Devidi-Anume 106 - FỊAFỊA BAỊBỤLỤ

Iḅi Ḅara Kẹ Ori Atomi Na Mịẹm

¹ Ọ́ KỊNỊNYANAḄỌ ḅe tokinii! Ịmịẹtẹ kẹ KỊNỊNYANAḄỌ ḅe ḅẹ, ori iḅim ẹrẹsị; ọ̀ ḅẹlẹma sime gbamasom.

² Tụḅọ inetẹ ọ̀ kọrị tẹ opu aị mamgba ḍuko ḅẹ? Tụḅọ inetẹ ò tokini kunoma ḅẹ?

³ Ọ̀ tọn kuroma aị ma poki tẹ mịẹarị apụ ma ḅioḅẹlẹ sime ịn pịrịm, anie sakị mamgba kuraye mịẹarị apụ ma.

⁴ KỊNỊNYANAḄỌ, ị̀ kẹ ḅiokoroma ị́ Ḅarasụa ị́ atomi pịrịarị sakị; ị́ ịn ḅọrọmarị sakị ị̀ kẹ sụa.

⁵ Mịẹtẹ àrị ị́ atomi lọkọlọkọ mẹ ẹrị, tẹ ị́ sịẹ mẹ na sọ tẹ ḅioḅẹlẹ, sime ị́ pịrị apụ ma kẹ ḅụụ-tọn-arị ḅioḅẹlẹ mẹ.

⁶ Wa si mịẹ tẹ wamịna elemu aḍapụ ma mịẹ ḅara; wa si-sịḅịḅio-sụa tẹ pịkị si tẹ.

⁷ Ijiputi ḅụ Tamụnọ mịẹ ḅụụ-buama-aị ma fie ye wamịna elemu aḍapụ ma ịn naa ḍin-a; ori ọ̀ ḅẹlẹma kẹ in ḍie tọnwa asakị ma ịn kẹ ḅioḅọrọmam, tẹ ịn nwẹnị kọngọ kụrọma Kụrọmamgba Nyanaḅọ ḅe pịrị Awụ Tọrụ mẹ ḅụ.

⁸ Kụma ori ịn ḅọrọmam, ò minini ḅara ḅụ, tẹ ori opu kụrọ mẹ kẹ kịnị ḍie ḅẹm.

⁹ Ọ̀ tọn Awụ Tọrụ mẹ pịrị tẹ anị fa kpalịkpalịm tẹ ọ̀ tọrọkọ-sụn ori atomi ma pịrị tẹ minji fa kpalịkpalịtẹ kiri mẹ ḅụ ịn mẹnjị saḅam.

¹⁰ In ḍiki-ḅioḅu apụ ma ḅara-ḅio ori ịn ḅọrọmam; si kẹ ịn tọn apụ ma ḅara-ḅio ori ịn pụkọ-pakamaḅom.

¹¹ Kụma minji mẹ si kẹ ịn tọn apụ ma sombi ḅaam, ịna ḅụ gbọrụḅọ-sọ ḅọrọ-a.

¹² Anịtẹso ori atomi ma nwẹnị ò minini ịn pịrị ḅara mẹ minini, tẹ nume su-su ò tokinii.

¹³ Kụma ala-a ịn pịkị ọ̀ mịẹ tẹ aị ma kẹ ḅioḅọrọma tẹ, koru tẹ ọ̀ ḅịḅị gbela-a ḅara kẹ ye mịẹ tẹ.

¹⁴ Ịkpa mẹ ḅio ye gotẹ lẹlẹ ịna ḅụụ ḅio sọ ḅinm, tẹ ịn Tamụnọ kẹ daaḍiki ḅụ suum;

¹⁵ anie ḅụ ori in ḅii ye kẹ ịn pịrịm, kụma ọ̀ pịkị si obi kẹ ịn fịrịmam.

