Devidi-Anume 103 - FỊAFỊA BAỊBỤLỤ

Tamụnọ Ḅẹlẹma Mẹ

¹ Ị̀ tẹmẹ, KỊNỊNYANAḄỌ ḅe tokinii! Ì bebe ḍumo mamgba, ọ̀ fịafịa ẹrẹ mẹ tokinii!

² Ị̀ tẹmẹ, KỊNỊNYANAḄỌ ḅe tokini, tẹ ọ̀ kẹ ị́ na mịẹarị iḅi ḅara mẹ kẹ ḅioḅọrọma ma.

³ Ori ị̀ asi mamgba wẹrịso ị̀ pịrịarị tẹ ì obi mamgba gwọarị.

⁴ Ori ị̀ gbaịn-arị tẹ bẹkẹ fịị ḅo ị̀ la-a, tẹ ḅẹlẹma na ọkụrụkụrụ na kẹ ì bomarị.

⁵ Ori iḅi aị kẹ ì ḍumo pịrị ḅinmarị, anie mịẹ ẹrẹsị arị ịwọ tẹ kụrọ tọrọkọ-tọrọkọ muarị igo feni pembe ḅara.

⁶ KỊNỊNYANAḄỌ ḅe iḅi ḅẹrẹkọn tomi ponomarị apụ ma pịrịarị tẹ ịn la akiri kẹ ịn pịrịarị.

⁷ Ori Ọ̀ tọn tẹ mịẹ ḅẹ aị kẹ Mozizi ḍiem tẹ mịẹ tẹ Izirẹlịapụ ma ọ̀ kọrị tẹ opu akọrịnama ma ẹrịm.

⁸ KỊNỊNYANAḄỌ ḅe anie ọkụrụkụrụ na ḅẹlẹma na nyana ḅọ, ọ̀ nwana-nwana ịganị ịganị-a, kuno-a ḅẹlẹma pịkị ọ̀ ḅụụ ḅin wararị.

⁹ Ọ̀ kịnị ḍiki-ịganị alama-lama-a; ọ̀ pịkị ịganị gbamaso-so-a.

¹⁰ Ọ̀ wa fomu gbẹẹ ḅara kẹ wa fomu-fomu-a anịanịa wamịna asi na mịẹ-irima ma na ḅẹ gbẹẹ aị kẹ wa pịrị.

¹¹ So mẹ Kiri mẹ ḅụ gele fa ḅara mẹ anie ọ̀ ḅẹlẹma ọ̀ kụn-arị apụ ḅụ ḍụḅa la ḅara.

¹² Ịrụa mẹ anị puu-paka-ḅoarị anga mẹ ḅụ ḅele anị tuuideriarị anga mẹ ḅụ fa ḅara, anị ḅara mie ọ̀ kẹ wamịna asi wẹrị ḅelema ḅara wamịna-aḅụụ.

¹³ Ḍaḅọ iḅi ḅara kẹ amịna awọmẹ na mịẹ ḅara, anie KỊNỊNYANAḄỌ ḅe kẹ iḅi ḅara kẹ ọ̀ kụn-arị apụ ma na mịẹarị ḅara.

¹⁴ Ọ̀ kẹ wa tẹmẹ ye ori nimim; ọ̀ kẹ ḅiokoroma wararị mịnẹ wamịnị fọọn.

¹⁵ Wamịnị kụma, wamịna ḍumo mẹ osuka na kịkam. Wa brebrema so-pakarị, piri-ḅio-ḅẹ fịlawa mịẹ ḅara;

¹⁶ tẹso, fẹrụ fie ḅo anị fọnọ so tẹ gbọrụḅọ-sọ ḅarị jen kẹ anị ẹrị-a.

¹⁷ Kụma KỊNỊNYANAḄỌ ḅe kụn-arị apụ ma ḅụ, ọ̀ ḅẹlẹma mẹ sime gbamasoarị, tẹ ori iḅi mẹ pịkị sime mu ḅụọ, ḅụọ mamgba laarị,

¹⁸ anie ịna ḅụ karakara ḅara kẹ sịẹsime ori ọḅọkụ mẹ pịrị tẹ ḅioḅẹngbọ-kẹ-sịrẹrẹ-niḅi ḅara kẹ ọ̀ tọn kuroma aị ma poki tẹ kokoarị apụ ma.

¹⁹ KỊNỊNYANAḄỌ ḅe ori emine kẹ So-ḅio kuromam; ori anie kịnị mamgba amadaḅọ.

²⁰ Ọmịnị kụrọ na opu na enjẹlị apụ, anie ọ̀ tọn kuroma aị ma poki tẹ mịẹarị apụ, anie ò ḍukoarị ye pokiarị apụ, ọ̀ KỊNỊNYANAḄỌ ḅe tokinii!

²¹ Ọmịnị So-ḅio ḅẹ akụrọ mamgba, ọ̀ KỊNỊNYANAḄỌ ḅe tokinii, ọmịnị ori afịrịmẹnjịapụ tẹ ọ̀ ḅẹ ye mịẹarị apụ!

²² Ọ̀ KỊNỊNYANAḄỌ ḅe tokini, ọmịnị ori tẹmẹ-aị mamgba, tẹ ọ̀ ḅẹrẹtọn-arị anga mamgba ḅụ simearị aị ma, ọ̀ KỊNỊNYANAḄỌ ḅe tokinii! Ị̀ tẹmẹ, KỊNỊNYANAḄỌ ḅe tokinii!