Danẹlị 4 - FỊAFỊA BAỊBỤLỤ

Nebukadineza Maaịn Karama Sakị Kẹ Ḍawọm

¹ Jen eneḅaka, Amadaḅọ Nebukadineza pịkị ḍawọm, tẹ oku-ḅịḅị kẹ tomikiri ḅẹ asịẹ mamgba na, tomi kịrị-kịrị ma na pịkị ẹkwẹn-aḅịḅị kịrị-kịrị ma na fịrịmam. Ori mẹẹ: Àrị ọ́ sịnm!

² Anị kpọma ị̀ ḅụụ yela lamam, à ḅụụ-gbiripuma-aị ma na ịkịan ma na tẹ Kụrọmamgba-Nyana Tamụnọ ḅe kẹ ì ḍie aị ma ḍuko ó pịrị.

³ Tamụnọ ḅụụ-gbiripuma-aị ma ḅakam! Ọ̀ kọrịarị ịkịan ma kụrọ nyanam! Tamụnọ ḅe anie sime gbamaso amadaḅọ; ọ̀ ḅẹrẹtọn mu ḅẹẹ-sakị ḅẹẹ-sakị la ḅa.

⁴ Yẹrị Amadaḅọ Nebukadineza ḅụụ-fụka ofori ḅara kẹ ị̀ amada-warị ḅụ angam, tẹ iḅi ḅara kẹ lọkọlọkọ ḅụ tọrụ-ḅẹlẹ nyanam.

⁵ À nwẹnị ḅalafama ḍawọ kọn à monoarị sakị ḅụ. Àrị ẹrị aḅịrị ma kpọma ị̀ tẹmẹ naịn-naịnmam à paa ḅụlọlọ wararị sakị.

⁶ À nwẹnị tọn mịnẹ ịn mu Babịlọnị ḅụ simearị Ye-nimiapụ mamgba sịn ḅoo, ịn ḍawọ mẹ puu-finji ị̀ pịrị ḅẹ ḅara.

⁷ Anie ḅụ ḅịrị-ẹrịapụ ma na, ibiam-tiapụ ma na, arịapụ ma na pịkị so-ḍikiapụ ma na nwẹnị sọ-ḅo, à nwẹnị ḍawọ mẹ ḍuko ịn pịrị, kụma in inetẹ anị puu-finji ị̀ pịrị-a.

⁸ Anịtẹso Danẹlị nwẹnị sọ-ḅo. (Oriḅe ịn pịkị kẹ ọ̀ sịn-sịn ẹrẹ Bẹlịtisaza, anie ịn kẹ à tẹkẹarị oru koro ẹrẹ mẹ). Oru-atamụnọ ma kịrị-ḅeletẹ kụrọ kẹ ọ̀ pịrị wararị, anị gotẹ à nwẹnị à ḍawọ ye mẹ ḍuko ọ̀ pịrị. Àrị ọ̀ ḅẹẹm:

⁹ Ị́yẹrị, Bẹlịtisaza, ḅịrị-ẹrịapụ ma ḅẹ sịḅịdaḅọ, à nimi wararị mịnẹ oru-atamụnọ ma kịrị-ḅeletẹ kụrọ kẹ ị́ pịrị tẹẹ, ị́ pịkị ḅọị aị mamgba lekiri wararị. Pokii, mie à kọn ḍawọ mẹ; anị fiearị ye ḍuko ị̀ pịrịị.

¹⁰ Àrị iḅila ọgọnọ mono sime wararị sakị, à ḍawọm tẹ tomikiri mẹ ḅẹ ogboku ḅụ opu sịn ẹrịm.

¹¹ Anị nwẹnị gele tẹ ịnyọ nyana, nwenii mu So-tọrụ la, tẹ ḅẹḅọ-ḅẹḅọ tomikiri mẹ ḅụ anị ẹrịm.

