Devidi-Anume 107 - FỊAFỊA BAỊBỤLỤ

SỌNỌ KARAMA ḌIRI (Nume 107—150) Kẹ Tamụnọ Iḅi Tokini Anume

¹ Ịmịẹtẹ kẹ KỊNỊNYANAḄỌ ḅe ḅẹẹ, ori iḅim ẹrẹsị; ọ̀ ḅẹlẹma sime gbamasom!

² Ó siin mịna ẹkwẹn ma gotẹ KỊNỊNYANAḄỌ ḅe tokinii ọmịnị ọ̀ ḅọrọma tẹ apụ mamgba. Si kẹ ọ́ tọn apụ ma ḅara-ḅio ori ọ́ pụkọ-pakamaḅo tẹẹ

³ jen asịẹ ḅụ ori ịn pịkịma-ḅo tẹẹ, ịrụa saakị paka-ḅoarị anga mẹ ḅụ na anị tuuideriarị anga mẹ na, ọgọnọ-jụ na suku-jụ na.

⁴ Japụ mẹnjị-ḅọrọ-anga ofori gotẹ ịkpa mẹ ḅio ikele-ikelem tẹ inetẹ etela ẹrị tẹ mu ama ḅio sọ tẹ anga-a.

⁵ Ḅuru na minji na ịn tarịm tẹ in ḅiokpọ goyegoye ḅụ ḅara-siinm.

⁶ Anịtẹso ịna ḅụụ-fụka ḅụ ịn KỊNỊNYANAḄỌ ḅe sịnm tẹ ori ịna ḅụụ-ḅalaḅala ḅụ ịn ḅọrọmam.

⁷ Ò gono-gono etela ḅụ tọrọkọ-sụn ịn pịrị mu ini inetẹ anga ḅẹ ama lam.

⁸ Anị ịna kiri ịmịẹtẹ kẹ KỊNỊNYANAḄỌ ḅe ḅẹ, ò kuno-a ḅẹlẹma mẹ na ḅụụ-buama-aị tẹ ọ̀ mịẹ ịn pịrị-aị na gotẹ.

⁹ Minji ḅuu pọkọ-tarịarị apụ ma ori ịn pịrị ḅuu gbasịmarị, tẹ iḅi aị kẹ ḅuru pọkọ-tarịarị apụ ma pịrị fị furo ḅinmarị.

¹⁰ Japụ furu na kanakana na ḅio anga simem, ikoliapụ tẹ ini ikoli kẹ ịkasị kuroma tẹ tọrụsiẹrị sime apụ,

¹¹ ịn kọngọ kụrọma kụrọmamgba Nyana Tamụnọ ḅe tọn kuroma aị ma pịrị tẹ ẹrẹsị, tẹ ò ḍukom ịn mịẹ ḅẹ aị ma sịkịm.

¹² Ịn kụrọ kọrịnama kọrị nwenii tẹ ịna ḅụụ ḅio ịnyọ gbọrụmgbọ-sọ ḅarị ofori; ini anị kẹ ḅịkịm ḅẹ kụma, ḅarasụa ịn pịrị ḅẹ gbọrụḅọ-sọ pịkị ofori.

¹³ Anịtẹso ịna ḅụụ-fụka ḅụ ịn KỊNỊNYANAḄỌ ḅe sịnm, tẹ ori ịna ḅụụ-ḅalaḅala ḅụ ịn ḅọrọmam.

¹⁴ Ori ịn pakama-ḅom ịna furu na kanakana na ḅio tẹ ịna ikoli ma anyịma kọsịma saram.

¹⁵ Anị ịna kiri ịmịẹtẹ kẹ KỊNỊNYANAḄỌ ḅe ḅẹ ò kuno-a ḅẹlẹma mẹ gotẹ, pịkị ọ̀ mịẹ ịn pịrị tẹ ḅụụ-buama-aị ma na gotẹ.

¹⁶ Ori ojo aḅọkọ kan saram, pịkị ikulele kịnị kiki aị gboloki saram.

¹⁷ Ịna ḅụ ḅẹ jen-apụ oḅori-sọ tẹ si-aị mịẹ tẹ anị ḅẹ tọrụsiẹrị kọnm, ịna si ḍumo gotẹ

¹⁸ ịn fịị-fịị ḅara sime tẹ gotẹ ịn ḅarị tọrụ kẹ fịye ẹrị ḅịa.

¹⁹ Anịtẹso ịna ḅụụ-fụka ḅụ ịn KỊNỊNYANAḄỌ ḅe sịnm, tẹ ori ịn ḅọrọmam ịna ḅụụ-ḅalaḅala ḅụ.

²⁰ Ọ̀ tọn tẹ ịn gwọọm, tẹ fịị ḅụ ịn ḅọrọmam.

²¹ Yee ini ịmịẹtẹ kẹ KỊNỊNYANAḄỌ ḅe ḅẹẹ, ò kuno-a ḅẹlẹma mẹ na ḅụụ-buama-aị tẹ ọ̀ mịẹ ịn pịrị-aị ma na gotẹ.

