Devidi-Anume 105 - FỊAFỊA BAỊBỤLỤ

KỊNỊNYANAḄỌ Ḅe Ò Mininiye Mịẹ Ori Atomi Izirẹlị Ḅẹ Apụ Pịrịarị

¹ Ịmịẹtẹ kẹ KỊNỊNYANAḄỌ ḅe ḅẹ, ori opu ḍuko wasama; ọ̀ mịẹ tẹ aị ma ḍuko tomikiri ḅẹ asịẹ ma pịrị.

² Nume su KỊNỊNYANAḄỌ ḅe tokini; ọ̀ mịẹ tẹ ḅụụ-buama-aị ma ḍuko.

³ Ó ḅioḅẹlẹẹ, mịnẹ wa sime ọ̀ pịrịm; yee sunsin ọ̀ pịrịarị apụ mamgba ḍereku.

⁴ Ḅarasụa gotẹ KỊNỊNYANAḄỌ ḅe dama-mu; tẹ sunsin ọ̀ pịrị kunoma-a ḅara.

⁵ Ọmịnị ò kọrị tẹ ḅụụ-buama akọrịnama na ḅụụ-gbiripuma aị ma na kẹ ḅiokoroma, na ọ̀ kọn tẹ aḅẹrẹ ma na.

⁶ Yei ọ̀ fịrịmẹnjịḅọ Ebira-amụ furo-ḅẹ-apụ, Yei Jekọbụ ọ̀ sẹlẹ ọkị tẹ ḅọ ḅe awọmẹ.

⁷ KỊNỊNYANAḄỌ ḅe anie wamịna Tamụnọ; ọ̀ tọn kuroma aị ma sime tomikiri mamgba pịrịm.

⁸ Ori ori ọḅọkụ mẹ koko mu ḅẹẹ-sakị ḅẹẹ-sakị laarị, ọ̀ mịẹ ḅẹ tẹ minini aị ma sịẹsime mu ḅụọ fa ḅụọ maa ẹndẹ oyi si finji, finji laarị.

⁹ Ori Ebira-amụ na nyana ḅịḅị ogbo sọ mẹ koko ḅa, pịkị ọ̀ mịẹ ḅẹ tẹ minini Ayịzịkị pịrịye mẹ sọ.

¹⁰ KỊNỊNYANAḄỌ ḅe Jekọbụ na ọḅọkụ fịm, anị ọḅọkụ mẹ sịẹsime mu ḅẹẹ-sakị ḅẹẹ-sakị la ḅa.

¹¹ Ori mẹẹ, “À Kenanị amakiri mẹ kẹ ị́ pịrị ḅa. Anị nyana ye sọ ḅa.”

¹² Tamụnọ atomi ma kịẹn-ḅịḅị boowa, Kenanị amakiri mẹ ḅụ ini jen anga ḅo apụ.

¹³ Gbọrụ ama iri ḅụ so mu jen la ḅara mie ịn kẹ mẹnjị ikele-ikele ye, gbọrụ amadaḅọ daarị yọ ḅụ so mu jen anga la.

¹⁴ Kụma Tamụnọ ḍụkụ tẹ gbọrụḅọ-sọ in ponoma-a; ịn gbaịn ḅụ, ori amadapụ ḅeri nụnụm:

¹⁵ “Ó ye kẹ à sẹlẹ ọkị tẹ afịrịmẹnjịapụ ma lama ma; ọ̀ ḅara kẹ ị̀ ịkịankoroapụ ma lama ma.”

¹⁶ KỊNỊNYANAḄỌ ḅe ḅuru-ḅa kẹ ịna sịẹ mẹ fịrịma tẹ ịna fịye mamgba ọkị-som.

¹⁷ Kụma ọ̀ gbọrụ tomḅọ kẹ tọrọkọ tarị fịrịmam; Josẹfụ, ịn kẹ omoni ḅara dẹrị ḅọ ḅe.

¹⁸ Ini ikoli kẹ ori aḅụọ sụam, tẹ ikulele pọkọ sụa ikoli kẹ pịkị ọ̀ kọngọ sụam,

¹⁹ nwenii paka ḅẹ tẹ ò ḍuko ye mẹ ḅo paka tẹ ye sọm. KỊNỊNYANAḄỌ ẹkwẹn mẹ ọ̀ kẹ karakara kiri sịẹmam.

²⁰ Anịtẹso Ijiputi ḅẹ amadaḅọ ḅe ikoli ḅio ọ̀ pakama-ḅom; tẹ sịẹ-sịẹ ma ḅẹ ḅẹrẹtọnḅọ ḅe ọ̀ kẹ ọ̀ sịḅị, tomḅọ sọmam.

²¹ Ori ọ̀ kẹ ori daarị yọ mẹ ḅẹ sịḅịdaḅọ sọmam tẹ ọ̀ mịẹ tẹ ò bebe amakiri mẹ ḅẹ ḅẹrẹtọnḅọ sọm,

²² tẹ ọ̀ kụrọ nyanam amadaḅọ ḅe opu afịrịmẹnjịapụ ḅụ, tẹ ḅẹrẹ ḍuko amadaḅọ ḅe tolumarị apụ ma ḅụ ọ̀ ḅẹrẹtọn kụrọ nyanam.

