Biblia Todo Logo
Bìoball air-loidhne

- Sanasan -

Danẹlị 3 - FỊAFỊA BAỊBỤLỤ


Nebukadineza Tọnm Ḅẹḅọ-ḅẹḅọ Ò Golu Mḅudu Tẹkẹẹ

1 Ama-da Nebukadineza golu kẹ mḅudu mịẹm, tẹra mita fa suei mie anị ḅẹ gele, tẹ finji nwẹnị kẹlẹ-fa tẹra amita. Babịlọnị ibe ḅụ Dura lẹsẹrẹ-kiri mẹ ḅụ mie ori anị kẹ sịẹma yee.

2 Anịtẹso Amadaḅọ ḅe tọn ọ̀ fịrịmẹnjị-opuapụ mamgba pịrịm in ḅo kobiri — amadapụ awọmẹ na, gọvịna apụ na ịn palị-apụ na, ịna suku-ḅio sime apụ na, igbigi-koko apụ na, ḅẹrẹtọn-apụ na ịn palị-apụ na, pịkị osi ibe ma ḅẹ fịrịmẹnjị-opuapụ mamgba na. Ini Amadaḅọ Nebukadineza tẹmẹ wararị mḅudu mẹ kẹ tọn-tọn ḅara wẹrị ḅẹ alalị mẹ ḅoo.

3 Miemẹ ẹrẹsị, mịna amadapụ awọmẹ ma na, gọvịna apụ ma na ịn palị-apụ ma na, ịna suku-ḅio sime apụ ma na, igbigi-koko apụ ma na, ḅẹrẹtọn-apụ ma na ịn palị-apụ ma na, pịkị osi ibe ma ḅẹ fịrịmẹnjị-opuapụ mamgba na ḅo kobirim, Nebukadineza tẹmẹ wararị mḅudu mẹ kẹ tọn-tọn ḅara wẹrị gotẹ. Ini mḅudu mẹ tọrọkọ sịẹ wararị ogbo,

4 kpokpo-gboloḅọ nwẹnị gele pọkọ kẹ oloku pakama tẹ ḅẹẹ, “Ọmịnị sịẹ-sịẹ ma ḅẹ atomi mamgba na, tomi ḅara-ḅara mamgba na, ẹkwẹn-ḅịḅị-ḅịḅị mamgba na, ó pokii!

5 Ọdụ ma fie tẹ ọ́ naa ḅa, ja farị-farịaị na ọbọ ma na arị pono ḅa; tẹ ma ma ḅọrọtẹ so kịrị-kịrị jaị arị ḅụ sọ ḅa. Nume mẹ saakịarị-saakịarị ọmịnị iḅo tẹ sunsin golu mḅudu mẹ tẹ Nebukadineza tẹmẹ sịẹma wararị ye mẹ pịrịị.

6 Ḅẹḅọ-ḅẹḅọ tẹ iḅo tẹ sunsin anị pịrị-a ḅọ, ini anị-gbọrụ-kirikiri mḅọ kẹ orumo fịnị kịka fịnị mẹ ḅio gbin suu ḅa.”

7 Tẹ anie ḅụ, sịẹ-sịẹ mamgba na, tomi ḅara-ḅara ma na, ẹkwẹn-ḅịḅị-ḅịḅị ma na farị-farịaị naa gbọrụ sakị ini iḅo tẹ sunsin Nebukadineza tẹmẹ sịẹma mḅudu ḅe pịrịm.


Ịn Ḅịḅịpoki-a Ḅẹrẹ Kẹ Danẹlị Ikiapụ Ma Sịḅị Sẹịnm

8 Anị sakị mie Babịlonịya ḅẹ jen-apụ ọkị tẹkẹ Juu-ḅẹ-apụ ma si ḅara ḍuko ye.

9 Ini Ama-da Nebukadineza ḅẹm, “Yee Í Opu ḅụ í ḍumo mu ḅẹẹ-sakị ḅẹẹ-sakị la!

10 Í Opu ḅụ í oloko sụam mịnẹ nume pọkọ mẹ saakịarị-saakịarị ḅẹḅọ-ḅẹḅọ iḅo tẹ sunsin golu mḅudu mẹ pịrị,

11 tẹ iḅo tẹ sunsin anị pịrị-a ḅọ pịrị-a ḅọ ini mḅọ kẹ orumo fịnị kọrị ḅara kọrịarị fịnị mẹ ḅio gbin suu.

