Devidi-Anume 10 - FỊAFỊA BAỊBỤLỤ

Jụmọ-Jụmọ Inoma ma Gotẹ Kọn Tẹkẹ

¹ Yei KỊNỊNYANAḄỌ, tiye paka tẹ í ḅele-fa wararị? Tiye paka tẹ ị́ ị́ ḅụụ kikimarị ḅụụ-fụka wa la sakị?

² Si-sịḅịḅio-sụa apụ ma amịna aḅụụ-gelema tẹ igoin-apụ ma ḅaa ḅẹ ḅọkọ ḍọkịarị: ini ḅarana tuu tẹ ḍiein ma ḅụ in kun sịẹma.

³ Si-sịḅịḅio-sụa tomḅọ ḅe ọ̀ mịẹ ḅẹ tẹ kuromarị siye mẹ kẹ ḅụụ bomarị: Opu pọkọ-ḅẹngbọ sụa tomḅọ ḅe Tamụnọ wori-wori tẹ ọ̀ sịkịarị.

⁴ Si-sịḅịḅio-sụa tomḅọ ḅe ọ̀ KỊNỊNYANAḄỌ ḅe bala-a: ori opu amịẹaị ḅụ ò kuromarị ọ̀ Tamụnọ kẹ mịẹ ḅẹ ye ofori.

⁵ Si-sịḅịḅio-sụa tomḅọ ḅe ye goyegoye ori na iḅiarị. Ori inetẹ Tamụnọ aḅẹrẹkọn ma fie arị ye naa ḅịa: Ò si kẹ tọn-arị apụ ma ò nini fụrụarị.

⁶ Ori ọ̀ ḅụụ ḅẹẹarị, “Gbala-gbala ye ị̀ na si ḅịa, gbala-gbala ḅụụ-fụka ị̀ la ḅịa.”

⁷ Gbo-aị na, iruo-aị na, ẹrẹma na mie ọ̀ ḅịḅị-ḅio ḅin wararị: ọ̀ sarasarama kọn-arị ẹkwẹn ma ḍiki-ḅioḅu si-aị famam.

⁸ Ọ̀ kala-ama ma ḅio ḅọị sime tẹ koruarị, ọ̀ mịẹye-ofori apụ ma ḅaa ḅẹ ḅara. Ọ̀ ḅarasụa-nyanaa-apụ ma sime anga, sime anga ḍọkị paka-ḅoarị;

⁹ ori ọkụkụ ḅara kẹ ọ̀ ḅọị sime wararị anga mẹ ḅụ koruarị. Igoin-apụ mie ori ọkọ kẹ koruarị: ori ọ̀ ḍiein ḅio in kun sịẹma tẹ ịn fọnọ soarị.

¹⁰ Ḅarasụa pịrị ḅọ nyana-a tẹ ịna aḅara-ḅio sọ apụ ma ini ịn gbẹẹ kọsịmarị: piri-ḅio-ḅẹ nama kụrọ pembe kụrọ ịn nwẹn kẹ ịn nẹngịmarị.

¹¹ Si-sịḅịḅio-sụa tomḅọ ḅe amịna ḅụụ ḅẹẹarị, “Tamụnọ ọ̀ bala-a! Ori amịna atọrụngbọ gbaịn tẹ, gbala-gbala Ori ị̀ ẹrị ḅịa!”

¹² Yei KỊNỊNYANAḄỌ, fomu-ḅara kẹ arị si-mịẹapụ ma pịrịị! Tọrụsiẹrịarị apụ ma kẹ ḅiokoroma-a!

¹³ Ndẹẹ si-sịḅịḅio-sụa tomḅọ inetẹ Tamụnọ ḍiki-sima tẹ amịna ḅụụ ḅẹẹ ḅẹẹ ḅara, “Ò fomu-ḅara kẹ ị̀ pịrị ḅịa?”

¹⁴ Kụma ị́ ẹrịarị; ị́ ḅụụ-fụka na tọrụsiẹrị na kẹ elekima sụarị tẹ sakị mamgba ḅarasụa ḅẹ tẹ tẹlẹma wararị. Ḅarasụa pịrị ḅọ nyana-a tomḅọ ḅe amịna ḅụụ saakị ị́ pịrịarị; sakị mamgba ị́ ḅarasụa mịẹḅẹ-ọkụ-ofori apụ pịrịarị.

¹⁵ Si-sịḅịḅio-sụa apụ na si-mịẹapụ na kụrọ mẹ kan-siin: ịn mịẹ tẹ kura-aye mẹ gotẹ in fomu nwenii ini anị ḅụ ḅara siin.

¹⁶ KỊNỊNYANAḄỌ ḅe ama-da mu ḅẹẹ-sakị ḅẹẹ-sakị laarị; Oru-atamụnọ tẹkẹarị apụ ma Tamụnọ amakiri mẹ ḅụ ịmaịn faa ḅa.

¹⁷ Yei KỊNỊNYANAḄỌ, ḅụụ-iderimarị apụ ma atẹkẹ ma í poki ḅa; í ḅiokpọ kẹ ịn pịrị ḅa.

¹⁸ Tomi ponomarị apụ na ḍapụ na iyingi apụ na fịtẹ awọmẹ na kọn-arị owu ma ị́ naarị: ị́ ḅẹrẹkọn ịna aḅara iḅima ḅa, mịẹ tẹ fịị, fịị atomi ḅarị jen kẹ kịnị atẹmẹ naịn-naịnma ḅịa.