Devidi-Anume 101 - FỊAFỊA BAỊBỤLỤ

Amadaḅọ Mịẹ Ḅẹ Tẹ Minini Ye

¹ Ì nume mẹ ḅioḅẹngbọ-kẹ-sịrẹrẹ-niḅi ḅara sime na kịnị-inoma-a na gbolomam, tẹ àrị anị su ị́ pịrịarị, Yei KỊNỊNYANAḄỌ.

² Ì ye-mịẹ-ḅara ḅụ si paka ḅịa. Tọ sakị ị́ ḅọrọ ḅo ị̀ la ḅẹ? Ị̀ warị ḅio à kpaịn ḍumo kọn ḅa,

³ tẹ gbala-gbala à ḍụkụ tẹ siye kiri nyana ḅịa. Ọḅụ pịkị Tamụnọ gbin-arị apụ ma mịẹarị aị ma à ḍiki-ḅioḅuarị; arị ini na nyana tẹ mịẹ ḅẹ gberie-sọ ofori.

⁴ À kịnị mingirima amịẹaị mịẹ ḅịa, à pịkị siye na mịẹ ye nyana ḅịa.

⁵ Jen tomḅọ ḅụ si-aị kẹ ḅeri-ḅio, ḅeri-ḅio ḍukoarịḅọ mẹ arị mḅọ ḅụ ị̀ ḅụụ wẹrị sikima ḅa; à ḍụkụ ḅụụ-gelematẹ opu ẹkwẹn kọn-arị tomḅọ pịrị ḅịa.

⁶ Ḅụụ ḅụ ḅioḅẹngbọ kẹ gbana na-iḅi ḅara sime Tamụnọ pịrị apụ ma arị ịn kẹ ye sịn ḅa tẹ minini tẹ ini ị̀ ama-da opu warị ḅio anga ḅa. Ḅọkọ, ḅọkọ mamgba kẹ kịnị mingirima ye mịẹ-a apụ ma à ḍụkụ tẹ ịn fịrịmẹnjị ị̀ pịrị ḅa.

⁷ Ị̀ ama-da opu warị mẹ ḅio gbọrụ iruoḅọ sọ anga ḅịa; ị̀ tọrọkọ ḅụ mịẹ kịnị ḍie aị mịẹarị ḅọ sime ḅịa.

⁸ Ene-ḅaaene-ḅaaene wamịna amakiri mẹ ḅụ simearị si-sịḅịḅio-sụapụ ma arị ịn ḅaa ḅa; KỊNỊNYANAḄỌ ḅe opu ama mẹ ḅio simearị si-mịẹapụ mamgba arị in dee pakama ḅa.