²³ Anịtẹso Jekọbụ Ijiputi mu tẹ anịanga koro-simem.

²⁴ KỊNỊNYANAḄỌ ḅe tọnwa awọ kẹ ori atomi ma pịrịm, tẹ ịn mịẹ tẹ ịn kụrọ si kẹ ịn tọn apụ ma nẹngịm.

²⁵ Ọ̀ mịẹ tẹ Ijiputi-ḅẹ-apụ ma ori atomi ma ḍiki-ḅioḅu tẹ oḅori kẹ tomḅọ sịn anga kẹ ori afịrịmẹnjịapụ ma na kọnm.

²⁶ Anịtẹso ori ọ̀ fịrịmẹnjịḅọ Mozizi, na Erọnị, ori sẹlẹ ọkị tẹ ḅọ ḅe na kẹ fịrịmam.

²⁷ Ịn nwẹnị Tamụnọ opu akọrịnama ma kọrị tẹ Ijiputi ḅụ ḅụụ-buama-aị mị.

²⁸ Tamụnọ kanakana kẹ sịẹ mẹ fịrịmam, kụma Ijiputi-ḅẹ-apụ ma ḍụkụ tẹ ọ̀ tọn ye poki tẹ mịẹ-a.

²⁹ Ọ̀ mịẹ tẹ ịna atọrụ ma ḅẹ minji ọmbie ḍim tẹ ịna inji mamgba ḅaam.

³⁰ Ngụ ịna amakiri mẹ ḅio sọ ḅinm, tẹ ama-da opu warị mẹ ḅụ sọ ngụ-ngụ-ngụ.

³¹ Tamụnọ nwẹnị tọn, tẹ bebe ịna amakiri mẹmgba ḅụ ọmọmọ na obiri iku na tama sọ ḅin.

³² Ḍụḅarị kịka ene mgbọlị na so tẹịn tẹ fịnị kọrị na mie ọ̀ kẹ ene kiri ḍima tẹ kẹ ịn fịrịma ye;

³³ ịna kụrọ mgbọlụ asịn na ịla mgbọlụ asịn na ọ̀ ḅaa gulugulumam tẹ osi asịn mamgba sọ ori anyịma kiri gbin famam.

³⁴ Ọ̀ tọn tẹ igurube ma ḅom, puku-puku, kịẹnkịẹn-ọkụ-ofori ḅara;

³⁵ amakiri mẹ ḅụ ḅẹ asịn ma ḅẹ ịnyịnya mamgba ịn fị siinm; ḍụọ ḅio ḍiḅi tẹ so-paka tẹ aị mamgba ịn fị siinm.

³⁶ Ijiputi ḅụ tarị iyi owiapụ awọmẹ mamgba ọ̀ ḅaam, warị-warị mamgba ḅụ.

³⁷ Anịtẹso ọ̀ tọrọkọ-sụn Izirẹlị awọmẹ ma pịrị tẹ ịn kẹ paka-som; in seleḅa na golu na dogi-som, tẹ inimgba oju iḅim, pịkị kụrọm.

³⁸ Ijiputi-ḅẹ-apụ ma in gotẹ ḅalafaam, tẹ ḅioḅẹlẹ mẹ in so sakị.

³⁹ Tamụnọ oḅuto kẹ ori atomi ma gbaịnm tẹ kọrị-fịnị kẹ bele kẹ ịn pịrịm ḍin ḅụ.

⁴⁰ Ịn fịye ḅii sakị Tamụnọ kuweli nwẹn-sịn kala afeni kẹ fịrịmam So-ḅio koro ḅo fịye mie ọ̀ kẹ ịn pịrị fị furo ḅinma ye.

⁴¹ Ọ̀ ḍụḅarị puu tẹ minji kan pakam, anị nwẹnị ịkpa mẹ ḅio mẹnjịarị tọrụ kịka.

⁴² Ori ọ̀ mịẹ ḅẹ tẹ minini ọ̀ fịrịmẹnjịḅọ Ebira-amụ pịrị fịafịa mininiye mẹ kẹ ḅiokoromam.

⁴³ Anịẹrẹsị ori ọ̀ sẹlẹ ọkị apụ ma tọrọkọ-sụn tẹ ịn pakama-ḅom, tẹ ịn nwẹnị nume-su tẹ oloku-oloku tẹ ḍereku.

⁴⁴ Japụ akiri mie ọ̀ saakị ịn pịrịye tẹ minini tẹ ịn nwẹnị pịkị ịna ḍụọ ḍiḅi akiri ma sọ ọkị,

⁴⁵ anịẹrẹsị ori atomi ma ori oloko poki tẹ anị ḅẹ ḅara mịẹ ḅa tẹ ọ̀ tọn kuroma aị mamgba koko ḅa. Ọ́ KỊNỊNYANAḄỌ ḅe tokinii!