Devidi-Anume 1 - FỊAFỊA BAỊBỤLỤ

TARỊ ḌIRI (Nume 1—41) Tomḅọ Karakara Ḅioḅẹlẹ Nyana Ḅẹ Ḅara

¹ Si-atomi kẹ in tolumarị ye ọkị-a apụ ma ḅioḅẹlẹ sime ịn pịrịm, anie si-apụ mịẹarị ḅara ḍikima mịẹ-a, anịanịa Tamụnọ kẹ ye-sịn-a apụ ogbo sọ-a apụ ma.

² Anie nakara, KỊNỊNYANAḄỌ ḅe Oloko mẹ poki tẹ mịẹ nwẹnị ịna ḅioḅẹlẹma ye sọ, tẹ eneḅaka na ḍin na ini anị ḍawọarị.

³ Ịn kịkarị ye minji akaka so-pakarị asịn, tẹ karakara sakị ḅụ mgbọlụ sụarị aị, tẹ arịḅẹ ịnyịnya ma pịkị kpatụ-kpatụ-a. Ịn mịẹ ye-mịẹ ye loloarị.

⁴ Kụma si-mịẹapụ ma gbala-gbala ye anị ḅara kẹ ini na sime-a; ịn kịkarị ye fẹrụ kẹ fiin soarị asịra.

⁵ Tamụnọ ḅẹrẹ-ḅarasii pẹlẹ si-mịẹapụ ma pịrị ḅa tẹ ịn wẹrị ḅelema ḅa ori atomi ma ḅụ.

⁶ KỊNỊNYANAḄỌ ḅe karakaraye-mịẹapụ ma datụkụma tẹ ịn gbaịn-arị; kụma si-mịẹapụ ma mẹnjịarị etela mẹ ịn kẹ mu ịna fa ḅio suu ḅa.