²² Yee ini agba mịẹ-mịẹ ọ̀ pịrị ḅụ ịmịẹtẹ kẹ ọ̀ ḅẹẹ, tẹ ḍereku anume su-su tẹ kẹ ọ̀ kọrị tẹ aị mamgba ḍukoo.

²³ Japụ vala opu arụ kẹ abajị saḅam, tọrụ-minji ḅụ mie ịn pọkọ ḍọkị ḍọkị ye ẹrẹsị.

²⁴ Ịn tọrụngbọ kẹ KỊNỊNYANAḄỌ ḅe inetẹ mịẹ ḅẹ ye ẹrịm, ọ̀ ḅụụ-buama amịẹaị ma abajị ma ḅio ḅụ.

²⁵ Ọ̀ tọn tẹ kụrọ fẹrụ saakị fie tẹ ọnụngọ pakamam.

²⁶ Dogi ọnụngọ ma opu vala arụ ma dogi iwomam pịkị arị iderimam. Ọkọ sime kụrọ ye ḅio ḅụ ḅiokpọ tomi ma ḅụ faam;

²⁷ ini iru tọrụ-ḅaa apụ kịka tẹ pụmbụma-pụmbụma tẹ gboloki-gbolokim tọrụ-dọkụ aka tẹ in nimi ye, nimi ye papaa ye sọm.

²⁸ Anịtẹso ịna ḅụụ-fụka ḅụ ịn KỊNỊNYANAḄỌ ḅe sịnm, tẹ ori ịna ḅụụ-ḅalaḅala ḅụ ịn ḅọrọmam.

²⁹ Ọ̀ ḍụrụkụarị erise mẹ deinmam, tẹ ọnụngọ mẹ nwẹnị yaụ-sime.

³⁰ Dein pakaye mẹ ịna ḅioḅẹlẹmam, tẹ ọ̀ nwẹnị ye ḅụụ la-a ḅara kẹ ịn kẹ mu ịn sọma ḅẹ-ḅii pọkụ mẹ lama.

³¹ Anị ịna kiri ịmịẹtẹ kẹ KỊNỊNYANAḄỌ ḅe ḅẹ, ò kuno-a ḅẹlẹma mẹ na ḅụụ-buama-aị tẹ ọ̀ mịẹ in pịrị aị ma na gotẹ.

³² Anị ịna kiri ori opu mẹ ḍuko-pakama ori atomi ma kobiri-ogbo ḅụ tẹ ò tokini sịḅịdapụ ma ḅịḅị-ọkịyarị anga ḅụ.

³³ KỊNỊNYANAḄỌ ḅe mịẹ tẹ tọrụ ma kụlụkụlụ-kpaịkpaịarị, tẹ ngụngụḅa ma ḅio minji ḅarị mẹnjị-mẹnjị paka ḅo-a.

³⁴ Ọ̀ mịẹ tẹ ye pakama-pakama kiri ḅo fụn-fụn-fụn simearị ịkpa sọm anị yọ anga apụ sụa si-sịḅịḅio gotẹ.

³⁵ Ori ịkpa ma mịẹ tẹ arị ḍaḅa-ḍaḅa nyanam tẹ samụnọ kiri mẹ kẹ ngụngụḅa-ngụngụḅa mịẹm.

³⁶ Ọ̀ mịẹ tẹ ḅuru pọkọ tarị sime apụ anị yọ anga tẹ opu ama pakama tẹ anị ḅio simem.

³⁷ Ịn fịaị ḍiḅi akiri ma ḅụ kụrọ asịn ḍiḅim tẹ kpọma tọnwa aị kaịn ḅom.

³⁸ Ori ori atomi ma bomam, tẹ ịn tọnwa awọ iyim; ọ̀ ḍụkụ tẹ ịna opu anama ogbo-ogbo ma kịẹn-ḅịḅị ideri-a.

³⁹ Tamụnọ atomi ma ḅara owu si tẹ ini ịn kẹ iderima kiri ḅụ kuroma sakị, si ponoma ḅara na tọrụsiẹrị na ḅụ,

⁴⁰ ori in ponoma sime apụ ma ḍiki iderima tẹ mịẹ tẹ ịn mẹnjị-ḅọrọ-anga ofori ịkpa ma ḅio ikele-ikelem.

⁴¹ Kụma ọ̀ mịẹ ḅẹ ọkụ ofori apụ ma pụkọ-pakamaḅom in sime-sime sịḅị-jịrịma kiri mẹ ḅụ tẹ ịna awarị ma mịẹ tẹ arị anana ogbo-ogbo kama ḅara kamam.

⁴² Karakaraye-mịẹapụ ma miemẹ ẹrị tẹ ḅioḅẹlẹarị, kụma in si-sịḅịḅio-sụapụ ma ḅịḅị gbaịn tẹ.

⁴³ Yee ye-nimiapụ mịna aị ma kẹ kuroma ḅụ suu; yee ịn KỊNỊNYANAḄỌ ḅe kuno-a ḅẹlẹma mẹ kẹ elekima sụa.