12 Juu-ḅẹ jen-apụ tẹ ị́ kẹ Babịlọnị ibe ḅụ fịrị kirikiri sịḅị dama wararị apụ emi: Sẹdarakị na Mẹsakị na Abẹdinigo na — tẹ ị́ tọn ye mẹ poki tẹ mịẹ-a apụ. In sunsin ị́ tamụnọ ḅe pịrị-a anịanịa iḅo ị́ mịẹ sịẹma wararị mḅudu mẹ pịrị.”

13 Anie ḅụ amadaḅọ ḅe gbọrsịḅị ịganị fama tẹ tọnm ịn tẹra owiapụ ma kẹ ọ̀ tọrọkọ ḅoo.

14 Ori in gbelam, “Sẹdarakị, Mẹsakị na Abẹdinigo na, karakaraye aro, mịnẹ ó sunsin ị̀ tamụnọ ḅe pịrị tẹ iḅo à mịẹ sịẹma wararị mḅudu mẹ pịrị-a?

15 Mịọkụ ọmịnị ọdụ ma na, osi farị-farịaị ma na, ọbọ ma na, jaị na fie naa gbọrụ sakị, ọmịnị iḅo tẹ sunsin mị mḅudu mẹ pịrịị. Ọ́ mịẹ-a ḅẹḅẹ, ini ọ́ kẹ orumo fịnị kọrị ḅara kọrịarị fịnị ḅio gbin suu ḅa. Ó kuromarị ọ́ ḅọrọma ḅẹ tamụnọ emi?”

16 Sẹdarakị, na Mẹsakị, na Abẹdinigo na pakịrịm, “Í Opu ḅụ, wa wamịna ḅụụ ḍụa ḅẹ ḍọkị ḅịa.

17 Wa fịrịmẹnjị pịrịarị Tamụnọ ḅe inetẹ orumo fịnị kọrị ḅara kọrịarị fịnị mẹ ḅio na ị́ kụrọ ḅụ na wa ḅọrọma ḅa ḅẹḅẹ, ọ̀ mịẹ ḅa.

18 Kụma ọ̀ nwẹnị mịẹ-a sọ, yee Í opu ḅụ, í nimi lama mịnẹ wa sunsin ị́ tamụnọ pịrị ḅịa, tẹ wa pịkị iḅo golu mḅudu mẹ tẹ mịẹ sịẹma ye mẹ pịrị ḅịa.”


Ịn Ḅaa-Ḅẹrẹ Pẹlẹ Danẹlị Ikiapụ Ma Ọgọnọ Gbanam

19 Anịtẹso Nebukadineza ḅarị inetẹ ọ̀ ḅụụ ọlọ-a, tẹ ori atọrụngbọ awụ ḅịyam ọ̀ nyana Sẹdarakị na, Mẹsakị na, Abẹdinigo na pịrị ịganị gotẹ. Mie ḅụ ọ̀ tọn ori atomi pịrịm ịn mịẹ tẹ orumo kọrị ḅara kọrị fịnị mẹ sọnọma sakị nẹngị ḅara kẹ ọfịrị anị ọfịrị sime-ḅara nẹngị.

20 Tẹ ọ̀ tọn ori ọmụ-ogbo ḅụ kụrọ-tẹịn owiapụ pịrịm ịn tẹra owiapụ ma fịna tẹ ịn kẹ vuru-vuruarị fịnị mẹ ḅio gbin suum.

21 Mie ḅụ ini ịn fịnam, in ḅirima gbasị ḅara mẹ ḅụ — suku-ḅio ḅẹ kapa na, vọrọrọ-kapa na, kapụ na arịmgba na — tẹ ịn kẹ vuru-vuruarị fịnị mẹ ḅio gbin suum.

22 Mịọkụ amadaḅọ ḅe tọn kụrọma tẹ fịnị mẹ ọfịrị ḅaka tẹ ẹrẹsị, fịnị-ḅẹlẹ mẹ nwẹnị ọmụapụ ma tẹ tomi ma ọkị mu fịnị mẹ ḅio suu apụ ma dọkịma fama.

