Devidi-Anume 108 - FỊAFỊA BAỊBỤLỤ

Si Kẹ Ịn Tọn Apụ Gotẹ ḅarasụa Ḅii Tẹkẹ

¹ Yei Tamụnọ, à ḅiokpọ fama tẹ! À nume su-su í tokini ḅa! Ị̀ tẹmẹ, naa saakịị!

² Ị̀ ọbọ na jen nume farị-farịye na, ọ̀ naa saakịị! Àrị ịrụa mẹ sịn saakị ḅa.

³ Yei KỊNỊNYANAḄỌ, àrị ịmịẹtẹ kẹ ị́ ḅẹ ḅa sịẹ-sịẹ ma ogboku, àrị í tokini ḅa tomi ma ogboku.

⁴ Í kuno-a ḅẹlẹma mẹ iwo mu So ọgọnọ-jụ laarị ḅioḅẹngbọ kẹ ị́ ḅụụ ḅụ gbana na-iḅim mẹ iwo mu So-tọrụ mẹ laarị.

⁵ Yei Tamụnọ, mịẹ tẹ kịnị í opu ẹrị So-tọrụ ḅụ, pịkị í ebube na bebe tomikiri mẹ ḅụ.

⁶ Í opu kụrọ kẹ wa ḅọrọma; ị̀ tẹkẹ pakịrị, mịẹ tẹ ị́ ị́ ḅẹlẹmarịapụ ma pụkọ-pakamaḅo ḅarị ḅara.

⁷ Ọ̀ fịafịa yọ mẹ ḅụ mie Tamụnọ sime tẹ ḅẹ ye, “Owu-ḅara-iḅi alalị ḅụ à Sẹkẹmụ puu ḅaa tẹ pịkị Sukọtị Tụndụ ḅẹ lẹsẹrẹ-kiri mẹ kẹ ḍiema ị̀ atomi pịrị ḅa.

⁸ Yẹrị Giliyadi nyanam, Manasẹ sọ ì nye; Iferemu anie ì okpoko-sun tẹ Juda nwẹnị ị̀ ama-da mkpara.

⁹ Kụma à Mohabụ kẹ ị̀ ḅara sịkịrị panị mị tẹ ì okuro kẹ Idọmụ ḅụ wakị kuroma ḅa, kẹ ḍie pakama mịnẹ yẹrị anị nyanam. Àrị owu ị̀ ḅara iḅi tẹ ḍereku ḅa, Filisiteniapụ ma gotẹ.”

¹⁰ Yei Tamụnọ, tụḅọ ị̀ kẹ ḅụụ tẹlẹma kụrọma ọmụ pịrị wararị opu ama mẹ ḅio sọ mu ḅẹ? Tụḅọ ị̀ tọrọkọ tarị tẹ ị̀ kẹ mu Idọmụ sịẹ mẹ la ḅẹ?

¹¹ Karakara-ḅara-ḅụ ị́ wa sịkị tẹ aro? Ị́ ḅarị wamịna ọmụ ogbo-ogbo ma na mẹnjị paka ḅịa aro?

¹² Si kẹ wa tọn apụ ma ḅụ ḅarasụa wa pịrị; tomina ḅarasụa anie papaaye.

¹³ Tamụnọ wamịna jụ emi ogbo wa ịn nẹngịma ḅa; ọ̀ mịẹ tẹ owu si kẹ wa tọn apụ ma ḅara si ḅa.