¹² Anị ḅẹ ịnyịnya ma ḅụụ-ḅẹlẹmam, tẹ sịnmgbọlụ anị ḅụ sụa sara wararị — tomikiri-ngisịẹ mamgba inetẹ fị furo ḅinma ḅarị asịnmgbọlụ. Piri-ḅio-ḅẹ anama anị suku-ḅio ịnyọsaram, tọnwa afeni pịkị anị ḅẹ aḅara ḅụ warị namam, tẹ ḍumo wararị ye goyegoye anị ḅẹ sịnmgbọlụ nwẹn fịm.

¹³ À mị ḍawọ mẹ fiearị ye kuromarị sakị, à ye-goyegoye ḍikiarị fịafịa ḅo ẹrịm, ò So-ḅio ḅụ koro-ḅoarị.

¹⁴ Ọ̀ nwẹnị kụrọma oloku tẹ ḅẹẹ, “Sịn mẹ pẹlẹ-gbin tẹ anị ḅẹ aḅara ma pẹlẹ-pẹlẹ sịraa; anị ḅẹ ịnyịnya ma kịrị siin tẹ anị ḅẹ asịnmgbọlụ ma gala-galamaa. Anị suku-ḅio simearị anama ma na anị ḅẹ aḅara ọgọnọ angarị afeni ma na dee.

¹⁵ Kụma anị ḅẹ ikiḅa mẹ wẹrịsoo kiri mẹ ḅio, tẹ ikulele na ojo ḅẹ ḍigi kẹ anị kpọ ikelemaa. Ḍụọ mẹ ḅio anị wẹrịsoo, tẹ anị osuka mẹ na sime. Mịọkụ yee igirigi mẹ ḅị tomḅọ ḅe ọgọnọ sịra, tẹ yee ori na nama ma na sịn ma na anga gboloma.

¹⁶ Sọnọma akụra ọ̀ nwẹn kẹ ḅarị tomḅọ ḅioḅẹngbọ nyana ḅịa, kụma nama ḅioḅẹngbọ.

¹⁷ Mie ye-goyegoye ḍikiarị fịafịa apụ ma tọn koroma yee. Anịẹrẹsị, yee tomi mamgba ḅẹẹ-anga ḅẹẹ-anga ḅụ nimi mịnẹ, Kụrọmamgba-Nyana Tamụnọ ḅe tomina asịẹ ma ḅụ kụrọ nyana wararị tẹ ọ̀ pịkị inetẹ arị kẹ ọ̀ sẹlẹ-ọkịḅọ-ọkịḅọ pịrị ḅa — jen-a jen-a tomina ḍiki-tọrụ ḅụ ye ḅụ ofori apụ sọ.”

¹⁸ Amadaḅọ Nebukadineza nwẹnị ḅẹẹ, “Mie à kọn ḍawọ mẹ. Mịọkụ, Bẹlịtisaza, anị fiearị ye puu-finji ị̀ pịrịị. Gbọrụḅọ-sọ ye-nimiapụ ma ogboku inetẹ anị fiearị ye puu-finji ị̀ pịrị-a, kụma ị́yẹrị ị́ inetẹ ḅa, oru-atamụnọ ma kịrị ḅeletẹ kụrọ ị́ ḅụụ ḅụ emi ẹrẹsị.”

Danẹlị Ḍawọ Mẹ Fieye Puu-finjim

¹⁹ Miemẹ ḅụ, Danẹlị, ịn pịkị Bẹlịtisaza kẹ sịn ḅọ ḅe, ḅaka ḅara kẹ ḅụụ-buam tẹ inetẹ gberie-sọ ḍuko-a. Amadaḅọ ḅe nwẹnị ọ̀ ḅẹẹ, “Bẹlịtisaza, ḍụkụ tẹ ḍawọ mẹ na anị fiearị ye na ị̀ tẹmẹ-naịn-naịnma ma.” Bẹlịtisaza nwẹnị pakịrị, “Gburo-gburo Opuḅọ, mimgbe mị ḍawọ mẹ na anị fiearị ye na sime ị́nịna fịya-a apụ pịrị tẹẹ, kụma ị́yẹrị-a.

