹ ḍaḅọ ofori awọmẹ sọ, tẹ ọ̀ ta diḅọ-fịtẹ-ẹrẹḅọ sọ!

¹⁰ Yee ori awọmẹ sime-yọ nyana-a apụ sọ tẹ ịngịma ḅọrọ; yee kan sara tẹ warị tẹ ini angarị anga mẹ ḅụ sọ ini in dee-pakama!

¹¹ Yee ọ̀ ḅara ḅụ saa-fị apụ ò kiri mẹmgba ọkị, tẹ ọ̀ kọrịnama ḅụ kọrị ḅo ye, ḅo ye kịnị tọrụ-nimi-a apụ ọkị so.

¹² Yee gbọrụḅọ-sọ iḅi ḅara kẹ ori na angama, anịanịa ò kuroma tẹ fịị ḅarị awọmẹ ḍikiḍiki.

¹³ Yee ò furo-ḅẹ-apụ mamgba fịị fama, tẹ tọrọkọ ḅo ḅarị ḅụọ ḅẹ apụ ma ori ẹrẹ kẹ ḅioḅọrọma.

¹⁴ Yee KỊNỊNYANAḄỌ ḅe ori elemu aḍapụ ma sime si ḅara mẹ kẹ ḅiokoroma, tẹ gbala-gbala ò iyingi asi ma wẹrịso ma.

¹⁵ Yee KỊNỊNYANAḄỌ ḅe sakị mamgba ịna asi kẹ ḅiokoroma, inima ḅioju kụma, yee tomi gbọrsịḅị ịn kẹ ḅioḅọrọma fama.

¹⁶ Anị tomḅọ ḅe gbala-gbala ori iḅi anga kẹ kịnị na kọn ḅẹ kuroma nyana-a; ori igoin-apụ na, mịẹḅẹ-ọkụ-ofori apụ na, ḅarasụa pịrị apụ nyana-a apụ na ḅaa ḅẹ ḅọkọ ḍọkị tẹ ịn ḅaam.

¹⁷ Ò gbo-aị na karị-ai na ḅẹlẹmam — yee gbo-aị sime ọ̀ pịrị! Ọ̀ kịnị boma ḍiki-ḅioḅu-ḅum ḅẹ sakị — yee gbọrụḅọ-sọ pịkị ò boma ma!

¹⁸ Tomḅọ ḅịtẹ na kapa na kẹ mịẹ-mịẹye sọma tẹ kẹ ḅụụ-ḅirima ḅara, anie ò gbo-aị kẹ ọ̀ ḅụụ gbori ḅara, yee ori ḅarana gboarị aị ma minji kịka tẹ ori oju ḅio pisima sọ mu pịkị olo kịka tẹ sọ-mu ori mgbe ma la.

¹⁹ Yee arị kapa kịka tẹ ọ̀ gbaịn tẹ sakị mamgba ḅiri-ponoye kịka tẹ ori ikelema-koro.

²⁰ KỊNỊNYANAḄỌ, anị ḅara ḅẹ fomu-ḅara kẹ si kẹ ị̀ tọn apụ ma pịrịị; ini ma tẹ nwẹn sime si-aị kẹ ị̀ ḅarị apụ ma!

²¹ Kụma, KỊNỊNYANAḄỌ, ị̀ Tamụnọ, ḅarasụa ị̀ pịrịị, í minini ị̀ pịrị ḅara ḅụ; tẹ ị̀ pụkọ-pakamaḅo ị́ ḅẹlẹma mẹ ḅẹ iḅi ẹrẹsị.

²² Yẹrị igoinḅọ, mịẹḅẹ-ọkụ pịkị ị̀nịna oforii; ị̀ la ye mẹ ideri-mu ị̀ ḅioḅẹngbọ la tẹẹ.

²³ Ḅoḅiri-so ḅẹ ịrụa ḅịya ye sarama tẹ tọn tẹ ala-a ịmaịn-faarị tẹmẹ mie à kịkarị, fẹrụ fie tẹ tangbolo dogi-so ḅara mie anị sime ị̀ pịrị ḅara.

²⁴ Ị̀ aḅụọ-kụkụ ma ḅarị ịnyọ nyana-a, à fịye ẹrị fị-a gotẹ; oju ḅẹ apara na mgbe ma na ngẹrị mie ị̀ ḅụụ kọn ye.

²⁵ Kịnị ị̀ ẹrị sakị, sakị, ini ị̀ ḍẹrịarị; ini ịna sịḅị jike tẹ ị̀ ḍiki iderimarị.

²⁶ Yei KỊNỊNYANAḄỌ, ị̀ Tamụnọ, ḅarasụa ị̀ pịrị; í kuno-a ḅẹlẹma ẹrẹsị, ị̀ ḅọrọmaa!

²⁷ Mịẹtẹ si kẹ ị̀ tọn apụ ma nimi mịnẹ ị́yẹrị anie ị̀ ḅọrọmarị ḅọ ḅee.

²⁸ Yee ini ye gbo ị̀ pịrị, kụma ị́yẹrị ì boma ḅa. Yee owu ị̀ ḅaa ḅẹ ḍọkịarị apụ ma ḅara si, tẹ yee yẹrị, ị́ fịrịmẹnjịḅọ ḅe, ḅioḅẹlẹ.

²⁹ Yee si kẹ ị̀ tọn apụ ma tọrụ-tuu; yee ịn ḅụụ-jịrị kẹ kapa kịkama tẹ sụa.

³⁰ Àrị oloku-oloku ịmịẹtẹ kẹ KỊNỊNYANAḄỌ ḅe ḅẹ ḅa; àrị ò tokini ḅa ori atomi ma kobiri ḅụ,

³¹ ori igoinḅọ ḅe ḍụa tẹ ḅaa ḅẹrẹ-pẹlẹ ori ọgọnọ gbanarị apụ ma ḅara-ḅio ọ̀ ḅọrọmarị ẹrẹsị.