Devidi-Anume 104 - FỊAFỊA BAỊBỤLỤ

Kẹ Tẹmẹḅọ Ḅe Tokini Nume

¹ Ị̀ tẹmẹ, KỊNỊNYANAḄỌ ḅe tokinii! Yei KỊNỊNYANAḄỌ, ị̀ Tamụnọ, ị́ kpọma ḍụḅa ḅara ḍiki! Ị́ ḅaka na ebube na kẹ kapa sọma tẹ sụa wararị;

² í bele kẹ ị́ ḅụụ gbaịn wararị. Í So-tọrụ mẹ finjima wasama wararị ḅara mẹ akpụrụ-warị na kịkam

³ tẹ ị́ nwẹnị í sime-yọ mẹ kẹ So-tọrụ ḅẹ aminji ma ọgọnọ nama. Í oḅuto ma kẹ kirimẹnjị-arụ mịẹ wararị tẹ fẹrụ ma apamba ḅụ dọkụarị.

⁴ Ị́ fẹrụ ma kẹ ị́ oku-mẹnjịapụ mịẹ wararị, tẹ So-tọrụ ḅalapụ, ḅalapụ tẹ kọrị pakarị bele mẹ nwẹnị ị́ afịrịmẹnjịapụ.

⁵ Kiri mẹ ḅẹ sukutarị anga ma ị́ sịẹma kuroma wararị, tẹ gbala-gbala anị saakị jen anga mu ḅịa.

⁶ Ị́ nwẹnị abajị mẹ kẹ anị gbaịn kuroma, anị vọrọrọ-kapa sụa ye ọkụ, tẹ minji mẹ tụndụ ma gbaịnm.

⁷ Í minji ma ḍiki-ịganị sakị, arị ọḅụ-na-isemam, ini í oloku pọkọ kẹ tọn ye mẹ naa sakị, ịn mangị faam.

⁸ Arị nwẹnị tụndụ ma ọgọnọ ḅụ mẹnjị koro ideri-mu arịḅẹ asuku ma la, mu ḅarana mịẹ arị pịrị anga mẹ la.

⁹ Ị́ arị daasịẹ tẹ ḅarị saḅa-ḅọrọ ḅịa anga tọn arị pịrịm, arị ọlọ wẹrị tẹ arị ḅarị jen kẹ kiri mẹ gbaịn ḅịa ḅara.

¹⁰ Ị́ mịẹ tẹ ngụngụḅa aminji ma ogilolo puu ideri-mu tụndụ ma ogboku ḅọrọarị, tẹ piri ọgọnọ ḅẹ atọrụ ma tụndụ ma ogboku mangị-ḅọrọarị.

¹¹ Arị minji pakama piri-ḅio-ḅẹ anama ma pịrịarị; anịanga ḅụ piri-ḅio-ḅẹ opu anama ma minji ḅuu arị apọkọ deinmarị.

¹² Kpeki wararị asịn ma ọgọnọ ḅụ, feni ma amịna awarị nama tẹ sime tẹ nume-suarị.

¹³ So-tọrụ mẹ ḅụ í eene fịrịma ḅo tụndụ ma ọgọnọ sararị, tẹ ị́ aboma kiri mẹ ḅin tẹ.

¹⁴ Í osuka pakama sara tẹ nambulo ma fịarị, tẹ tomi pịkị sịn ma kẹ mịẹye ḅụ suuarị, mịẹtẹ ini inetẹ ịn fị ḅẹ fịye ḍiḅi pakama-ḅo ḅẹ ḅara,

¹⁵ tẹ iru mịẹ pakama-ḅo tẹ anị ịna aḅioḅẹlẹmarị, olivu sịnmgbọlị kẹ mịẹ olo pịkị ịna atọrụ-ḅẹlẹmarị, tẹ fịturu pịkị ịnyọ kẹ ịn pịrịarị.

¹⁶ Lẹbanọnị ḅẹ sida asịn ma ḍiḅi anga mẹ eene opuma koroarị anga; arị asịn ma sime KỊNỊNYANAḄỌ ḅe pịrịm, ori ḅarana arị ḍiḅim.

¹⁷ Anị anga feni amịna awarị namarị; pịna-ḅu afeni ma Faha asịn nwẹn-sịn ye ma aḅara suku-ḅio kẹ sịḅị-kikima-anga sọmarị.