²⁰ Sịn mẹ, tẹ gele nwenii mu So-tọrụ la ye mẹ, ḅẹḅọ-ḅẹḅọ tomikiri mẹ ḅụ inetẹ anị ẹrị ḅa.

²¹ Anị ḅẹ ịnyịnya ma ḅụụ-ḅẹlẹmam, anị pịkị tomikiri-ngisịẹ mamgba inetẹ fị furo ḅinma ḅarị asịnmgbọlụ sụam. Piri-ḅio-ḅẹ anama anị suku-ḅio ịnyọsaram, tọnwa afeni pịkị anị ḅẹ aḅara ḅụ warị namam.”

²² “Gburo-gburo Opuḅọ, ị́yẹrị anie sịn mẹẹ, anie gele-fa tẹ pịkị kụrọ wararị sịn mẹ. Ị́ ḍụḅa ḅụra tẹ So la tẹẹ, ị́ kụrọ pịkị tomikiri-ngisịẹ mẹ kana tẹẹ.

²³ Gburo-gburo Opuḅọ, í miemẹ ḍikiarị sakị, gbọrụ enjẹlịḅọ So-ḅio koro ḅo tẹ ḅẹẹm, ‘sịn mẹ pẹlẹ-gbin tẹ anị gulugulumaa, kụma anị ḅẹ ikiḅa mẹ wẹrịsoo kiri mẹ ḅio. Ikulele na ojo ḅẹ ḍigi kẹ anị kpọ ikelemaa, tẹ ḍụọ mẹ ḅio anị wẹrịsoo, tẹ anị osuka mẹ na sime. Yee igirigi mẹ ḅị tomḅọ ḅe ọgọnọ sịra, tẹ yee Ori anịanga ḅụ nama ma na sọnọma akụra kẹ anga gboloma.’ ”

²⁴ “Miemẹ, anie anị fiearị ye, Gburo-gburo Opuḅọ; miemẹ anie Kụrọmamgba-Nyana Tamụnọ ḅe ḍuko-pakamam ị́ ḅụụ paka ḅarị ye.

²⁵ Ini í dee-pakama ḅa tomi ogboku ḅụ, tẹ í piri-ḅio-ḅẹ anama na anga ḅa. Ị́ sọnọma kụra kẹ nambulo osuka fị ḅara kẹ osuka fị ḅa, tẹ etela-ogbo mono ḅa, igirigi mẹ ị́ ọgọnọ sịra ḅarị anga. Anịsakị í minini ḅa mịnẹ, Kụrọmamgba-Nyana Tamụnọ ḅe tomina asịẹ ma ḅụ kụrọ nyana wararị tẹ ọ̀ pịkị inetẹ arị kẹ ọ̀ sẹlẹ-ọkịḅọ-ọkịḅọ pịrị ḅa.

²⁶ Enjẹlịḅọ ḅe tọnm ịn sịn mẹ ikiḅa mẹ wẹrịsoo kiri mẹ ḅio. Miemẹ fiearị ye ị́ pịkịma-ḅo amadaḅọ sọ ḅa, Tamụnọ ḅe anie ḅẹrẹtọn tomikiri mẹ pịrịarị ye ị́ nwẹn lekiri sakị.

²⁷ Ọkọẹrẹsị, Gburo-gburo Opuḅọ, à kẹ í ḅeri nụnụ ḅarịye mẹ daa-ọkị. Ḅarị si mịẹ ma, karakara ye mịẹẹ, tẹ ḍiki-ḅụụjịrị nyana igoin-apụ pịrịị. Anịsakị í lolo tọrọkọ-tọrọkọ mu ḅa.”

²⁸ Mịna aị mamgba Amadaḅọ Nebukadineza ḅụụ pakam.

²⁹ Oyi maa akalụ ḅọrọ tẹso, ori ori amada-warị isun ọgọnọ mẹnjị na koro naarị ogbo,

³⁰ nwẹnị ḅẹẹ, “Ḍikii, Babịlọnị gburo-gburo la ḅara mẹ! Àrị anị namam, anị sịḅịda ama sọ kẹ ị̀ pịrị, tẹ ị̀ kụrọ na, ị̀ ịnyọ na, ì ebube na pịkị ì opu na ḍie pakama.”