¹⁶ Anịanga ịkpa mẹ ḅio ini afana tẹmẹ sụa Mozizi pịrịm, na Erọnị, KỊNỊNYANAḄỌ ḅe fịafịa fịrịmẹnjịḅọ ḅe na.

¹⁷ Anịtẹso kiri nwẹnị maaịn puu tẹ Detanị mẹnị ọkị tẹ Abiramu na ọ̀ warị ḅẹ apụ na ḍiḅi;

¹⁸ kọrị fịnị koro ḅo ịna jụ ḅẹ apụ ma ọgọnọ saram, tẹ ini si-sịḅịḅio-sụapụ ma dọkịma siin.

¹⁹ Sayịnayị ḅụ in golu kẹ nambulo oru fụḅara tẹmẹm, tẹ sunsin anị mḅudu ḅe pịrịm;

²⁰ ini osuka fịarị nama fụḅara kẹ Tamụnọ ebube mẹ kiri ḍimam.

²¹ Ini ịn ḅọrọma Tamụnọ ḅe kẹ ḅioḅọrọmam, kụrọ akọrịnama kẹ Ijiputi ḅụ ịn ḅọrọma ḅọ ḅe.

²² Ḅụụ-buama aị tẹ ọ̀ mịẹ aị ma ḍiki anịanga! Awụ Tọrụ mẹ ḅụ ọ̀ mịẹ ḅalafama opu aị ḍiki.

²³ Tamụnọ ori atomi ma ḅaa guluguluma ḅẹ tẹ ḍuko sakị, Mozizi, ori sẹlẹ ọkị tẹ fịrịmẹnjịḅọ ḅe, Tamụnọ kikim, tẹ ḍụkụ tẹ ori ịganị mẹ ịn ḅaa guluguluma-a.

²⁴ Anịtẹso ini iḅi amakiri mẹ sịkịm, ịn Tamụnọ minini ịn pịrịye mẹ minini-a ẹrẹsị.

²⁵ Ini ịna akpụrụ-awarị ḅio sime tẹ mbụrụmbụrụm tẹ ḅarị KỊNỊNYANAḄỌ ḅe poki-a.

²⁶ Anie ḅụ ọ̀ kụrọma ịna ḅeri nụnụm mịnẹ ọ̀ mịẹ tẹ ini ịkpa mẹ ḅio fịị ḅa,

²⁷ tẹ ịna awọmẹ ma gala-galama oru nimi apụ ma ḅio suu ḅa, tẹ ịn wẹrịso tẹ ịn ja asịẹ ḅụ sime tẹ fịị.

²⁸ Anịtẹso Pẹyọ ama ḅụ Tamụnọ atomi ma ama ḅẹ apụ ma ḅụ sọ tẹ sunsin Balị oru pịrịm, tẹ kẹ agbamịẹ ḍumo nyana-a oru-atamụnọ ma pịrị aị fịm.

²⁹ Ịna amịẹaị ḅụ ịn KỊNỊNYANAḄỌ ḅe ịganị jike saakịm, tẹ ḅalafama si obi nwẹnị ịna ogboku saakị.

³⁰ Kụma Finihasi saakị sịẹ tẹ fomu-ḅara kẹ si mẹ mịẹ apụ ma pịrị tẹ obi mẹ daasịẹm.

³¹ Miemẹ Anịngẹ-kụraḅio ini anị kẹ ḅiokoroma, kuroma tẹ iḅi kẹ ọ̀ kẹ gotẹ ḍukoarị, anie ịn pịkị anị gotẹ ḍuko mu ḅo ḅarị asakị mamgba la ḅarị ḅara.

³² Mẹrịba ḅẹ ngụngụḅa mẹ suku ịn mịẹ tẹ KỊNỊNYANAḄỌ ḅe ịganị tẹ Mozizi ịna sịḅị gotẹ ḅụụ-fụka ḅụ sọm.