23 Anịtẹso Sẹdarakị, Mẹsakị, na Abẹdinigo na nwẹnị ịn paa fịna sime-ḅara mẹ kẹ vuru-vuruarị fịnị mẹ ogboku ḅịkị koro.

24 Ḅiotọn-a ḅara ḅụ Nebukadineza nwẹnị ḅụụ-bua ḅụ ḍosi sakị sịẹ. Ori ọ̀ fịrịmẹnjị opu apụ gbelam, “Wa fịna tẹ kẹ orumo kọrị ḅara kọrịarị fịnị mẹ ḅio gbin suu apụ tẹra apụ-a?” Ịn nwẹnị pakịrị, “Inn, wa mịẹm, Í Opu ḅụ.”

25 Ò gbelam, “Anịtẹso tiye ẹrẹsị arị inia owiapụ ẹrịarị ịn fịnị mẹ ḅio mẹnjịma-mẹnjịmarị? Ịn fịna-a, tẹ ịn gbọrụ elekima sọ ḍie-pakama-a mịnẹ ịn dọkịarị — tẹ ini karama ḅọ ḅe Tamụnọ Tụḅọ kịkarị.”


Ịn Danẹlị Ikiapụ Ma Ḅụụ-ḅarasin Tẹ Ini Iwoma Opu Kiri Lamam

26 Mie ḅụ Nebukadineza mẹnjị mu orumo fịnị kọrị ḅara kọrịarị fịnị mẹ ḅọkọ la tẹ oloku pakamam, “Sẹdarakị! Mẹsakị! Abẹdinigo! Kụrọmamgba-Nyana Tamụnọ ḅe Fịrịmẹnjịapụ! Ọ́ paka-ḅoo!” Tẹ anị-gbọrụ-kirikiri ịn paka-ḅom.

27 Amadapụ awọmẹ mamgba na, gọvịna apụ na ịn palị-apụ na, osi amadaḅọ ḅe opu ma na kobiri ḅo tẹra owiapụ ma ḍikim, anie fịnị mẹ ye kẹ lama-a apụ ma. Ịna sịḅị-ḅẹ-inume dọkị-a, ịna akapa dọkị-a, anịsakị onwi fụrụ sọ ịna ḅụ nini-la-a.

28 Amadaḅọ ḅe nwẹnị ḍuko, “Ọ́ Sẹdarakị na Mẹsakị na Abẹdinigo na Tamụnọ ḅe tokini. Ori ori enjẹlị fịrịma mu mịna tẹra owiapụ tẹ fịrịmẹnjị ọ̀ pịrịarị tẹ ọ̀ kẹ ḅiokpọma apụ ma pụkọ-pakamaḅom. Ini à tọn ye poki tẹ mịẹ-a, tẹ ịna ḍumo kẹ fa ḅọkọ ḅio suum, ịna soku-ḅẹ Tamụnọ sikima in sunsin jen tamụnọ pịrị ḅẹ nakara.”

29 “Tẹ mịọkụ àrị oloko sụarị mịnẹ jen sịẹ goyegoye, tomina ḅara goyegoye, anịanịa ẹkwẹn-ḅịḅị ḅẹ ḅọ tẹ ḍiki-iderima ḅara kẹ Sẹdarakị na, Mẹsakị na Abẹdinigo na Tamụnọ ḅe ḅụ kụn ofori ḅara kẹ ẹkwẹn ḅọ ini mḅọ nụnụ-kanị ḅa eleke-eleke ḅụ, tẹ mḅọ warị opu sara sọ ḅa. Jen tamụnọ tẹ mị-ḅara kẹ kịnị pụkọ-pakamaḅo tẹ ḅọ ofori.”

30 Tẹ amadaḅọ ḅe Sẹdarakị na Mẹsakị na Abẹdinigo na iwoma mu tarị in sime kiri ḅọrọm, Babịlọnị ibe mẹ ḅụ.

(C) The Bible Society of Nigeria

Bible Society of Nigeria
Lean sinn:



Sanasan