³¹ Mịna ẹkwẹn-aḅịḅị ma paa ọ̀ ḅịḅị ḅio paka-ḅoarị ogbo, gbọrụ pọkọ So-ḅio ọ̀ ḅẹẹm, “Amadaḅọ Nebukadineza, à ḍukoarị ye pokii! Ị́ amada-kụrọ mẹ, ini ị́ ḅara-ḅio anị kanị ọkị tẹẹ.

³² In í dee-pakama ḅa tomi ogboku ḅụ, tẹ í piri-ḅio-ḅẹ anama na anga ḅa, tẹ sọnọma akụra kẹ nambulo osuka fị ḅara kẹ osuka fị ḅa. Anịsakị í minini ḅa mịnẹ, Kụrọmamgba-Nyana Tamụnọ ḅe tomina asịẹ ma ḅụ kụrọ nyana wararị tẹ ọ̀ pịkị inetẹ arị kẹ ọ̀ sẹlẹ-ọkịḅọ-ọkịḅọ pịrị ḅa.”

³³ Ẹkwẹn-aḅịḅị ma ḅo karakara ye sọm anị-gbọrụ-kirikiri. In Nebukadineza dee-pakamam tomi ogboku ḅụ, tẹ ọ̀ nambulo osuka fị ḅara kẹ osuka fịm. Igirigi mẹ ori oju ọgọnọ sịram, tẹ ọ̀ sịḅị-ḅẹ-inume ma igo apịkọ nangwọ ḅara nangwọm; ọ̀ ḅara ḅẹ imime na ḅụọ ḅẹ imime na nwẹnị pịkị feni imime nangwọ ḅara nangwọ.

Nebukadineza Tamụnọ Tokinim

³⁴ Amadaḅọ ḅe nwẹnị ḅẹẹ, “Sọnọma akụra ma ḅo ḅọrọ tẹso, à tọrụ sakị so dam, tẹ tomina ye-nimi nwẹnị ị̀ sịḅị ḅio sọ. À Kụrọmamgba-Nyana Tamụnọ ḅe tokinim, tẹ kụn na ebube na kẹ ḍumo gbamaso wararị ḅọ ḅe pịrịm. Ọ̀ ḅẹrẹtọn ma mu ḅẹẹ-sakị ḅẹẹ-sakị la ḅa, ori ama-daa sime gbamaso ḅa.”

³⁵ Tomikiri ḅẹ atomi ma, ọ̀ ḅụụ papaa apụ; So-ḅio simearị enjẹlịapụ ma na kiri-ḅio simearị atomi ma na in ò suku-ḅio emii. Gbọrụḅọ-sọ inetẹ ọ̀ tọn ye kan ḅịa anịanịa “tiye ẹrẹsị?” kẹ ọ̀ mịẹarị ye gotẹ ò gbela.

³⁶ Tomina ye-nimi ị̀ sịḅị ḅio sọ ḅo tẹso, ịn nwẹnị ị̀ kụn na, ì opu na pịkị ì ama-da ebube na pịkịma-ḅo ị̀ pịrị. Ị̀ fịrịmẹnjịapụ na ì opu-apụ na nwẹnị ị̀ da warị su, tẹ ịn nwẹnị ị̀ amada-kụrọ pịkịma-ḅo ị̀ pịrị, tẹ pịkị tarị à nyana kụn nẹngịma kụn kẹ ị̀ pịrị.

³⁷ “Mịọkụ, yẹrị, Nebukadineza, tokini na, kụn na pịkị ebube na kẹ Tamụnọ pịrịm, ori So-ḅio ama-daarị ḅọ ḅe. Ọ̀ mịẹ ye goyegoye karakaram pịkị kuram, anị kụma ọ̀ pịkị inetẹ ḅaịn ḅara kẹ ye mịẹarị ḅọ iderima ḅa.”