³³ Ịn mịẹ tẹ ò ḅioḅẹngbọ si la ḅara ḅụ, ọ̀ dasịẹma-a tẹ kuroma-a ḅara kẹ ẹkwẹnm.

³⁴ Ini oru nimi apụ ma ḅaa-a, KỊNỊNYANAḄỌ ḅe tọn ịn pịrịm ịn mịẹ ḅẹ ḅara,

³⁵ kụma ini ini na ere-sime pịrịa-pịrịa tẹ Tamụnọ nimi-a apụ ama-anganga-aḅara kẹ ịna aị sọmam.

³⁶ Tamụnọ atomi ma sunsin oru-afụḅara pịrịm, tẹ miemẹ ịn ḅaa guluguluma ye sọm.

³⁷ Ịn nwẹnị ini furo ḅio iyi owiapụ-awọmẹ na eremịna-awọmẹ na kẹ agba mịẹ Kenanị ḅẹ oru-afụḅara ma pịrị.

³⁸ In mịẹ si ofori ḍọkọḍọkọ-awọmẹ ma ḅaam, tẹ arị akịnị-ḅa mẹ amakiri mẹ pilemam.

³⁹ Ịna amịẹaị ma ḅụ ịn ḅọrọtẹ ịna aḅụụ mịẹ kpaịn-a ḅara wẹrịm, tẹ ịn ḅarị Tamụnọ ḅụ ḅioḅẹngbọ-kẹ-sịrẹrẹ-niḅi ḅara sime-a.

⁴⁰ Anie ẹrẹsị KỊNỊNYANAḄỌ ḅe ịganị nyana ori atomi ma pịrị; ịna amịẹaị nwẹnị ọ̀ ḅụụ si lama.

⁴¹ Ọ̀ nwẹnị ịn kẹ gbin kuroma oru nimi apụ ma kụrọ pịrị, tẹ si kẹ ịn tọn apụ ma ḅẹrẹtọn ịn pịrị.

⁴² Si kẹ ịn tọn apụ ma in ponomam, tẹ ịn nwẹnị gbọrsịḅị ịna suku-ḅio sọ fama.

⁴³ Tọnwa sakị ḅụ KỊNỊNYANAḄỌ ḅe ori atomi ma pụkọ-pakamaḅom, kụma ịn kọngọ kụrọma ọ̀ pịrị sẹlẹ ọkị tẹ ḅara ḅụ, ịn si ḅụ sọ ḍiḅi, ḍiḅi, ḍiḅim.

⁴⁴ Anịsọ ini oloku pakama tẹ owu ọ̀ pịrị sakị KỊNỊNYANAḄỌ ḅe ịn naam, tẹ ori ịna ḅụụ-fụka mẹ kẹ elekima sụam.

⁴⁵ In gotẹ ori ori ọḅọkụ mẹ kẹ ḅiokoromam, tẹ ori opu ḅẹlẹma mẹ ẹrẹsị ọ̀ ḅara wẹrịm.

⁴⁶ Ọ̀ mịẹ tẹ ịn ponoma sime apụ mamgba in ḍiki sịḅị-jịrịm.

⁴⁷ Yei KỊNỊNYANAḄỌ, wamịna Tamụnọ, wa ḅọrọma, tẹ wa pịkịma ḅoo, sịẹ-sịẹ ma ogboku ḅụ, mịẹ tẹ wa ịmịẹtẹ ḅẹ tẹ ị́ fịafịa ẹrẹ mẹ tokini ḅẹ ḅara.

⁴⁸ Ọ́ KỊNỊNYANAḄỌ ḅe tokinii, Izirẹlịapụ tẹkẹarị Tamụnọ ḅe; ò tokini mịọkụ na ḅẹẹ-sakị ḅẹẹ-sakị na! Yee ọrụḅọ-ọrụḅọ ḅẹẹ, “Amẹnị!” Ọ́ KỊNỊNYANAḄỌ ḅe tokinii!