¹⁸ Piri oḅori ma geletẹ tụndụ ma ọgọnọ angarị, tẹ piri ofunguru ma ḍụḅarị ma puu, puu wararị anga ma ḅụ ḅụụ ḅọịarị.

¹⁹ Ị́yẹrị akalụ mẹ tẹmẹ tẹ tomi kẹ akalụ sakị kịẹn-arị; ịrụa pịkị anị tuuideri ḅẹ sakị nimi wararị.

²⁰ Ị́yẹrị ḍin mẹ tẹmẹm, tẹ kanakana mẹ ḅio piri-ḅio-ḅẹ anama mamgba paka-ḅoarị.

²¹ Asambịrịma ọkụkụ ma ekire-ekire tẹ in kun ḅẹ anama ḍọkịarị, anị ḅara mie ịn Tamụnọ kẹ ịn pịrị fịarị fịye ḍọkị-ḍọkị ḅara.

²² Ịrụa paka tẹ ḅẹḅẹ, ịn sọ mu ịna afukuru ḅio ḅọlọlọ sime tẹẹ.

²³ Anịtẹso tomi paka mu ịna kọrịnama kọrịarị, tẹ kọrị nwenii mu ḅoḅiri-so laarị.

²⁴ KỊNỊNYANAḄỌ, ị́ tọnwa-tọnwa ḅẹ aị tẹmẹm! Ị́ kpọma nimi ḅara kẹ arịmgba mịẹ ḅara ḍikii! Tomikiri mẹ tẹmẹ aị anị ḅio ḅin wararị.

²⁵ Abajị mẹ emi, ḍụḅa na finjima na, ị́ tẹmẹ tẹ kịẹnkịẹn-ọkụ-ofori aị anị ḅio angarị, opu aị emi, kala aị emi, arịmgba gbọrụ ḅara mẹ.

²⁶ Vala opu arụ ma anị ọgọnọ mẹnjịarị, tẹ Lẹvịyatanị nwẹn sịn opu inji ḅe anị ḅio tii-arị, anie ị́yẹrị tẹmẹ tẹ minji ḅio simearị ḅalafama opu nama ḅe.

²⁷ Inimgba ị́ ḅụ sịrẹrẹ wararị, ịn fịye ḅii sakị, ḅii sakị ị́ ịn pịrị fị ḅẹ ḅara.

²⁸ Ị́yẹrị anị kẹ ịn pịrịarị, tẹ ini anị fịarị; ị́ fịye kẹ ịn pịrịarị, tẹ ịn fị furo ḅinmarị.

²⁹ Ị́ ọḅụ kẹ in gbin-gbin, ịn ḅalafa tẹẹ; ị́ ịna ḅụ ọwụ mẹ siin siin, ịn fịị tẹ, tẹ pịkị so mu in sime tẹ paka-ḅo fọọn mẹ sọ tẹ.

³⁰ Kụma ị́ ọwụ sara ịna ḅụ suu, suu, ịn tẹmẹ tẹ; ị́ ịwọ ḍumo kẹ tomikiri mẹ pịrịarị.

³¹ Yee KỊNỊNYANAḄỌ ḅe ebube mẹ sime mu ḅẹẹ-sakị ḅẹẹ-sakị la! Yee KỊNỊNYANAḄỌ ḅe ọ̀ tẹmẹ-aị ma ḍiki-ḅioḅẹlẹ!

³² Ò tomikiri mẹ ḍikiarị, tẹ anị jikearị; ọ̀ ḅara kẹ tụndụ ma lamarị, tẹ onwin turee-tureema pakarị.

³³ Ì ḍumo mamgba ḅụ à nume-su KỊNỊNYANAḄỌ ḅe pịrị ḅa; à ḍumo mu laa ḅiri laa ḅiri, à nume su-su ị̀ Tamụnọ ḅe tokini ḅa.

³⁴ Yee ì nume ọ̀ ḅụụ ḅẹlẹ ye sọ, ì ḅioḅẹlẹ ọ̀ ḅara ḅụ ḅoarị ẹrẹsị.

³⁵ Yee in si-mịẹapụ ma ḅaa guluguluma fama tomikiri mẹ ḅụ; yee si-sịḅịḅio-sụapụ ma ḅarị jen kẹ sime ma. Ị̀ tẹmẹ KỊNỊNYANAḄỌ ḅe tokinii! KỊNỊNYANAḄỌ ḅe tokinii!