Devidi-Anume 102 - FỊAFỊA BAỊBỤLỤ

Ḅụụ-fụka Ḅụ Sime Asa Tụḅọ Kọn Tẹkẹ

¹ Yei KỊNỊNYANAḄỌ, à kọn-arị tẹkẹ mẹ poki, tẹ à ḅarasụa ḅiiarị tẹ kọn-arị owu mẹ naa!

² À ḅụụ-fụka ḅio emi ogbo, ọḅụ pịkị ì gbin ma! Ì poki, tẹ àrị ị́ sịn sakị sarasarama ị̀ ḅịḅị ọkị.

³ Ì ḍumo fẹrụ onwin dogi-so ḅara kẹ ḅọrọ-soarị ì oju fịnị kọrị ḅara kọrịarị.

⁴ Ini ì fomu kiri gbin tẹ, samụnọ tẹ osuka fomu ḅọlọlọma ḅara; ḅuru ḅarị ị̀ tarị-a.

⁵ Àrị iningi pakamarị; yẹrị ḅarị tomḅọ-a, oju apara na mgbe na kịngẹ ị̀ ḅụụ kọn tẹ.

⁶ Àrị ịkpa ḅio ngẹrị simearị feni kịkarị, kan-sara tẹ tomi kuroma-so tẹ anga ḅụ simearị mgbukumgbuku na ị̀ na kịkam.

⁷ Ḍin mono ị̀ tọrụ sọ-a; warị isun ọgọnọ ngẹrị sịẹarị feni na ị̀ na kịkam.

⁸ Bebe ene mẹ ḅụ si kẹ ị̀ tọn-arị apụ ma ì gulugulumarị; ì komboarị apụ ma ị̀ ẹrẹ sịn-sịn ye karịarị.

⁹ À fọọn kẹ fịye sọma fịarị, à pịkị owu-minji kẹ ì ḅuu-minji gwaarị,

¹⁰ anie í opu ịganị mẹ ẹrẹsị, gbala ị́ ị̀ saakị-gelema tẹ pịkị ị̀ kẹ akaka ḅụ gbin kuroma tẹ.

¹¹ Ì ḍumo mẹ kịkarị ye, ḅoḅiri-so ḅẹ ịrụa ḅịya ye sarama tẹ pakarị atẹmẹ; samụnọtẹ osuka na ị̀ na kịkam.

¹² Ị́yẹrị kụma, Yei KỊNỊNYANAḄỌ, ị́ ama-da mu ḅẹẹ-sakị ḅẹẹ-sakị laarị; ḅụọ fa ḅụọ mamgba ị́ kẹ ḅiokoroma ḅa.

¹³ Ị́ saakị tẹ Zayọnị ḍiki sịḅị-kụrụkụrụ ḅa; ị́ á ḍiki sịḅị-jịrị ḅẹ sakị mẹ la tẹ; mie karakara sakị mẹ.

¹⁴ Ị́ afịrịmẹnjịapụ ma á ḅẹlẹmarị, karakaraye kịnị á kan guluguluma sara tẹ sọ; ini á ḍiki sịḅị-kụrụkụrụarị, á kaan-kọsị-sara tẹ sọ.

¹⁵ Sịẹ-sịẹ ma KỊNỊNYANAḄỌ ḅe mangịma ḅa; tomikiri ḅẹ amadapụ mamgba ọ̀ kụrọ mangịma ḅa.

¹⁶ KỊNỊNYANAḄỌ ḅe siin Zayọnị nama sakị, ori ori opu la ḅara kẹ kịnị ḍie ḅa.

¹⁷ Ori ori atomi tẹ ọ̀ sịkị apụ ma naa tẹ ịn kọn-arị tẹkẹ mẹ poki ḅa.

¹⁸ Ọ̀ KỊNỊNYANAḄỌ ḅe kọrị tẹ aị ma kẹ ḍiri kẹ kuroma tẹ tọrọkọ-jụ iyi ḅarị apụ ma gotẹ, mịẹ tẹ amụ iyi-a apụ ma sọ ò tokini ḅarị ḅara.

¹⁹ KỊNỊNYANAḄỌ ò simearị fịafịa gele anga mẹ ḅụ ḍiki iderimam, So-ḅio ò sime tẹ kiri mẹ ḍikim.

²⁰ Ori ikoli ḅara-ḅio sime apụ ma kọn iningi mẹ naa tẹ mịẹ tẹ ini ịn ḅaa ḅẹ tẹ tọn tẹ apụ ma ḅụ ḅara-siin tẹ.

²¹ Ọkọẹrẹsị ini ori ẹrẹ ḍuko-pakama ḅa Zayọnị ama mẹ ḅio ḅụ, tẹ ini ò tokini ḅa Jeruselemu mẹ ḅio ḅụ,

²² anie sịẹ-sịẹ ma na amadapụ daarị anga ma ḅẹ apụ na ḅo kobiri tẹ sunsin KỊNỊNYANAḄỌ ḅe pịrị ḅarị sakị.

²³ À paa asambịrịma wararị ogbo KỊNỊNYANAḄỌ ḅe mịẹ tẹ ị̀ ḅụụ-lọkọ tẹ; ori ì ḍumo kpụlụma tẹ.

²⁴ Yei Tamụnọ, mịọkụ ì ḍumo sịn ọkị ma, amụ arị omongi-a ogbo. Yei KỊNỊNYANAḄỌ, ị́yẹrị í ḍumo mu ḅẹẹ-sakị ḅẹẹ-sakị laarị;

²⁵ iḅere-iḅerea kụra-ḅio í kiri mẹ tẹmẹm, ị́yẹrị ḅarana So ma sọ mịẹm.

²⁶ Kịnị ḅarị arị ẹrị ḅịa, kụma ị́ paa emii; arịmgba ḅịtẹ ịnwaịn kaan ḅara kẹ ḅọrọ so ḅa. Ị́ arị wakị nguma ḅa tomḅọ ḅarị ịnwaịn-a ḅịtẹ ọkụ, tẹ arị ịmaịn-faa ḅa.

²⁷ Kụma sakị mamgba í simearị gbọrụ ḅara mẹ mie ị́ paa simearị, tẹ í ḍumo mẹ gbala-gbala kunoma ḅịa.

²⁸ Wamịna awọmẹ ma ye ịn la-a ḅara kẹ anga ḅa, tẹ ịn gbaịn-arị ye ḅụ, ịna furo-ḅẹ-apụ sọ kpaịn sime ḅa.